Levimiako 15 - Angami Naga CL (Re-edited) Bible (BSI)

Umo geinu Kerhu Keparko Mesa Kemo

¹ Jihovae Mosa mu Aron unie ki:

² Israelmiako ki pushücie: Mia puoe puo mo geinu zu kepar huo nyi ro, zu kepar süu la puoe mesa motatuo.

³ Mu zu kepar mesakemo-u la thezho-u hauha: Puo mo geinu zu kepar ze di kru shierei, morei puo mo nu zu par sa mota rei, süu puo la mesa mote.

⁴ Puo gei zu kebau thezhü kehoupuo gei zhü ro, süu mesa motatuo, mu puoe bakewa kehoupuorei mesa motatuo.

⁵ Mu kehoupuorei puozhü kebieu puo pfhenei menyiwatuo, tsiu dzü rülutuo, di thevatie ketso mesa mo batuo.

⁶ Mu puo geinu zu kepar-ue bawaketau gei kehoupuorei ba ro puo pfhenei menyituo mu dzü rei rülutuo, sidi thevatie ketso mesa mo batatuo.

⁷ Mu kehoupuorei puo gei zu kebau mo bie ro puo pfhenei menyituo mu dzü rülutuo, di thevatie ketso mesa mo batatuo.

⁸ Siro puo gei zu kebau mhitsiepie kemesamia puo va ro, puoe puo pfhenei menyituo, mu dzü rülutuo, di thevatie ketso mesa mo batatuo.

⁹ Puo gei kru kebau kierbakhra puo gei bawa ro süu mesa motatuo.

¹⁰ Mu puo khro keba mhanya kehoupuorei kebiemia mesa mo ba thevatie tsotuo; siro mha sikecü toupiekecüu puo pfhenei menyituo, mu dzü rülutuo, di thevatie ketso mesa mo batatuo.

¹¹ Puo gei zu kebaue puo dzie metei mo di mia puo bie ro süu puo pfhenei menyituo mu dzü rülutuo, di thevatie ketso mesa mo batuo.

¹² Siro puo gei zu kebau rünyoli puo bie ro süu biephrowatuo; seikhou kehoupuorei dzü nunu keshütuo.

¹³ Siro puo gei zu kebaue zu kepar nunu puo chü kemesalieta ro, puo thuo puo chü kemesakecü la zha thenie phrülietuo, di puo pfhenei menyiwatuo; mu dzüsa rülutuo di mesatatuo.

¹⁴ Mu zha thetha nhie puo mekhru kenie moro paruonuo kenie pielie di Jihova mhodzü rüsuopfhekiu kikha nu vortuo, di pie zievo-u tsüshütuo;

¹⁵ zievo-ue puo pie kephouma ruosuo siro puo pie kethe ruosuo la khashütuo; mu zievo-ue puo geinu zu kepar-u la ruotho chüshütuo.

¹⁶ Siro mia puoe puo phoudzü peprashü ro, puoe puo mo pete khrütuo, di thevatie ketso mesa mo batuo.

¹⁷ Siro pfhe morei chüzhü üse kechü kehoupuorei puo phoudzü pie vakewau menyituo, di thevatie ketso mesa mo batuo.

¹⁸ Mia puoe thenumiapfü puo zezhü di puo phoudzü peprashü ro, unie kenienie dzü rülutuo, di thevatie ketso mesa mo batatuo.

¹⁹ Thenumiapfü puoe thezie kru siro süue puo geinu prakecü lhenu zho ki zo ro, hapfüe zha thenie mesa mo batuo, mu kehoupuorei hapfü kebieu mesa mo ba thevatie tsotuo.

²⁰ Puoe mesa mo keba teiki mhakehoupuo gei rei zhü ro süu mesa motatuo, mhakehoupuo gei rei bakewau mesa motatuo.

²¹ Kehoupuorei puo zhü kebieu mesa motatuo. Puo dzü rülutuo, di thevatie ketso mesa mo batuo.

²² Kehoupuorei hapfü bawaketau bie ro, puo pfhenei menyituo, mu dzü rülutuo, di thevatie ketso mesa mo batuo.

²³ Puoe puo gei bakecüu, thezhü shierei, mha kekrei kehoupuorei hapfü biekewau mesa mo ba thevatie tsotuo.

²⁴ Siro thepfumia puo hapfü zezhü, tsiu hapfü kerhu puo gei pfüta ro, puoe zha thenie mesa mo batuo; mu puoe thezhü gei zhükecüu mesa motatuo.

²⁵ Thenumiapfü puoe mhasekeba ki zo mo di zha kekra thezie kru bata, morei puo mha sekecü tei keyie di thezie kru bata ro, puoe thezie kru keba teisozha pete mesa mo batuo; puo mha sekecü ki tuoi, puoe mesa motaü zotuo.

²⁶ Puoe thezie kru keba teisozhako tsiu puo gei zhükecü thezhüu, puo mha sekecü ki zhüu tuoi zotuo, mu puo gei keba khe mesa motatuo. Puoe mha sekecü ki mesa kemo tuoi,

²⁷ kehoupuorei mha hako kebieu mesa motatuo, di puo pfhenei menyituo, mu dzü rülutuo, di thevatie ketso mesa mo batuo.

²⁸ Derei puoe thezie krukecü nunu mesata ro, puo thuo puo la zha thenie phrütuo. Mu süsie mesatatuo.

²⁹ Zha thetha nhie puoe mekhru kenie morei paruonuo kenie se rüsuopfhekiu kikha nu zievo-u ki vortuo. Mu zievo-ue puo pie kephouma ruosuo la mu kekreiu pie kethe ruosuo la khashütuo;

³⁰ Mu zievo-ue puo pie kephouma ruosuo la mu kekreiu pie kethe ruosuo la khashütuo; zievo-ue mesa kemo puo geinu prakecü la Jihova mhodzünu puo ruotho chütuo.

³¹ Hamhie di nie Israelmia uko mesa kemo nunu kha kreipie balietuo, uko bu rüsuopfhekiu u donu bakecüu perhuwa di siata molieketuo la.

³² Mia puo puo geinu zukecüu la mu puo phoudzü pepra di mesa moketau la.

³³ Mu miapfü puo mha se di mhachü kebapfü la süusü, thepfumia rei thenumia rei u geinu zukecü nyiyakezhamia la, mu thenumiapfü puo mesa mo ba di puo zezhükecüu la thezho sü hau zo.