Levimiako 20 - Angami Naga CL (Re-edited) Bible (BSI)

Dieze Chüya Kemomia gei Siazhako

¹ Jihovae Mosa ki:

² Israelko ki pu sashülie: Israelko donu, morei Israel donu lhou keba solhimia rei puo nuonuo pie Molek tsükecüu pie kesia nu shütuo; rüna nu themiakoe ketsie pie puo vakhrituo.

³ A thuo a zie pie süu petsoutuo, di puo themiako donunu puo kelhiwatuo, puoe puonuo puo pie Molek tsü di a kemesachüu perhu mu a kemesa zau bie kezhasekecü la.

⁴ Tsiu kijü nu themiakoe uko nuo pie Molek tsükeshü ki, rünau themiakoe u mhi süu kinu kevieta di uko puo pie kesia nu shü moro,

⁵ ae a zie pie themia süko siro uko kikruko petsoutuo, mu uko donunu uko kelhiwatuo, puo rei mu puo medzi thethe lie di Molek kemedzi pete.

⁶ Mia puoe rürei themoupfhi tsiu themoumia kitsa va, thethe lie di uko sietuo ro, a a zie pie süu petsoutuo, mu puo themiako donunu puo dathewatuo.

⁷ Süla nie thuo nie chü kemesalie, mu mesaliecie, kekreilamonyü ae Jihova nie Kepenuopfücü la.

⁸ A zhoko zelie, mu chülie; ae nie chü kemesashüyakecü Jihova zo.

⁹ Puo puo morei puo zuo rüsekecüu pie kesia nu shütuo; puoe puo puo mu puo zuo rüsewate, puo zie thuo puo tsü gei pfütuo.

¹⁰ Mia puoe puo zanuou kimia ze pieü chü ro, pieüu mu pieüpfü unie pesiawatuo.

¹¹ Puo puo kimia zezhükecüu puo puo kemenga kewheu rhuowate, unie pesiawatuo, mu unie zie unie tsü gei pfütuo.

¹² Mia puoe puo miepfü zezhü ro unie pesiawatuo; unie kepenuo zo di keze mha kesuo chü, unie zie thuo unie tsü gei pfütuo.

¹³ Mia puoe thenu zekezhü tuoi thepfumia rei zezhü ro, unie-e mha kerütsecü puo chüte, unie kenienie pie kesia nu shütuo, unie zie thuo unie tsü gei pfütuo.

¹⁴ Mia puoe puo kimia mu puo kimianuo zuo sa lie ro, süue kerüzhü mhatho puote, süla mi pie uko pete thetuo, nie donu kerüzhü bu ba molieketuo la.

¹⁵ Mia puoe khunuo ze zhü ro, puo pesiawatuo; mu nie khunuou dukhriwatuo.

¹⁶ Miapfü puoe khunuo puo ki vo di puo zezhüwata ro, nie thenupfü mu khunuou dukhriwatuo; unie pie kesia nu shütuo, unie zie thuo unie gei pfütuo.

¹⁷ Mia puoe puo üpfü, puo puo nuopfü puo morei puo zuo nuopfü puo lielie di süpfü kemenga nguwa, mu hapfü rei puo kemenga nguwa ro, süue mha kethenga puo, süla unie themia nuonuoko mhinguki nu unie kelhiwatuo. Puoe puo üpfü kemenga hiewaketa la, puoe puo siazha ngu zotuo.

¹⁸ Mia puoe thenu mhachü kebapfü puo zezhü di puo ze mha kesuo chüwa, di puo hapfü zie bu kru parta ro, unie kenienie rei u themia donunu unie kelhiwatuo.

¹⁹ Noe n zuo siezepfü morei n puo üpfü kemenga kewhe hie lho, süue puo thuo puo kepenuomia ze mha kesuo kechü la, unie-e unie siazha ngu zotuo.

²⁰ Mia puoe puo nieu kimiapfü zezhü ro, puoe puo nieu rhu mowate; unie-e siazha ngutuo, unie nuo jü di siatuo.

²¹ Mia puoe puo siezedzürie kimia lielie ro, süue mha mesa kemo puote, puoe puo siezedzürie rhu mowata zo, unie bu nuojü chütuo.

²² Süla nie-e a chünukecüzhoko pete mu a pethokeshüzhoko pete zetuo, mu süko chütuo, a nie ze vorshü zhükecü kijüu bu nie melouwa molieketuo la.

²³ Mu nieko we, ae nieko mhodzüki nu whuoshükezhü seyieko zhoko nu tuo lho; ukoe mha hako pete chükecü la, mu süla ae uko mecüya.

²⁴ Derei a nie ki pushüwate: Niekoe uko kijü wetuo, mu ae khapie nie bu pevielietuo, thunudzü mu mepfhidzü krukezhü kijüu. Ae Jihova nie Kepenuopfü zo, themiako kinu nieko kho kreilieketau zo.

²⁵ Siro niekoe khunuo kemesa mu mesa kemo chükho kreituo, mu pera kemesa tsiu mesa kemo rei, niekoe khunuo, pera morei lhou kijü tshukezhüko bu rei nie bie kerütsewalie lho, ae nie la mesa mo üdi kha pekreikeshüko bu.

²⁶ Nie-e mesapie a tsütuo, ae Jihova mesakecü la; mu a nie kho kreilieketa la, nie bu a vie chütuo üdi.

²⁷ Thepfumia morei thenumia rei themoupfhi nu die pu mu themouyakecümia pesiawatuo; ketsie pie u vakhriwatuo, uko zie bu u tsü gei pfütuo.