Levimiako 21 - Angami Naga CL (Re-edited) Bible (BSI)

Zievoko Kemesa

¹ Jihovae Mosa ki: Aron nuonuo zievoko ki pushülie: Uko mia puo bu rei u themia donu kesiamia la u perhuwa hienushülie.

² Puo kepenuothomia zo kemosie, puo zuo, puo puo, puo nuo, puo nuopfü, puo siezedzürie,

³ morei puo üpfü phousepfü, puo nupfu nyi moluokecüpfü la we puo thuo puo perhulie vi, puo kepenuomiacü la.

⁴ Puoe mianupfunuo chü di puo themia donu puo perhu mu puo thuo puo pie kezhasewa lho.

⁵ Ukoe uko tsüthielie lho, morei uko tiemie khieko thielie lho, morei uko chü geilie lho.

⁶ Uko bu uko Kepenuopfü kitsa mesatuo, mu uko Kepenuopfü zapie kezhaselie lho; ukoe uko Kepenuopfü niekhrüdau pie mi nu ruosuo chüya, süla ukoe mesa morosuo.

⁷ Uko bu thethenumiapfü morei thenu rhuketapfü lielie lho; morei puo nupfu puo khakewapfü lielie lho; zievo-ue puo Kepenuopfü kitsa mesa zokecü la.

⁸ Nie puo chü kemesatuo, puo nie Kepenuopfü niekhrüda khashüyakecü la; puo nie kitsa mesatuo; Ae Jihova zo, nie chü kemesashüyakecüue mesa zocü la.

⁹ Mu zievomia puo nuopfüe thethe lie di puo thuo puo pie kezhase ro, puoe puo puo pie kezhase zo; mi pie puo thewatuo.

¹⁰ Puo siezedzürie donu zievokezhatho-u, kenhekecü tier-u pie puo tsü gei rukeshüu, pfheneiko seketuo la puo chü kemesawaketau, puo tsütha kelhapfülie lho, morei puo pfheneiko cierhalie lho.

¹¹ Puoe kesiamo kebara volie lho, morei puo perhulie lho, puo puo morei puo zuo lanu zo rei,

¹² morei kemesachüu cie par di Ukepenuopfü kemesachüu zhaselie lho; puoe Kepenuopfü kenhekelie kemesa tier-u puo gei bakecü la. Ae Jihova zo.

¹³ Mu puoe rüü phousepfü puo lietuo.

¹⁴ Samipfü, morei vawaketapfü morei thenu perhuwaketapfü, morei thethenumia, haikecüko puo rei lielie lho; derei puoe puo seyie donu rüü phousepfü puo liepie puo kimia chütuo.

¹⁵ Puo kicükinumia donu puo nuonuoko bu kezhaseta molieketuo la; ae puo chü kemesashüyakecü Jihova zocü la.

¹⁶ Mu Jihovae Mosa ki:

¹⁷ Aron ki pushülie, n seyiemia phou pete nu rei lotso kemomia bu Kepenuopfü kecüca khashütuoü penuo vor lho.

¹⁸ Lotso kemomia bu penuo vo lho, mhiciemia morei phiyhomia puo, morei puo zie bie ketheciewaketamia, morei puo kere chathorkecümia,

¹⁹ morei puo phi morei puo dzie tseketamia,

²⁰ morei chiethoumia, morei semenyienuomia, morei puo mhi kesuomia morei kemeruo kechü kenyimia morei mepfhe morei puo dzü bietshiewaketamia.

²¹ Aron zievo-u seyie lotso kemomia puorei bu Jihova ki ruosuo khashütuoü penuo volie lho; puoe lotso kemo puo bakecü la, puo bu Kepenuopfü kecücau khashüketuo la penuo volie lho.

²² Puoe puo Kepenuopfü niekhrüdau cülie vi, kemesatho-u rei mu mha kemesako rei,

²³ derei puoe pfhekelhau kiki vorlie lho morei ruosuobau penuolie lho, puoe lotso kemo puo kenyi la, puo bu kemesachüko zhasewa molieketuo la; Ae uko chü kemesashüyakecü Jihova zocü la.

²⁴ Sidi Mosae Aron tsiu puo nuonuoko mu Israelko ki pushü.