Levimiako 14 - Angami Naga CL (Re-edited) Bible (BSI)

Mpa Kechümia Ki Chü Kemesakecü

¹ Jihovae Mosa ki:

² Mpa kechü chü kemesakecü zha nhie la thezho-u hau zo. Puo ze zievo-u ki vortuo;

³ mu zievo-ue razhüchü nunu pratuo, di zievo-ue puo mehotuo.

⁴ Sidi mpa kechüu vilie di mesata ro, puo chü kemesaketuo zasi la zievo-ue puo bu pera kemesa kerhei kenie, sedar sei, kelo kemerie mu hisop se vornushütuo;

⁵ zievo-ue uko bu dzübou puo nu dzüsa keba mho geinu peranie puo dukhrilie nu shütuo.

⁶ Puoe pera kerheiu sa, süsie sedarsei, kelo kemerie, mu hisop sa, di süko pie dzüsa mho geinu dukhrikelie perau zie nu seshütuo;

⁷ sidi puoe va thenie süu kegepie mpa kechü nunu chü kemesatuoü kebau vatuo; süsie, puoe puo üse mesataü pushütuo, mu pera kerheiu khapie phouyo nu shüwatuo.

⁸ Tsiu puo chü kemesatuoü kevor-u bu puo pfhenei menyiwatuo, tsiu puomie pete thiewa mu dzürüluwa di mesatatuo, süsie puoe razhüchüu nu vortuo derei zha thenie puo bu pfheki chazou batuo.

⁹ Sidi zha thenie nhie puo tsütha pete thiewatuo; puo tiemie mu puo mhimie tsiu puomie pete thiewatuo; sidi puoe puo pfhenei menyiwa, di dzü nunu puo mo khrüwatuo, di puoe mesatatuo.

¹⁰ Zha thetha nhie puoe tekuochü ciewa kemo kenie mu cie puo kuonuo puoü kemesa puo, siro ruosuo thou kevitho efa ker-zase tier sa kereilie mu tier pou puo pielietuo.

¹¹ Mu puo chü kemesakecü zievo-ue chü kemesaketuo themiau mu mha hako pie rüsuopfhekiu kikha ki Jihova mhodzünu shütuo.

¹² Mu zievo-ue tekuochü yopuo pielie di kejo ruotho la tier pou huo sa di khashütuo, sidi pie sie kegekecü ruosuo la Jihova mhodzünu sünie piesieshütuo;

¹³ puoe kephouma ruosuo mu kethe ruosuo dukhriyakecü kemesa chüu nunu tekuo dukhrituo, kejo ruosuou sü kephouma ruosuo tuoi, zievo-u vie zocü la, süu mesatho zo.

¹⁴ Zievo-ue kejo ruosuou zie huoyo pielietuo, sidi pie puo chü kemesatuoü kevor-u nyietshe puo zatsa, puo dziekrü thezatsa mu puo phikrü thezatsa kenheshütuo.

¹⁵ Siro zievo-ue tier pou puo pielie di rupie puo thuo puo dziezhü thevitsa shülietuo,

¹⁶ di puo dziekinuo puo zatsa pie puo vitsa keba tier-u kethulietuo, sidi puo dziekinuo pie tier huoyo bielie di va thenie kegepie Jihova mhodzünu shütuo.

¹⁷ Mu zievo-ue puo dzie nu tier peshapie keba huoyo bielie di pie chü kemesatuoü kevor-u nyietshe thezatsa, puo dziekrü thezatsa mu puo phikrü thezatsa kenheshütuo, kejo ruosuo zieu mho gei shütuo.

¹⁸ Siro zievo-u dzie nu peshakelie tier-u puo chü kemesatuoü kevor-u tsügei rushütuo. Süsie zievo-ue puo la Jihova mhodzünu ruotho chüshütuo.

¹⁹ Mesa kemo nunu puo chü kemesaketuo la zievo-ue kephouma ruosuou khashü di puo la ruotho chüshütuo mu kenuotsa puoe kethe ruosuou dukhrituo.

²⁰ Mu kenuotsa puo kethe ruosuou dukhrituo. Siro zievo-ue kethe ruosuo mu lhacülhale ruosuou pie ruosuoba gei shütuo. Hamhie di zievo-ue puo la ruotho chütuo, di puo mesatatuo.

²¹ Derei puoe mhajü di mha süde khashü re ro, puoe puo ruotho chüketuo la tekuochü yopuo pfhülietuo, kejo ruosuo chü di pie sie kegeketuo la, siro thou kevitho efa ker-zapuo tier sa di kereipie lhacülhale ruosuo chüketuo la, mu tier pou puo satuo;

²² siro mekhru kenie morei paruonuo kenie rei sa, puo chülie kevi le di, puo kephouma ruosuo la mu kekreiu kethe ruosuo la.

²³ Sidi zha thetha nhie puoe puo chü kemesaketuo la süko se zievo-u ki vortuo, rüsuopfhekiu kikha ki Jihova mhodzünu;

²⁴ zievo-ue kejo ruosuo tekuonuou mu tier pou puo pielietuo, sidi zievo-ue pie sie kegekecü ruosuo la Jihova mhodzünu piesieshütuo.

²⁵ Sitse puoe kejo ruosuo kuonuou dukhrilietuo, siro zievo-ue kejo ruosuou zie huoyo pielie di puo chü kemesatuoü kevor-u nyietshe puo zatsa, puo dziekrü puo zatsa, mu puo phikrü puo zatsa vashütuo.

²⁶ Siro zievo-ue tier huo rupie puo thuo puo dziezhü thevitsa shülietuo;

²⁷ di puo dziekinuo puo zatsa pie puo dzie thevitsa keba tier-u huo bielie di va thenie kegepie Jihova mhodzünu shütuo;

²⁸ zievo-ue puo dzie nu keba tier huo pie puo chü kemesatuoü kevor-u nyietshe puo zatsa, puo dziekrü thezatsa mu puo phikrü puo zatsa shütuo, kejo ruosuo zieu pie kenhekeshü chüu nu,

²⁹ zievo-u dzie nu tier pesha kebako pie chü kemesatuoü kevor-u tsü gei shütuo, Jihova mhodzünu puo ruotho chüketuo la.

³⁰ Tsiu puo chülie kevi mekhrunie morei paruonuonie,

³¹ puo pie kephouma ruosuo la siro puo pie kethe ruosuo la khashütuo, lhacülhale ruosuou sa di; mu zievo-ue chü kemesakebau la Jihova mhodzünu puo phou chü kemesakecü ruotho chüshütuo.

³² Mpa chükebau chü kemesaketuo la ruosuo khakeshü pfhü tsolie kereko la rei thezho-u sü hauha zo.

³³ Jihovae Mosa mu Aron unie ki:

³⁴ Niekoe a khapie nie tsü di nie bu nie vie chütuoü keba Kanan kijü nu vorkelie ki, mu nie vie chülieketa kijüu nu ae mpa kechü pie ki puo nu shü ro,

³⁵ ki niepuu vor di zievo-u ki, “A ki nu kechü puo baketa mhietelie,” situo.

³⁶ Sitse zievo-ue uko bu kiu kemethuoshünu di diekhashütuo, zievo-u vo di kechüu mehowaketa sie, kiu nu bakecü mha pete mesa mota üwalie kevi la; mu süsie nu zievo-e le di kiu mehotuo.

³⁷ Mu puo kechükhuu mehotuo. Sidi kechükhuu sozha gei pejoda morei meriedakecü pfü huo ngu mu süue puo sozha ki soukuokecü mhie ro,

³⁸ zievo-ue kiu nu tuo kikha ki pratatuo, sidi zha thenie kiu khawatuo.

³⁹ Mu zha thenie nhie zievo-ue la vor di mehotuo; siro kechükhuue kiu sozha gei keza vota ro,

⁴⁰ zievo-ue uko bu kechükhu keba ketsieko biewa di kelhoupie nadiu casie thechü mesa kemonu shüwanu di diekhashütuo;

⁴¹ puoe mia bu kiu nu lutsahatsa mewewatuo, mu kinyhü mewekeshüko lapie nadiu casie thechü mesa kemonu shüwatuo;

⁴² sitse ukoe ketsie kekrei pie vor di ketsie luko tha nu shüwatuo, mu puoe kinyhü kekrei pielie di kiu nyhüshütuo.

⁴³ Ketsieko biewa siro kiu mewewa mu nyhüwaketa sie rei kechükhuu la parta ro,

⁴⁴ zievo-ue vo di mehotuo; mu kechükhuu keza vota ro, kiu nu kechü kemhie puo bate, süu mesa mote.

⁴⁵ Siro puoe kiu rhuowanutuo, ketsieko mu seiko tsiu ki nyhükeshü pete lawatuo, sidi süko pie nadiu cie vo thechü mesa kemo puo nu shüwatuo.

⁴⁶ Sizomonyü kiu khapie keba ki sünu keleu thevatie ketso mesa mo batuo;

⁴⁷ tsiu kiu nu kezhüu puo pfhenei menyiwatuo mu kiu nunu mhakecüu puo pfhenei menyiwatuo.

⁴⁸ Derei zievo-u vor meho di kiu nyhükewa sie kechükhuu keza sa mota ro, zievo-ue kiu mesataücü pushütuo, kechüu mesaketa la.

⁴⁹ Mu puoe kiu chü kemesaketuo la pera kenie selietuo, sedar sei mu kelo kemerie tsiu hisop nha sa di.

⁵⁰ Sidi rünyoli puo nu dzüsa keba mho nu pera puo dukhrilietuo,

⁵¹ süsie sedar sei, hisop nha siro kelo kemerieko pie pera kerheiu sa di pera dukhrikewau zie nu mu dzüsau nu setuo, sidi süu pie va thenie kiu vatuo.

⁵² Hai di puoe perau zie siro dzüsau, pera kerheiu, sedar sei tsiu hisop nha mu mha kemerie pie kiu chü kemesatuo.

⁵³ Mu puoe pera kerheiu khapie nadiu cie pra phouyo nu shüwatuo; sidi puoe kiu chü kemesawatuo, di süu mesatatuo.

⁵⁴ Mpakechümia kehoupuo la shierei thezho-u sü hau zo; kemeso puo la,

⁵⁵ pfhemenei gei morei ki puo nu mpa kechü kemhie baketako la.

⁵⁶ Mu kerümie morei kepou morei puopfü puo la,

⁵⁷ kikecükipuo mesa mota mu kikecükipuo mesate shikecü pekieshüketuo la. Mpa la thezho-u sü hau zo.