Levimiako 22 - Angami Naga CL (Re-edited) Bible (BSI)

Ruosuo Kemesako

¹ Siro Jihovae Mosa ki:

² Aron mu puo nuonuoko bu Israelko vie kemesa sephra khakeshü, kha menuopie balienu pushülie, uko bu a za kemesau bie perhuwa molieketuo la: Ae Jihova zo.

³ Uko ki pushülie: Nie nuosenuoyie pete donu mia puoe mesa mo keba ki kemesa sephrako penuo vo ro, a mhodzü nunu themia süu kelhiwatuo: Ae Jihova zo.

⁴ Aron yiemia puo mpa chü morei puo gei zu kepar huo nyi ro, puoe mesalie kemochie, kemesa sephrako cülie kenjü. Kehoupuorei kesiamo puo bie morei mia puoe puo phoudzü kru kepar puo nyükeshü la mesa moketa ki,

⁵ morei mha goukezhü puo bie di mesa motalie kevi puo chü, morei themia mesa moketa puo bie, mesa kemo kehoupuo bie shierei,

⁶ biekecüu thevatie ketso mesa mo batuo, mu puoe dzü rüluwakemo sie kemesa vieko cülie lho.

⁷ Niakiu leta ro puoe mesatatuo; mu süsie puoe kemesa vieko cülie vitatuo, sükoe puo ca zokecü la.

⁸ Khunuo siaketa puo morei khunuo kekrei puo bu puo tekewa vieko cü di puo perhulie lho. Ae Jihova zo.

⁹ Süla uko bu ae pethokeshüzhoko zetuo, uko bu kemesachüu bie perhuwa di kekrükewa mu süu la siata moketuo la: Ae Jihova, uko chü kemesakeshüu zo.

¹⁰ Miaümia bu mha kemesa vieko cülie lho. Zievo kituou morei zhakhrü ze ketuo kituou bu rei mha kemesa vieko cülie lho.

¹¹ Derei zievomia puoe raka se kediemia puo khrülieta ro, kedieue süu cülie vi; mu puo ki nunu penuokelieko we puo ca cülie vi.

¹² Zievomia puo nuopfüe miaümia puo kinyita ro süpfüe kemesa vie ruosuo chükeshüko cülie lho.

¹³ Derei zievomia puo nuopfüe samita, morei puo nupfu puo vawata, mu puo nuo jü, di puo ki la vorta ro, puoe puo rüü ki tuoi, puoe puo puo ca cülie vi; derei miaümia we süu cülie kenjü.

¹⁴ Mu mia puoe si mo di kemesa vie puo cüwa ro, puo süu ma pengou-zapuo sa pie bashü di kemesa vie süu pie zievo-u tsü latuo.

¹⁵ Mia puo bu rei Israelmiako mha khakeshü kemesa vieko, uko pie Jihova ki keshüko bie perhulie lho,

¹⁶ uko bu kemesa vieko cü di kejo pfüta di, kephouma ruosuo chü morosuoketa chü lho: Ae Jihova, uko chü kemesakeshüu zo.

Lielie Kesü Ruosuoko

¹⁷ Siro Jihovae Mosa ki:

¹⁸ Aron mu puo nuonuoko mu Israelmia pete ki pushülie: Israelmia morei solhimia Israel nu lhou kebamia puoe puo ruosuo khakeshü ki, puoe khashütuo üdi phrakeshü puo la morei puo nei di Jihova ki kethe ruosuo khakeshü shierei,

¹⁹ süu bu lielie kesü chülieketuo la, süu bu ciekemo thudo, tekuochü, morei mvüdo puo morosuo.

²⁰ Nie-e ciekewa puorei khashülie lho, süue nie sou nu lielie kenjü.

²¹ Mu kehoupuorei Jihova ki vitho ruosuo khakeshü ki, puo phrakeshü puo chü tseishüketuo la rei mu puo nei di khakeshü puo shierei; thukro nunu morei tekuokro nunu khashü ro, süu lielieketuo la; süu vi lotsokecü puo morosuo. Süu nu ciekewa puorei salie lho.

²² Noe khunuo puo mhikecie morei lalhi morei rüzapfü morei puo geinu zu kepar kenyi morei kemeso morei mepfhe bakecü pie Jihova ki khashülie lho morei süu pie ruosuoba geinu mi thepie ruosuo chülie lho.

²³ Thudo morei tekuo puo bou puo chathor morei dzüthorkecü pie nie-e nie nei di ruosuo khakeshü nu shülie vi, derei u die phrakeshü ruosuo nu we nie süu lielie kenjü.

²⁴ Khunuo kehoupuorei puo dzü bie kerüzawa morei bietshiewa morei bierhawa morei geiwakecü pie ruosuo chülie lho, nie-e nie kijü nu sü kemhiekecü selie lho zo.

²⁵ Morei nie chazoumia kinu khunuo sikecü liepie kecüca ruosuo chüpie Ukepenuopfü tsülie lho. Süko u lhekesuo la u gei tso kemo ba, süla nieko la uko lielie kenjü.

²⁶ Mu Jihovae Mosa ki:

²⁷ Thudo morei tekuo morei temvü puo penuolie ro, puoe puo krü ze zha thenie batuo, mu zha thetha nhie nu süu se mi nu ruosuo khapie Jihova ki keshü la lielie vitatuo.

²⁸ Nie khunuo thukrü morei tekuokrü shierei nie khunhie va puo nu puo krüpfü mu puo nuoyo unie dukhrilie lho.

²⁹ Noe kethezie ruosuo puo chü Jihova ki khashü ro noe n sou nu lielie kesü puo khashütuo.

³⁰ Sünhie teiso süu cülie morosuo, noe süu puorei pie ba khise tsolie lho: Ae Jihova zo.

³¹ Sidi noe a diekhakeshüko zetuo mu chütuo: Ae Jihova zo.

³² Mu noe a kemesa zau pie kezhaselie lho, derei Israelmiako donu a pie kemesatuo: Ae nie chü kemesakeshüu Jihova zo.

³³ Nie Kepenuopfü chütuo üdi Ijipt kijü nunu nie ze parkelieu: Ae Jihova zo.