Levimiako 25 - Angami Naga CL (Re-edited) Bible (BSI)

Sabat Teicieu

¹ Jihovae Sinai kijüthou geinu Mosa ki:

² Israelko ki pushülie; nieko a kijü pie nie tsükeshü nu vorlie ro, kijüu Jihova la sabat puo penyituo.

³ Cie sorou nie-e nie lie nu tsia vatuo, mu cie sorou nie khubelie mezatuo, tsiu süko si pfhü kengutuo;

⁴ derei cie thenie cie kijüu la sabat pecükecü puo batuo, Jihova kitsa sabat puo, nie lie nu tsia valie lho morei nie khubeboko mezalie lho.

⁵ Nie lie nu rülhieko nie-e relie lho mu nie khubebo meza moketako si nie-e rie kengulie lho; süu kijüu la rülei pecükecü teicie puo chütuo.

⁶ Kijüu sabat tei la kijüu thuo nie cava khashütuo, nie la tsiu nie diemia thepfumia la tsiu thenumia la rei siro nie u zhakhrü morei u thuo u zepie nie tsüwa di nie kituo chü ketuonie ze kebamia la rei;

⁷ nie kiri la mu nie kijü nu khunuo kebako la rei kijü siko pie nie ca chütuo.

Jubilee Teicie

⁸ Mu nie-e teicie zhadoudo thenie phrülietuo, cie thenie va thenie, sidi teicie zhadoudo theniekoe nie la cie hiediaethepfütuo.

⁹ Siro nie khrü thenieu khrü zha ker nhie ketsü puo pfhe kemeyieu khoushütuo; ruothoruori zha nhie nie-e ketsüu khoupie nie kijü pete nu shütuo,

¹⁰ siro nie teicie hiepengouu se kemesatuo, siro kijü nu lhou keba pete ki u khashüwaketa nie kijü pete nu pu pesishütuo; süu nie la Jubilee puo chütuo, süki nie kehoupuorei puo thuo puo vieu ngu lalietuo, mu kehoupuorei puo thuo puo kikruu ki la votatuo.

¹¹ Teicie hiepengouu nie la jubilee puo chütuo nie sücie tsia valie lho, morei rülhie relie lho, morei khubebo meza moketako geinu puo si rie kengulie lho.

¹² Süu Jubilee puokecü la; süu nie la mesa zotuo; nie-e lie nunu rüchükelieu cütuo.

¹³ Jubilee hau cie kehoupuorei puo thuo puo vieu ngu lalietuo.

¹⁴ Siro nie nie zanuou ki mha zeshü morei puo kinu mha khrü ro nie huoniehuo kedolie lho.

¹⁵ Jubilee sie teicie kitsuo shikecü le di noe n zanuou kinu khrütuo, mu teicie kitsuo chiepie batuo shikecü le di puoe n ki zeshütuo.

¹⁶ Teicieko kra ro noe puoma kehieshütuo, mu teicieko tsa ro noe puomau khretuo, puoe chiebie kitsuo shikecüu se n ki zeshüzhükecü la.

¹⁷ Nie huoniehuo kedolie lho, derei nie nie Kepenuopfü preituo: Ae Jihova nie Kepenuopfü zokecü la.

¹⁸ Süla nieko ae chünukecüko chüüzetuo, mu a pethokeshüzhoko ze di süko chütuo; sitse nie-e kijüu nu khrukhre di lhoulietuo.

¹⁹ Kijüue puo si vüshütuo, tsiu nie kelhuo ngulietuo, mu khrukhre di lhoutuo.

²⁰ Mhanuü nie-e sie, “Hie cie thenie cie kedipuo cütuo ga, hie bu tsiava mo morei hie lie nu rüchükelieu pfhü kengu mo üro?” iro,

²¹ Ae cie sorou cie theja die khapie nieko gei shütuo, sitse nie kijüue cie se la puosi vüshütuo.

²² Nie cie thetha cie tsia vatuo, mu süki nie rüwe cü batuo, cie thepfü cie puo si rüchükelieu lerlie kemochie, nie-e rüweu cü batuo.

²³ Kijüu kechachie la zelie lho, kijüue a vie zokecü la, nieko solhimia mu a lie nyie se kebamia zokecü la.

²⁴ Nie kijü liekelie pete nu, rhalie kevi cha khrüpie batuo.

²⁵ N siezedzüriemia puoe mhajüto di puo vie huo zewa ro, puo thinuo thebotho-ue vor di puo zekewau rhatuo.

²⁶ Mia puoe miapuorei süu rhashü puo ketsü jü, süsie nu puo thuo mhanyilie di süu rhalie kevi de pfhülie ro,

²⁷ puo bu puo zekeshü cie nu cie kitsuote shikecü phrüliecie, di sünunu puoma kidepuo su morosuo baluo shikecü le di se khrü se tuoketau tsüwalie; siliro puo vieu kelashüwatuo.

²⁸ Derei puoe süu pie lalieketuo ma de ba moro, süue Jubilee teicieu ketso khrülieketau dzie nu batuo; Jubilee nu süu kha lashüwatuo, sidi puo vieu kelashü puo tsüwatuo.

²⁹ Mia puoe nadi puo dahou kenyi puo nu ki puo zeshü ro, puoe zekeshü sie teicie puo donu süu rha lalie vi, teicie puo donu puo rha lalie kevi puo mezhü ba.

³⁰ Cie puo pete donu rha lalie moro, puo dahou kenyi nadiu nu bakecü kiu pie thephou pete la khrükelieu vie ketho chüwatuo; süu we Jubilee ki kha lashülie lho.

³¹ Derei puo dahou kejü rüna nu kiko we, rüna nu lieko ze kemhietuo; süko we rhalie vi, mu Jubilee nu uko kha lashüwatuo.

³² Derei Levimia rünako nu uko kiko we, Levimiako bu kehoukipuorei rhalie vi.

³³ Mu Levimia puoe rhalie kevi puo mezhü kebau pevie moro, uko vie nadi puo nu ki zekewau Jubilee nu kha lashüwatuo. Levimia nadiko nu kiko Israelmiako donu uko vie zokecü la.

³⁴ Derei uko nadiko khie kijüko zowe zelie kenjü; süu we telhetephou nu uko vie zokecü la.

³⁵ Siro n siezedzüriemia puoe mhajüta di n kekhruohi se lhou morosuota ro, noe puo khruohituo; rünamia mu chazoumia puo tuoi puoe n ze batuo.

³⁶ Puo kinu puoprapuoshü lie lho, morei puo geinu n ya vilieketuo le lho, derei n Kepenuopfü preilie, n siezeu bu n khieki nu lhoulieketuo la.

³⁷ Noe raka pie puo thepu di puopra lielie lho, morei puocapuova khashü di puo mevi lielie lho.

³⁸ Ae Jihova nie Kepenuopfü zo, Kanan kijüu pie n tsütuoü mu nie Kepenuopfü chütuo üdi Ijipt kijü nunu nie ze parkelieu.

³⁹ N siezedzüriemia puoe n khieki nu mhajütota di n ki puo thuo puo zepie n tsüwata ro, noe puo bu kediemia puo tuoi mhachülie lho.

⁴⁰ Puoe zhakhramia mu tsokhimia puo tuoi n ze batuo. Puoe Jubilee teicieu ketso n lie chütuo;

⁴¹ süsie puoe n kinu tuotatuo, puo mu puo nuonuo sa, di puo thuo puo kikru nu la votatuo, di puoe puo vieko pevie lalietuo.

⁴² Ukoe a thekeko, ae Ijipt kijü nunu ze parkeshüko zokecü la; kediemia tuoi uko zecülie lho.

⁴³ Nie zho suo di uko mho dilie lho, derei nie Kepenuopfü preituo.

⁴⁴ Nie die thepfumia mu thenumia rei nie ze kebako la we, seyie nie houpfü kebako kinu kedie thepfumia rei thenumia rei khrülie vi.

⁴⁵ Solhimia nie ze kebako mu u nuonuo nie kijü nunu penuokelieko rei khrülie vi. Sükoe n vie chütatuo.

⁴⁶ Nie uko khapie theka chü di nie nuonuo bu kechachie la welie vi; nie uko pie kedie chüwalie vi, derei nie siezedzürie Israelko mho we nie zho suo di huoniehuo mho dilie lho.

⁴⁷ Solhimia morei n ze keba puo mhanyilie, mu nie siezedzürie puoe mhajüta di puo thuo puo ze pie chazou themia puo ki morei süu kinumia puo ki shüwa ro,

⁴⁸ sükoe zekewa sie puo rha lalie vi, puo siezedzürieko mia puo,

⁴⁹ morei puonie puo dimia, morei puo ze pfuduonuomia puo morei puo kinumia puo kepenuomia puoe puo rhalie vi, morei puoe mhanyi lalie ro puo thuo puo rhalie vi.

⁵⁰ Puoe puo khrükelieu ze di puo thuo puo zekeshü teicieu nunu Jubilee teicieu ketso teicie phrülietuo, sidi puo rha lakelie mau teicie kitsuo shikecüu geinu letuo; puoe puo niepuu ze ketuo teiciekoe kituo zhakhramia puo tei tuoi di letuo.

⁵¹ Teicie kekra ba saluo ro süko le di puoe puoma chükewau geinu puo kerha mau leshütuo.

⁵² Jubilee teicieu tsoketuo cie huoyo zota ro, teicieu medzi di phrütuo, teicie kitsuo lhikhe baluo shikecüu le di puoe puo kerha la raka khashütuo.

⁵³ Puoe kituomia puo teicie puo la puo zha khrülieketamia tuoi di solhiu khro lhoutuo. Derei nie mhinguki nu zhosuo pie puo kekhalie lho.

⁵⁴ Mu hako mhie di puo rhalie mota ro, Jubilee teicieu nu puo khashüwatuo, puo nuonuoko sa puo ze di.

⁵⁵ A la we Israelko ha kituomia zo, ukoe a Ijipt kijü nunu ze parkeshü a kituoko zo: Ae Jihova nie Kepenuopfü zo.