Levimiako 18 - Angami Naga CL (Re-edited) Bible (BSI)

Kethenga Mhatho Chü Hienukecü

¹ Siro Jihovae Mosa ki:

² Israelko ki pushülie, Ae Jihova nie Kepenuopfü zo.

³ Niekoe lhoukecü Ijipt kijü nu mia kemhie chülie lho, mu ae nie ze vorshü zhükecü Kanan kijü nu mia kemhie chülie lho. Niekoe uko zhoko medzilie lho.

⁴ Niekoe a rhükeshüu chü, ae pethokeshü zhoko ze mu süko nu tuotuo. Ae nie Jihova nie Kepenuopfü.

⁵ Süla nie-e a zhoko mu ae pethokeshüzhoko zetuo, sikeliemia rheilietuo; Ae Jihova zo.

⁶ Nie miapuorei vo seyie u kepenuomia kehoupuo kemethuo hie lho, ae Jihova zo.

⁷ Noe n puo kemethuo hie lho, süue n zuo kemethuo zocü la; puoe n zuo zo, noe puo kemethuo hie lho.

⁸ N puo kimia kemethuo hie lho, süu n puo kemethuo zo.

⁹ Noe n üpfü kemethuo hie lho, n puou nuopfü shierei, n zuo nuopfü shierei, kinu puo nunu puo penuo shierei, morei kekreira nu penuo shierei, noe uko kemethuo hie lho.

¹⁰ Noe n nuou nuopfü, morei n nuopfü nuopfü kemethuo hie lho, uko kemethuo sü n kemethuo zocü la.

¹¹ No n puou kimia nuopfü, penuopie n puo ketsüpfü kemethuo hie lho, puoe n üpfü zocü la.

¹² No n puo üpfü kemethuo hie lho, puoe n puo chüüphou zo.

¹³ No n zuo siezepfü kemethuo hie lho, puoe n zuo chüüphou zocü la.

¹⁴ Noe n puo siezedzürie kemethuo hie lho, puoca no puo kimia pfhü vo lho, puoe n thipfü zo.

¹⁵ Noe n miepfü kemethuo hie lho, puo n nuou kimiapfü zo, no puo kemethuo hie lho.

¹⁶ Noe n siezedzüriemia kimia kemethuo hie lho, süue n siezedzüriemia kemethuo zo.

¹⁷ Noe thenumiapfü puo mu puo nuopfü kemethuo hie lho, mu no puo nuou nuopfü morei puo nuopfü nuopfü kemenga kewhe rhuo lho; ukoe n chüüphou zocü la. Süue kerüzhütho zo.

¹⁸ Noe n kimia siezedzüriemiapfü puo liepie n kimia rüduo di puo kemenga kewhe hie lho, n kimia rhei keba chie.

¹⁹ Noe thenumiapfü puoe mhase keba ki puo kemethuo rhuotuoü puo penuo vo lho.

²⁰ Mu noe n kepenuomia kimia zezhü di puo ze n perhuwa lho.

²¹ Noe n nuonuo miapuorei se ruosuo chüpie Molek tsü, di nie Kepenuopfü za bie perhukecü chü lho: Ae Jihova zo.

²² Noe thenumia zezhükecü tuoi thepfumia ze zhü lho, süu kerütse zo.

²³ Mu noe khunuo puorei zezhü di n thuo n perhu lho, morei thenumia rei khunuo bu puo zezhü lho, süue themia zho mo zo.

²⁴ Mha hako puorei pie nie thuo nie perhu hie, kekreilamonyü a nie mhodzüki nu whuowakezhü seyiekoe, hako pie u thuo u perhuyakecü la;

²⁵ sidi kijüu chü perhuwa, mu a mezhü kemo süu pechüshü, sitse kijüe puo gei lhou kebako merüwate.

²⁶ Derei nieko we a zhoko mu a rhükeshüko zetuo mu kerütsekecü hako puorei chülie lho, khenumia shierei morei nie donu lhou ketuo solhiu shierei.

²⁷ (Nie mhodzü kelhouko mha kerütsekecü hako chü di kijüu bu rhuketa la.)

²⁸ Kijüue nie mhodzü kelhou seyieu merükewa tuoi, noe puo perhuwa ro nieko rei merüwalie vikecü la.

²⁹ Kehoupuorei mha kerütse hako puo chü ro, süko chükecü themiako u themiako donunu puo kelhiwatuo.

³⁰ Süla thezho kerütsekecüko nie mhodzü chü kevorko puorei chü molieketuo la, mu uko bu nieko perhu molieketuo la ae pethokeshüko zeliecie, ae Jihova nie Kepenuopfü zo.