Levimiako 24 - Angami Naga CL (Re-edited) Bible (BSI)

Mitubau Kesekecü

¹ Jihovae Mosa ki:

² Israelko bu mitubouu la oliv thupie chükecü tier kemesa se n ki vornu di diekhashülie, mi bu tu sei baketuo la.

³ Aron-e süu khapie dietseidiekho keyapfheu sietsa, rüsuopfhekiu nu süu kha menuopie batuo, thevatie nu khise ketso Jihova mhodzünu kha seipie batuo; hau nie nuosenuoyie pete nu kechachie la thezho puo chütuo.

⁴ Puoe mitubouko pie Jihova mhodzünu suna ketho pie kechü mitubako gei kha menuopie ba seituo.

Kepekieniekhrüdau

⁵ Siro nie thou kevitho se niekhrüda kerekenie rielietuo; niekhrüda puo bu efa ker-zakenie batuo.

⁶ Mu nie süko pie suna ketho se kechü mizhüu gei cha kenie chü di pie thashütuo, cha puo nu sorourou idi.

⁷ Siro nie cha puotse nu kethengu kemesa khashütuo, süu pie niekhrüdau se ruosuo kechü puo chü di mi nu ruosuo chüpie Jihova ki shütuo.

⁸ Sabat zha metsei Aron-e Israelmiako la Jihova mhodzünu süu kha menuoshüshü seituo, u khakeshü puo chü di kechachie dietseidiekho puo la.

⁹ Mu süusü Aron mu puo nuonuoko latuo, tsiu ukoe süu kemesachü puo nunu cütuo, süue mi nu Jihova ki ruosuo khakeshü nunu puo ya kemesatho puo, puo la khashü sei morokesuo puo zokecü la.

Jihova Za Pu Pesuokecü Siazha

¹⁰ Siro mia puoe puo zuo Israelmiapfü, siro puo puoe Ijiptmia, mu themia süue Israelmiako donu pra; sidi Israelmiapfü nuou mu Israelmia puo unie-e razhüchü nunu kegeita,

¹¹ tsiu Israelpfü nuoue Thezau gei die kerhu pu di süu bie perhuwa. Sitse ukoe puo ze Mosa ki vor. Puo zuopfü za Shelomit, Dan yiemia, Dibri nuopfü,

¹² mu ukoe puo khapie ba, Jihova medo-u pie uko pesishü kemochie.

¹³ Ru Jihovae Mosa ki:

¹⁴ Razhüchüu nunu rüse die kepuu ze parlie; tsiu puo die kesi pete bu uko dzie pie puo tsü gei shülie, mu mechükehou bu ketsie pie puo vawalie.

¹⁵ Siro Israelko ki pushücie, kehoupuorei puo Kepenuopfü rüsekecüu puo kephouma toupfüpfü zotuo.

¹⁶ Jihova za pu pesuokecüu pesiatuo. Mechü pete ketsie pie puo pu kepesuou vatuo. Solhimia rei khenu kelhouu rei, Thezau pu perhu ro, puo pesiatuo.

¹⁷ Mia dukhrikecüu pesiatuo.

¹⁸ Khunuo puo dukhriwa ro süu su latuo, kerheiro sou kerheirotuo.

¹⁹ Mia puoe kekreimia puo bie kerünyiewa ro, puoe chükeshü tuoi puo gei rei chü lashütuo,

²⁰ bietshekecü sou bietshekecü, themhi sou themhi, thehu sou thehu; rüza pie mia gei chükeshüu, puo rei süu pfütuo.

²¹ Khunuo puo dukhriwa ro süu sou su latuo; mia dukhrikecüu pesiatuo.

²² Nie-e solhimia la mu khenu kelhouu la thezho puo setuo: Ae Jihova nie Kepenuopfü zocü la.

²³ Sidi Mosae Israelko ki pushü; mu ukoe, rüse die kepuu ze razhüchüu cie pralie, di ketsie pie puo vawa. Hai di Israelko Jihovae Mosa ki diekhakeshü tuoi chülie.