Levimiako 10 - Angami Naga CL (Re-edited) Bible (BSI)

Nadab mu Abihu Unie Phoumakewa

¹ Sitse Aron nuo Nadab mu Abihu unie kethengu kethekhou unie tse selie, di mi pie sünu shülie, tsiu kethengu pie sünu shülie, di mesa kemo mi pie Jihova mhodzü khashü, puoe unie bu chünu diekhashü mo.

² Sitse Jihova mhodzü nunu mi par di unie the pejüwa, di unie Jihova mhodzü nunu siata.

³ Sitse Mosae Aron ki, “Jihova pukeshüu sü hau zo; ‘A a penuo kebako geinu, ae mesa zo ücü thashütuo, mu themia peteko mhodzünu a chü pezhashütuo,’ ” si. Ru Aron-e kemekrie bata.

⁴ Mosae Aron nieu Uziel nuonie Mishael mu Elzafan kielie di unie ki, “Penuo vorlie, di nnie siezedzürieko kemesachüu mhodzü nunu tou pie casie pratalie.”

⁵ Süla unie-e penuo vor di Mosa pukeshü tuoi unie boulie nunu uko unie toupie pra casie shüwa.

⁶ Sitse Mosae Aron tsiu puo nuonie Eliazar mu Ithamar ki, “Nie tsütha bie kenyha hie, mu nie pfhenei cierha hie, nie siata rei si momu, siro mechükehou pete gei noupfhü vorta rei si momu; derei nie siezedzürieko, Israel kinumia pete bu Jihova mi ketsepie thekewau krükraliecie.

⁷ Mu rüsuopfhekiu kikha nunu pra hiecie, nie siata rei si momu; kenhekecü Jihova tier-u n gei bakecü la.” Siro ukoe Mosa die kemhiei chülie.

⁸ Siro Jihovae Aron ki:

⁹ No mu n nuo thepfuko rei rüsuopfhekiu nu lekecü ki khubezu morei zu kekuo puorei krie hiecie, nie siata rei si momu; nie nuosenuoyie pete nu hau pie thezho puo chütuo.

¹⁰ Nie-e kenyü mu kenyü kemo-u, mesa mu mesa kemo-u si kekrei morosuo;

¹¹ mu no Jihovae Mosa geinu thezho khapie Israelmiako ki pukeshü peteko pie uko petha morosuo.

¹² Sitse Mosae Aron mu puo nuo kinu kebanie Eliazar mu Ithamar unie ki pukecü: “Jihova ki, mi nu pie ruosuo khakeshü nu thou peshapie kebau selie, di ruosuobau khieki nu khreiüshükemo süu cülie, süue mesathorcü la;

¹³ nie süu kemesa chü nunu cütuo, kekreilamonyü süue Jihova ki mi nu pie ruosuo khakeshü nu n ya mu n nuonuo ya zocü la; hakemhie di a ki diekhakeshü la.

¹⁴ Derei puokhouzü pie sie kegekecüu siro puodo khakeshüu we no thechü kemesa kehourapuo nu rei n nuo thepfu rei thenu rei ze cülie vi; kekreilamonyü Israelko vitho ruosuo khakeshü nunu süko pie n ya mu n nuonuo ya chüshüwaketa la.

¹⁵ Puodo khakeshüu siro puokhouzü piesie kegekeshüu ukoe puoshuo pie mi nu ruosuo khakeshüko sa se vortuo, sidi Jihova mhodzünu pie sie kegekecü ruosuo chü di kegetuo; mu süu n vie tsiu n nuo thepfuko vie zotuo, kechachie nieko ya chütuo; Jihovae diekhakeshü tuoi.”

¹⁶ Sitse Mosae kephouma ruosuo khakeshü temvüu dze ketso menuo sie ru harie, süu thewata! Süla puoe Aron nuo baluokecü nie Eliazar mu Ithamar unie gei puo nei mota, di pukecü,

¹⁷ “Kidi nnie kephouma la ruosuo khakeshüu kemesa thechüu nunu cülie mo ga? Süue mha kemesatho puo mu nie bu mechükehouu kejo pieu chüwaketuo la kha nie tsüshü, Jihova mhodzünu uko la ruotho chüketuo la.

¹⁸ Harie, süu zie se kemesachüu nu se ler mo ze. A diekhakeshü tuoi, nie kemesachüu nunu süu kecü mese tou zo.”

¹⁹ Sitse Aron-e Mosa ki, “Harie, thie nu ukoe kephouma ruosuo mu kethe ruosuo khapie Jihova mhodzünu shü zo; derei mha haikecü a gei vorte! A thie kephouma ruosuou cülie ro, Jihova mhinguki puotou zotuo me?”

²⁰ Ru Mosae süu sishü tse puo medota.