Levimiako 11 - Angami Naga CL (Re-edited) Bible (BSI)

Kemesa mu Mesa Kemo Kecücako

¹ Jihovae Mosa mu Aron unie ki:

² Israelmiako ki pushücie: Kijü gei nhachü ketuoko donu nie-e khunuo rhei ketuo hako cülie vi.

³ Khunuoko donu puomou pro di puo ca shuokecü pete nie-e cülie vi.

⁴ Derei puo ca shuokecüko morei puomou procüko donu, nie hako cülie lho: ut-e puo ca shuoya, derei puomou pro mo, süla nie la mesa mo.

⁵ Siro konuo, puo ca shuoya, derei puomou pro mo, süla nie la mesa mo.

⁶ Zogazu, puo ca shuoya, derei puomou pro mocü la, nie la mesa mo.

⁷ Siro thevo puomou pro mu ketsieya derei puo ca shuo mo, süla nie la mesa mo.

⁸ Nie-e süko chü cülie lho, mu uko kesiamo bielie lho, sükoe nie la mesa mo.

⁹ Nie-e hako cülie vi, dzü nu keba pete. Dzükezha nu keba puoshü mu puolhe kenyi pete, dzükezha nu morei kerü nu shierei.

¹⁰ Derei dzükezha nu morei kerü nu shierei, dzü nu kepekro morei lhouketuo kehoupuorei puoshü mu puolhe kejü khe nie la kerütse zotuo.

¹¹ Süko nieko bie kenyü, nie uko chü cülie lho, mu uko kesiamo nie la kerütse.

¹² Dzü nu keba puoshü mu puolhe kejü pete nie la kerütse.

¹³ Mu perako donu hako kerütse. Süko cülie lho; süko kerütse zo: süko tsüü, chürhaü, ketsavünho,

¹⁴ khuo tekecü mou, mouvi kekreikecü pete;

¹⁵ shüzha kekreikreicü pete;

¹⁶ ostrik, teizei rümou, dzükezha radi, rümou kekreikreicü;

¹⁷ vükhruo, kormorant, puchüü,

¹⁸ dzürapfü, kijükesia puchüü,

¹⁹ zemvüü, huniepfü kekreikreicü, buoürhü mu haho.

²⁰ Khunuo kecü puoshü chü di puo phi dia kenyi pete nie la kerütse.

²¹ Derei puoshükepfü puo phi dia kenyi khunuo kecüko donu puo phi kere nyi di puo phi se kijü gei proulieketuoko cülie vi.

²² Nie hako cülie vi: kuprie kekreikecü, pfüteo kekreikecü, nuosakrü kekreikecü, mu kusoü kekreikecü.

²³ Derei puoshükepfü khunuo kecü puo phi dia kenyi kekreiko we nie la kerütse zo.

Mesa Kemo Khunuoko

²⁴ Siro hako geinu nie mesa motatuo; kehoupuorei uko kesiamo bie ro thevatie ketso mesa mo batuo.

²⁵ Mu kehoupuorei uko kesiamo biekecümia puo pfheneiko menyiwa di thevatie ketso mesa mo batuo.

²⁶ Khunuo kehoupuorei puomou pro derei puo phi pro mo morei puo ca shuo kemo-u nie la mesa mo; kehoupuorei süko kebieu mesa motatuo.

²⁷ Mu puo phi dia se cha tuoyakecü khunuoko donu puo phizhü pie tuoyakecü pete, nie la mesa mo; kehoupuorei uko kesiamo biekecüu thevatie ketso mesa motatuo,

²⁸ mu kehoupuorei uko kesiamo biekecüu puo pfhenei menyiwa di thevatie ketso mesa mo batuo; süko nie la mesa mo.

²⁹ Siro kijü gei khunuo gou tuoyakecü hakoha nie la mesa mo: zogazu, thezu, tephou kekreikecü,

³⁰ kipfhenuo, keso nu khuokerie, teile, huoca teile, mu sokru.

³¹ Hako gou tuoyakecü pete donu nie la mesa mo; uko siaketa sie uko kebiemia kehoupuorei thevatie ketso mesa mo batuo.

³² Mu uko kehoupuorei siaketa ki tetsu mhakehoupuorei va ro süu mesa motatuo, puo thuo sei pie kechü vie rei morei pfhemenei morei chüzhü rei morei likhuo rei, se mhakehoupuorei chüyakecü vie rei, süu pie dzü nu shüwa morosuo, sidi süu thevatie ketso mesa motatuo; süsie süu mesatatuo.

³³ Mu uko kehoupuorei te rünyoli puo nu tsu ro, sünu keba pete mesa motatuo, sidi nie süu biephrowatuo.

³⁴ Mu süu nu keba, kecüca cülie kevi pete, dzü puo gei kevor khe, mesa motatuo; siro li sikecü nunu par mhavakecü pete, mu dzü krielie kevi li sikecü nu keba pete mesa motatuo.

³⁵ Tsiu kesiamo kehoupuorei tetsu mhakehoupuorei va ro, süu mesa motatuo; miphu shierei, mibou shierei süu biephro babawatuo; süko mesa mote, mu nieko la mesa motatuo.

³⁶ Derei dzüluo morei dzübou zo we mesa zotuo; derei uko kesiamo kenyü khe mesa motatuo.

³⁷ Mu uko kesiamo kehoupuorei tsia prutuoü keba tsiau gei tetsu va zo rei süue mesa zotuo;

³⁸ derei tsiau dzü pie petsewa, di kesiamo kehoupuorei te sügei tsu ro, süu nie la mesa mote.

³⁹ Siro nie-e cülie kevi khunuo kehoupuorei siata üro kesiamo süu biekecüu thevatie ketso mesa motatuo,

⁴⁰ puo kesiamo cükecüu puo pfhenei menyiwa di thevatie ketso mesa mo batuo; kesiamo piekecüu puo pfhenei menyiwa di thevatie ketso mesa mo batuo.

⁴¹ Khunuo kijü mho gei gou ketuo khe nie la mesa mo; süko cülie lho.

⁴² Puo vadi se rütsieyakecü khe, phi diako pete se tuoyakecü khe, morei puophi kekra kenyi khe, gouyakecü khunuo kijü mho gou ketuo pete, nie-e cülie lho; ukoe mha kerütse zokecü la.

⁴³ Nie gouyakecü khunuo kehoupuorei pie nie perhulie lho; nie süko pie nie bie perhu di mesa mota rei silie lhocü la.

⁴⁴ Ae Jihova nie Kepenuopfü zocü la; süla nie chü kemesalie, di mesaliecie, ae mesa zocü la. Nie-e kijü mho gouyakecü puorei pie nie thuo nie bie perhulie lho.

⁴⁵ Ae nie Jihova chütuo üdi Ijipt kijü nunu nie ze parkeshü nie Kepenuopfü zokecü la; süla nie mesaliecie, ae mesa zo.

⁴⁶ Chü mu pera tsiu lhouketuo khunuo dzü nu tuoyakecü khe siro kijü gei gou tuoyakecü khunuo pete la thezho sü hau zo,

⁴⁷ mesa kemo mu kemesa, tsiu kerhei khunuo cülie kevi mu kerhei khunuo cülie kelho kho kekreishüketuo la.