Levimiako 19 - Angami Naga CL (Re-edited) Bible (BSI)

Kemesa mu Kemezhü Zhoko

¹ Siro Jihovae Mosa ki:

² Israel mechükehouu ki pushülie: Nie mesaliecie, A, Jihova nie Kepenuopfüe mesakecü la.

³ Nie kehoupuorei puo zuo mu puo puo rhutuo, mu nie a sabatko se batuo: A Jihova nie Kepenuopfü zo.

⁴ Rüreise terhuorhiko vata hie morei thepie chükecü terhuoko nie thuo nie la chü hie: Ae Jihova nie Kepenuopfü zo.

⁵ Nie vitho ruosuo chüpie Jihova ki keshü ki, nie ruosuo bu lielie kesü chüketuo la khashütuo.

⁶ Nie süu khakeshü nhie morei süsienhie süu cülietuo; zha se ketso peshapie keba pete mi nu thewatuo.

⁷ Zha se nhie süu cü ro, süue kerütse puote, süu lielie lho,

⁸ kehoupuorei süu cükecüu puo kejo zhakhra pfütuo; puoe Jihova vie kemesa, se perhuwaketa la; süu puo themiako donu puo kelhiwatuo.

⁹ Nie nie lie rekecü ki, nie lie mhou ketso re phi lho, morei nie lie rekelie sie siepfhülie lho.

¹⁰ Mu nie khubelieu kepa tsei zowa lho, morei nie khubelie nu khubesi teketsuko palie lho; kejüko mu chazoumia la süko khapie zhütuo: Ae Jihova nie Kepenuopfü zo.

¹¹ Nie mha rügu lho, morei cürü, morei huoniehuo selie lho.

¹² Mu nie bu cürü di a za pie rüselie lho, mu sidi nie Kepenuopfü za perhulie lho: Ae Jihova zo.

¹³ Nie-e nie zanuou pese morei puo vie rüdie lho, zhakhra lietho-u zha khashü mo ba khise tsolie lho.

¹⁴ Nie nyievüu rüselie lho morei thephi kemesü puo pie mhicieu mhodzünu shülie lho, derei nie Kepenuopfü preituo: Ae Jihova zo.

¹⁵ Nie capi nu puotou kemo puorei chülie lho, nie kejüu kelhi pekrei morei kezhau nei chü kreitalie lho, derei kethoca se nie zanuou capi chütuo.

¹⁶ Nie nie donu sieükechümia tuoi kho mu kelie lho, tsiu nie zanuou zie geinu nie mevi pfhü lho: Ae Jihova zo.

¹⁷ Nie nie nou nu nie siezedzürie ngumecü lho, derei nie siezanuou ze mha kepukekielie, nie puo la kephouma toupfüta rei silie lhomu.

¹⁸ Nie nie khepu morei nie themia nuonuoko gei rünou kemo chü lho, derei nie zanuou khriepie nie thuo nie kekhrie mhietuo: Ae Jihova zo.

¹⁹ Nie a zhoko zetuo. Nie kiri bu khunuo kekrei ze kerüpie hie; nie tsia kekreikecü kenie pie nie lie nu prushü hie morei mha kekreikecü kenie pie chükecü pfhenei se hie.

²⁰ Mia puo miadiemiapfü puo, mia vakhapie ba rei puo rhalie moluo morei khashüwa moluokecüpfü puo zezhüwa ro, puo nyie ketsotuo. Unie bu siatalie lho, puoe khashüwaketamiapfü moluokecü la.

²¹ Derei puoe puo thuo puo la rüsuopfhekiu kikha nu tekuochü puo se kejo ruosuo la Jihova ki vortuo.

²² Tsiu zievo-ue kejo ruosuo la tekuochüu pie puo la Jihova mhodzünu puo ruotho chütuo, puoe kephouma chükewa la, mu puoe kephouma chükewau vashü puo tsüwatuo.

²³ Niekoe kijüu nu vorlieta di nie ca la sei neiü leishü ro, nie bu teicie se phrü di uko si kecü khatuo, süu cü suotuo.

²⁴ Mu cie dia cie puo si pete Jihova tsheketuo la kedakreilietuo.

²⁵ Derei cie pengou cie nie uko si cülie vitatuo, uko bu nie la vü phi salieketuo la: Ae Jihova nie Kepenuopfü zo.

²⁶ Nie mhakehoupuorei puozie sa cülie lho: Nie thuophi morei themoulie lho.

²⁷ Nie nie daphi houpfülie lho mu nie tiemie kewhilie lho.

²⁸ Nie kesiamia la nie chü geilie lho morei nie gei mha khu puorei thulie lho: Ae Jihova zo,

²⁹ N nuopfü pie thethe lie di puo bie kezhase lho, kijüue thethe nu teleta di kerüzhüu bu nie kijü nu tshuta rei silie lhomu.

³⁰ Nie-e a sabat zetuo mu a kemesachüu rhutuo: Ae Jihova zo.

³¹ Themoupfhi mu themouu rüsa hie, uko pfhü di uko bu n perhu hie: Ae Jihova nie Kepenuopfü zo.

³² Nie phichümia mhodzünu sietha morosuo, tsiu ketsamia zieu rhu morosuo, mu nie nie Kepenuopfü prei morosuo: Ae Jihova zo.

³³ Solhimia puo nie kijü nu ba ro, nie solhiu peselie lho.

³⁴ Solhimia nie ze rüna chü kebau pie nie mhodzüki khenu kelhoumia tuoi zolie. Mu nie puo khriepie nie thuo nie kekhrie mhielie; nie Ijipt kijü nu solhimia chükecü la: Ae Jihova nie Kepenuopfü zo.

³⁵ Nie mha kemejü nu mia se suo, puocha, puo mesi morei puo ketsakekra kemejü nu rei.

³⁶ Nie roshükhou dietho, mesitsie bu dietho, efa kedietho mu hin diethokecü setuo: Ae Jihova nie Kepenuopfü, Ijipt kijü nunu nie ze parkelieu zo.

³⁷ Tsiu nie-e a zhoko pete mu a rhükeshü pete chüüzetuo: Ae Jihova zo.