Levimiako 23 - Angami Naga CL (Re-edited) Bible (BSI)

Khakeshü Thenyiko

¹ Jihovae Mosa ki:

² Israelko ki pushülie: Hako Jihova nyiko, hakoha nie bu se kemesaketuo kehouko, a chiekeshü thenyiko.

Sabat, Ciekevo-u mu Khreiüshükemo Niekhrüdau

³ Zha sorou mhachütuo, derei zha thenie nhie we sabat ze pecü di rüleikecü, kemesa kehou puo chütuo; nie-e mhapuorei chülie lho, nie lhou keba pete nu, süu Jihova la sabat puo.

⁴ Hako Jihova kitsa thenyi khapie baketuoko, kemesa kehouko, nie-e chiepie keba teiko nu khapie baketuoko.

⁵ Thekhrü kerieu nu, zha keredia nhie thevatie, nie ciekevo ruosuo puo chüpie Jihova tsütuo.

⁶ Mu süu khrü zha kerepengou nhie Jihova ki keshü khreiüshükemo niekhrüdanyi; zha thenie khreiüshükemo niekhrüda cütuo.

⁷ Zha therie nhie nie kemesa kehou puo batuo; nie mhatho puorei chülie lho.

⁸ Derei nie zha thenie nhie mi nu thekecü ruosuo chüpie Jihova ki shütuo; zha thenie nhie pie kemesa kehou puo chütuo; nie mhatho puorei chülie lho.

Puosi Kerieu se Ruosuo Kechü

⁹ Mu Jihovae Mosa ki:

¹⁰ Israelko ki pushülie: Nie-e a se nie ketsü kijüu nu vorlie di lierelie ro, nie-e nie lie nu chieshü kerietho khro-u se zievo-u ki vortuo;

¹¹ mu telha khro süu pie puoe Jihova mhodzünu pie sie kegeshütuo, nie bu lielie kesümia chülietuo; zievo-ue a sabat sienhie süu piesieshütuo.

¹² Mu nie puo khro-u pie kesie nhie, tekuochü cie puo keta ciewa kemo puo se kethe ruosuo chüpie Jihova ki shütuo.

¹³ Süu se lhacülhale ruosuo thou kevitho efa ker-zakenie pie tier sa kereilie di, mi pie thekecü Jihova ki khakeshü puore kevi puo chütuo; mu süu sa di kekrie ruosuo khakeshüu sü khube hin dia-zapuotuo.

¹⁴ Mu teisozha sünhie nie Ukepenuopfü ruosuou se vorwa kemochie niekhrüda morei lhako thukecü morei telhakre shierei cülie lho; süu nie lhou keba pete nu kechachie nie nuosenuoyie la thezho puo chütuo.

Zhadoudonyi

¹⁵ Mu niekoe sabat sie telha khropie kevor nhie nu, kegekecü ruosuou la nie phrütuo sidi zhadoudo thenie tsei toutuo.

¹⁶ Sabat zha thenie sienhie ketso phrü ro zha hiepengoutuo; sitse nie lieyie kesa se lhacülhale ruosuo chüpie Jihova ki shütuo.

¹⁷ Nie kebachü nunu niekhrüda kenie, efa ker-zakenie pie chükecü se vor pie sie kegecü ruosuo chütuo; puo chieshü kerietho-u pie Jihova ki keshü la thou kevitho pie sünie rietuo, khrei se di sünie rietuo.

¹⁸ Nie teicie puoketa ciewa kemo tekuo thenie mu thudo kemedzü puo mu tekuochü kenie pie niekhrüda sa khashütuo; ukoe Jihova ki keshü kethe ruosuo puo chütuo, lhacülhale ruosuo sa, mu kekrie ruosuo sa di mi pie thekecü ruosuo, puore kethengu ruosuo chüpie Jihova ki shütuo.

¹⁹ Nie-e kephouma ruosuo chüketuo la mvüdo puo khashütuo, mu tekuonuo cie puo keta puochü kenie pie vitho ruosuo la khashütuo.

²⁰ Zievo-ue süko pie chieshü niekhrüdau sa di, tekuonuonie sa piesie kegecü ruosuo chü di Jihova mhodzünu piesie kegeshütuo; sükoe zievo-u la Jihova mhodzünu mesatuo.

²¹ Tsiu nie sünhie shieshütuo; sünhie nie la kemesa kehou puo chütuo, nie mhatho kere puorei chülie lho; süu nie nuosenuoyie la nie rüna pesiekelie thechü pete nu kechachie la thezho puo chütuo.

²² Mu nie lie re ro, nie liemhou ketso relie lho, morei lieyie tei sie nie sie kepalie lho; nie kejümia mu chazoumia la süko khapie zhütuo: Ae Jihova nie Kepenuopfü zo.

Ketsü kekhounyiu

²³ Mu Jihovae Mosa ki:

²⁴ Israelko ki pushülie: Khrü thenieu zha therie nhie, nie-e rülei pecü sekecü puo chütuo, ketsü kekhou pie pesikeshü, kemesa kehou puo batuo.

²⁵ Nie-e mhatho puorei chülie lho; mu nie-e mi nu ruosuo khakeshü puo pie Jihova ki shütuo.

Ruothoruori Zha

²⁶ Mu Jihovae Mosa ki:

²⁷ Khrü thenieu zha ker nhie ruothoruori zha, süu nie la kemesa kehou tei puo chütuo, mu nie pecü di mi nunu ruosuo chüpie Jihova ki shütuo.

²⁸ Nie hau zha nhie mhapuorei chülie lho, haue ruothoruori zhakecü la. Jihova nie Kepenuopfü mhodzünu nie ruotho chüketuo la.

²⁹ Kehoupuorei hanhie nie pecü kemomia, puo themiako donunu puo kelhiwatuo.

³⁰ Mu kehoupuorei hanhie mhakehoupuorei chü ro, ae puo themiako donunu puo pekawatuo.

³¹ Nie mhapuorei chülie lho: Hau kechachie nie nuosenuoyie pete la nie rüna pesiekelie pete nu nie la thezho puo chütuo.

³² Süue nie la rülei tseikecü sabat puotuo; mu sünhie nie pecü batuo; thekhrüu zha thepfü zhü, thevatietuo, thevatie nunu vo thevatie ketso nie-e sabat khapie batuo.

Pru Nyiu

³³ Siro Jihovae Mosa ki:

³⁴ Israelmiako ki pushülie, khrü thenieu zha kerepengou nhie sede di zha thenie la Jihova ki keshü pruunyi nyituo.

³⁵ Zha therie nhie kemesa kehou puo batuo, nie mhatho puorei chülie lho.

³⁶ Nie zha thenie nhie mi nunu ruosuo chüpie Jihova ki shütuo; zha thetha nhie nie kemesa kehou puo chütuo, mu nie mi nunu ruosuo chüpie mesümedekecü kehou puo Jihova ki shütuo; nie mhatho puorei chülie lho.

³⁷ Jihovae zha chiekeshü thenyiko hakoha: Kemesa kehou tei üdi nie-e pu pesishüketuoko, mi pie ruosuo chü di Jihova ki khashüketuo la; kethe ruosuo tsiu lhacülhale ruosuo, ruothoko mu kekrie ruosuoko, puo thuo puo zha tou nhienhie zotuo;

³⁸ Jihova sabatko zo kemo, siro nie mha khakeshüko zo kemo, mu nie phrakeshü ruosuoko pete; u kenei nu se Jihova ketsü ruosuoko zo kemo khapie baketuoko.

³⁹ Khrü thenieu zha kerepengou nhie, nie-e nie lieyie pfhü kengulieketa sie zha thenie Jihova nyiu nyituo; zha therie nhie rülei tseituo mu zha thetha nhie rei rülei tseituo.

⁴⁰ Mu nie zha therie nhie seibo keviko si, kukuobopfü coko, siro sei puonyü kekrako co, mu rücü pogei sopfüciekhrie selietuo; di nie zha thenie Jihova nie Kepenuopfü mhodzünu nie neituo.

⁴¹ Cie puo nu zha thenie süu nyipie nie Jihova ki shütuo, hau kechachie thephou pete nu la thezho puo, nie-e khrü thenieu khrü hau nyituo.

⁴² Nie zha thenie pru nu batuo; Israel nu kelhoumia pete pru nu batuo;

⁴³ ae Ijipt kijü nunu Israelko ze parkeshü ki uko bu pru nu ba ükecü nie nuosenuoyie bu silieketuo la: Ae Jihova nie Kepenuopfü zo.

⁴⁴ Hai di Mosae Jihova nyi zha chiekeshüko pupie Israelko pesishü.