Levimiako 2 - Angami Naga CL (Re-edited) Bible (BSI)

Lhacülhale Ruosuo Khakeshü

¹ Themia kehoupuorei lhacülhale ruosuo se vor Jihova ki khashü ro, puoe thou kevithopfü khashütuo; puoe süu gei tier lashütuo, mu kethengu pie sünu shütuo.

² Süu se Aron nuo zievoko ki vortuo. Siro puo sünunu thou kevitho dzielhi puo tsiu tier, kethengu pete sa di pielietuo, mu zievo-ue hau pie rükraketuo yau chü di ruosuobau geinu the pekruwatuo. Puo bu mi ruosuo khakeshü puo, Jihova ki puore kethengu puo chütuo.

³ Mu lhacülhale ruosuo khakeshü nu peshakelieko pie Aron mu puo nuonuoko ya chütuo; hau sü mi nu ruosuo khapie Jihova ki keshü nu kemesatho puo.

⁴ Noe lhacülhale ruosuo khakeshü miphu nunu rie di se vor ro, süu no khreiüshükemo thou kevitho se tier sa kereituo, morei khreiüshükemo niekhrüda rüpfüpfekecüu tier pie kenhetuo.

⁵ Siro no lhacülhale ruosuo khakeshüu süu shüthuoli nu rie ro, süu khreiüshükemo thou kevitho pie tier sa kereituo;

⁶ no süu ciechü petselie di tier lapie puo gei shütuo, süue lhacülhale ruosuo khakeshü puo.

⁷ Mu n ruosuo khakeshü li puo nunu cha liro, süu thou kevitho pie tier sa di chütuo.

⁸ Siro no lhacülhale khakeshü ruosuo nu khakeshü mha hako chükelieko se Jihova ki vortuo; mu hau se zievo-u ki vor ro, puoe süu se ruosuobau gei vortuo.

⁹ Mu zievo-ue lhacülhale ruosuo khakeshü nunu rükraketuo yau chü phrelietuo, di hau pie ruosuobau geinu thewatuo, süu mi se ruosuo khakeshü puo chü di Jihova ki puore kevi khakeshü puo chütuo.

¹⁰ Siro lhacülhale ruosuo khakeshü nunu peshakelieu we Aron mu puo nuonuoko la zotuo; hau sü mi nunu pie Jihova ki ruosuo khakeshü nu kemesatho puo.

¹¹ Lhacülhale ruosuo khakeshü puorei khrei pie shü di se Jihova ki vorlie lho; noe Jihova ki kethe ruosuo khakeshü nu khrei morei mepfhidzü thelie lhocü la.

¹² Noe sünie pie ruosuo kevitho chü di se volie vi; derei sünie pie puore kethengu chüketuo la ruosuobau gei khashülie lho.

¹³ Noe lhacülhale se ruosuo kechü pete rei metsie rükra mota suo; nie Kepenuopfü ze dietseidiekhokelie metsieu pie nie lhacülhale ruosuo nu khashü metuo; noe mha khakeshü pete nu metsie sa khashütuo.

¹⁴ Nie nie chieshü kerieu nunu lhacülhale ruosuo khapie Jihova ki shü ro, nie-e thoulha khakeshü nie chieshü puokre kesa nunu biepie gelie, mi pie houlie di khashütuo.

¹⁵ Siro tier pie sügei shütuo, di kethengu pie puo gei shütuo; süu we thoulha khakeshü puo chütuo.

¹⁶ Mu zievo-ue kerükra yau chüketuo la thoulha gekelie huoyo pie tier mu puo kethengu pete sa di thewatuo; hauha mi nunu Jihova ki mha khakeshü puo.