Levimiako 1 - Angami Naga CL (Re-edited) Bible (BSI)

Kethe Ruosuo Khakeshü

¹ Jihovae Mosa kie, mu rüsuopfhekiu nunu puo ki pu di sie:

² Israelmiako ki pu di uko ki haishülie: Themia kehoupuorei Jihova ki kirinuo khashü ro, u thukro morei tekuokroko donunu se vor morosuo.

³ Puoe kethe ruosuo puo khashütuo üdi thukro nunu se vor ro, pedo ciekemo puo tuo, puoe rüsuopfhekiu kikha kinu süu khashütuo, Jihova mhodzü puoe lieliekesü chüketuo la;

⁴ puoe puo dzie pie kethe ruosuo khakeshüu tsü gei shütuo mu süu puo la kejo vakelie puo chü di lielietuo.

⁵ Sitse puoe Jihova mhodzünu thudo-u dukhrilietuo; mu Aron nuo zievokoe puo zie pielie di kegepie rüsuopfhekiu kikha ki keba ruosuobau puoke pete vashütuo.

⁶ Mu puoe kethe ruosuo la khakeshüu zhü lolie di süu khrie petselietuo;

⁷ Aron zievo-u nuonuoko ruosuobau gei mi chüshütuo, siro sei pie menuo di mi mhogei khashütuo;

⁸ Aron nuo zievokoe chükhrieko, puotsüu, tsiu puoshuo pie ruosuobau gei mi nu seiko mho gei khashütuo;

⁹ derei dzü pie puo rieko mu puo phiko khrüwatuo; sidi zievo-u süko pete ruosuobau geinu thewatuo, kethe ruosuo mi nunu khakeshü puo chü di, Jihova mhodzüki puore kethengu puo chütuo.

¹⁰ Puoe kethe ruosuo la tekuo morei temvü kro nunu khashü ro, puoe puochü ciekemo puo khashütuo.

¹¹ Puoe ruosuobau tsei pesotsa, Jihova mhodzü nunu süu dukhrituo, mu Aron nuo zievokoe puo zie kegepie ruosuobau khie lutsahatsa vashütuo.

¹² Mu puoe süu khrie petselietuo, puo tsü tsiu puo shuo sa di, sidi zievokoe süko pie ruosuobau gei miu mhogei seiko gei shülietuo;

¹³ derei puorieko mu puophiko dzü pie khrüwatuo süu kethe ruosuo puo; sidi zievo-u bu ruosuobau geinu themo pete thepie mikhu chüwatuo; süu kethe ruosuo, mi nunu pie ruosuo khakeshü, Jihova ki puore kethengu puo.

¹⁴ Puoe Jihova ki pera pie kethe ruosuo khakeshü puo chü üro, puoe mekhru morei paruonuo se vor khashütuo.

¹⁵ Zievo-ue süu se ruosuobau gei vortuo, sidi puo tsü kereithepie ruosuobau geinu süu thetuo; mu puozie pezupie ruosuobau tseitsatie shüwatuo.

¹⁶ Puoe puovopho mu puorieko kelhoupie ruosuobau tsei niathutsa, mige ba nu shüwatuo;

¹⁷ puoe puoshü ciekhoushütuo, derei ciethewalie lho. Tsiu zievo-ue süu pie ruosuobau geinu thepie mikhu chüwatuo, miu nu sei mho geinu; süu pie kethe ruosuo puo mu mi nunu se ruosuo khakeshü puo chü di, Jihova mhodzüki puore kethengu puo chütuo.