Levimiako 17 - Angami Naga CL (Re-edited) Bible (BSI)

Ruosuo la Khunuo Dukhrikecü

¹ Jihovae Mosa ki:

² Aron mu puo nuo thepfuko tsiu Israelmia pete ki pushülie: Jihovae diekhakeshüu sü hau zo.

³ Israelmia puoe razhüchüu nunu, morei süu casie nu thudo puo morei tekuo puo morei temvü puo dukhri di,

⁴ rüsuopfhekiu mhodzünu se Jihova tsüketuo la rüsuopfhekiu kikha nu se vor moro, thezie pekrukecü kejo pie süu gei shütuo; puoe thezie pekrukewa la, puo themia donunu puo kelhiwatuo.

⁵ Hauhae Israelmia bu uko ruosuo phouyo nu se kevorko pie Jihova tsüketuo la, süko se rüsuopfhekiu kikha nu zievo-u ki vor di vitho ruosuo chüpie Jihova tsütuo,

⁶ mu zievo-ue thezieu kegepie rüsuopfhekiu kikha nu Jihova ruosuoba gei vatuo, di puoshuou thepie puore kethengu puo chüpie Jihova ki shütuo,

⁷ sidi uko bu temvü-rhuoko ruotho khashü mu thethe lie sa molieketuo la. Hau uko nuosenuoyie pete la kechachie zho puo chütuo.

⁸ Mu uko ki pu sashülie: Israel yie kehoupuorei morei uko ze lhouketa solhimia kehoupuorei puo kethe ruosuo,

⁹ pie Jihova tsütuoü rüsuopfhekiu kicie nu vor kemo-u themiako donunu puo kelhiwatuo.

Thezie Cü Hienukecü

¹⁰ Israel kinumia morei solhimia uko donu lhou keba kehoupuorei thezie kehoupuorei cü ro, a a zie pie thezie kecüu petsoutuo, di puo themiako donunu puo dathewatuo;

¹¹ kekreilamonyü kerheie thezie nu bakecü la, mu ae nie kerheiro la nie ruotho chütuoü, süu nie la khapie ruosuobau gei shüwate; kekreilamonyü thezie-e kerheiro puo gei kebau la ruotho chülieya.

¹² Süla ae Israelmiako ki pushüwate. Nie donu, morei solhimia nieko donu lhou keba miapuorei bu thezie cülie lho.

¹³ Israelko donu morei solhimia uko donu lhou keba kehoupuorei, chüwhuo di chü morei pera cülie kevi kehoupuorei bielie ro puozieu pekruwa di nyophe pie süu whewatuo.

¹⁴ Khunuo kehoupuorei puozie-e puo kerheiro zokecü la; süla ae Israelko ki pushüwate, nieko khunuo kehoupuo zie rei cülie lho, khunuo kehoupuorei puozie-e puo kerheiro zokecü la; kehoupuorei süu cükecüu kelhiwatuo.

¹⁵ Mu themia kehoupuorei khunuo puo thuo siaketau morei khunuo bu puo tewaketau cükecüu, süu khenu kelhoumia morei solhimia shierei, puo pfhenei menyi di dzü rülutuo, mu thevatie ketso mesa mo batuo; süsie puoe mesatatuo.

¹⁶ Derei puoe süko menyiwa mo morei dzürüluwa moro, puoe puo kejo toupfütuo.