Levimiako 16 - Angami Naga CL (Re-edited) Bible (BSI)

Ruothoruori Zha

¹ Aron nuo thepfunie Jihova mhodzü penuo phir di siaketa sie, Jihovae Mosa rüchü.

² Sidi Jihovae Mosa ki: N dzürieu Aron bu puotei kehou nu keyapfheu sietsa kemesachüu nu, dietseidiekho mhogei keba ngukemezhie bau mhodzünu le hienushücie, puo bu siata molieketuo la; kekreilamonyü ae kimhou nunu ngukemezhie bau gei partuo.

³ Derei Aron bu hamhie di kemesa chüu nu vortuo, kephouma ruosuo la thudonuo yopuo mu kethe ruosuo la tekuochü puo se di.

⁴ Puo bu kemesa linen boulie boulietuo, mu linen pfhenei pekhroko setuo, linen chiepha pie puo chie phatuo, mu linen tsüzeu setuo; kemesa pfheneie hako zo. Puo bu dzürüluwa di hako setuo.

⁵ Mu puoe Israelmia mechükehouu nunu kephouma ruosuo la mvüdo kenie mu kethe ruosuo la tekuochü puo se vortuo.

⁶ Aron-e puo thuo puo la thudo-u pie kephouma ruosuo puo chüshütuo, siro puo thuo puo la mu puo kikru la ruotho chütuo.

⁷ Süsie puoe mvüdo nie selie di, unie pie rüsuopfhekiu kikha nu Jihova mhodzü khashütuo;

⁸ tsiu Aron-e temvünie se dapetuo, puo Jihova la mu kekreiu Azazel la.

⁹ Mu Aron-e Jihova za nu parkelie temvüu pie kephouma ruosuo la khashütuo;

¹⁰ derei Azazel za nu parkelie temvüu we pie perhei Jihova mhodzünu khashü di süu geinu puo ruotho chütuo, perhei puo peta pie rayha nu shüwaketuo la.

¹¹ Aron-e thudo-u pie puo thuo puo la kephouma ruosuo khashütuo, sidi puo la mu puo kinumiako la ruotho chütuo, puoe puo kephouma ruosuo la thudo-u dukhrituo.

¹² Tsiu puoe Jihova mhodzünu keba ruosuobau nu mizhü ketu kethengu kethekhou ketshu puo, siro getshiekewa kethengu puore kevi puo dzienie ketshu selie di süu pie keyapfheu sietsa lerlietuo,

¹³ di kethenguu pie Jihova mhodzünu theshütuo, kethengu mikhuu thuo dietseidiekhokelie bau gei keba ngukemezhie bau whelie di puo bu sia molieketuo la;

¹⁴ mu puoe thudo-u zie huoyo pielie di puo dziekinuo se kegepie ngukemezhie bau mhodzünu puo dziekinuo se va thenie kegeshütuo.

¹⁵ Süsie puoe kephouma ruosuo la themiako ya temvüu dukhrituo, di puozie pie keyapfheu nutsa lertuo, di puo zie pie thudo-u zie pie chükecü tuoi chüshütuo, kegepie ngukemezhie bau gei mu puo mhodzünu votuo;

¹⁶ hamhie di puoe kemesa thechüu la ruotho chütuo; Israelmia gei mesa kemoko la, siro uko kephoumako la; sidi puoe rüsuopfhekiu, mesa kemoko donu rei uko ze bayakecüu la hakemhie chütuo.

¹⁷ Puoe puo thuo puo la, puo kikruko mu Israel mechükehou chü kemesatuoü kemesachüu nu kele nunu vo la par kemochie kehou pfhekiu nu mia puo bu rei balie lho.

¹⁸ Sitse puoe Jihova mhodzünu keba ruosuobau nu patuo, di süu la ruotho chütuo, ruosuobau la thudo-u zie huo mu temvüu zie huo pielie di ruosuobau khie puo kia kebako gei kenheshütuo.

¹⁹ Mu puoe puo dziekinuo pie thezieu huo kegepie va thenie sügei shütuo, di Israelko mesa kemo nunu chü kemesa mu chü peviwatuo.

²⁰ Puoe kemesa chüu la, rüsuopfhekiu la mu ruosuobau la ruotho chü tseiwa tse puoe temvü kerheiu khashütuo.

²¹ Aron-e puo dzienie pie temvü kerheiu tsü gei shü di Israelko kephouma pete, uko thezho varhuokewa pete, mu uko kejokemou pete phrapie puo tsü gei shütuo, sidi süu la dojüse kebau bu ze vo rayha nu shüwatuo.

²² Temvüue uko kejoko pete pie puo gei shülie di toupfü thechü mekrikrükecü puo nu votatuo; mu puoe temvüu bu rayha nu votatuo.

²³ Sitse Aron-e rüsuopfhekiu nu vortuo, di puoe kemesachüu nu kevo ki linen pfhenei keseko rhuopie sünu zhüwatuo,

²⁴ puoe kemesa chü nunu dzürüluwa di puo pfheneiko selie, di partuo, siro puo la tsiu puo themiako la puoe kethe ruosuou khashütuo, sidi puo la mu puo themiako la ruotho puo chütuo.

²⁵ Puoe kephouma ruosuou chüshuoko ruosuobau geinu the pekhushütuo.

²⁶ Temvüu ketsepie Azazel tsükewa themiau rei puo pfhenei menyiwa mu dzürüluwatuo, sidi kenuotsa razhüchüu nu la vorlie vitatuo.

²⁷ Kephouma ruosuo kechü thudo-u mu temvüu zie toupie kemesa chüu nu ler di ruotho chükewa sie, unie zhü, unie chü mu unie buo se razhüchüu casie pra di mi pie thewatuo.

²⁸ Mu süko se vo thekeshüue puo pfhe menyi mu dzürüluwa di süsie razhüchüu nu la vorlie vitatuo.

²⁹ Mu hau nie la kechachie zho puo chütatuo, khrü thenieu nu, zha ker nhie, nie-e nie kenyütuo, mu nie mhapuorei chülie lho, khenu kelhouu rei morei solhimia nie donu lhou kebamia rei.

³⁰ Kekreilamonyü teisozha hanhie nie chü kemesaketuo la nie la ruotho chütuo; nie kephouma pete nu Jihova mhodzü mesalieketuo la.

³¹ Süu nie la sabat zha pecü se di rüleituo. Nie-e nie kenyütuo; süu kechachie la thezho puota zo.

³² Mia puoe puo puo sou nu zievo chütuo üdi kenhelie mu chü kemesalieta ro, kemesa linen pfheneiko selie di nie ruotho chütuo.

³³ Puoe kemesachü mu rüsuopfhekiu mu ruosuobau chü kemesatuo, mu puoe zievoko mu kehou keba themiako pete la ruotho chütuo.

³⁴ Mu hau nie la kechachie zho puo chütuo, teicie nu va puo Israelko kephouma la ruotho chütuo. Mu Mosae Jihova diekhakeshü tuoi chülie.