Korintmiako Kerieu 8 - Angami Naga CL (Re-edited) Bible (BSI)

Kecüca pie Terhuo Rüsuokewa Kecü Dze

¹ Siro mha pie terhuorhiko rüsuokewa dze ro we sikecü, “Úko pete rei mhasi ba phre,” iya. Sirei mhasi-e komethuo tuoya, derei kekhrie-e mhachü pevishüya.

² Kehoupuorei puo thuo puoü mhasi üta ro, puo si kezhüko silie mo zoluo;

³ derei kehoupuorei Ukepenuopfü khrieyakezhau puo bu puo silieya.

⁴ Süla pie terhuorhiko rüsuokewa kecücako kecü dze we, “Kijü nu terhuorhi-e ketho puorei jü;” mu “Ukepenuopfü puo rübei sie kekrei jü” zocü we si ba zo.

⁵ Siro terhuomia üdi puyakezha teigei morei kijü gei tuo ürei, mu terhuomiako mu niepuko idi puyakezha kekra tuo ürei,

⁶ úko la zowe Ukepenuopfü, u Puou rübei zo, puo geinu mha pete par mu we rhei tuoyakezha zo, mu Niepu sü puo rübei, süu Jisu Khrista, puo geinu mha pete chülie mu we puo la rhei tuoyakezha zo.

⁷ Siro mia pete rei mhasi hau nyi phre mo. Huomia vor thie ha ketso rei terhuorhi dze le u zho chü vorketa ki ze, mha pie terhuorhiko rüsuokewa kecücako kecü ki uko süko üse terhuorhiu vie nhiecü le baya; ukoe u kele thachü ba zoluo, süla süu üse rhute nhie itaya.

⁸ “Kecücae u ze Ukepenuopfü penuoshülie kenjü.” Siro we süu cü mo zorei mhapuorei kataya mo, mu we süu cü zorei mhapuorei vi kreilieya mo.

⁹ Derei nie thuo nie medo chülie kevi süu pie kepele kethachümia phi kemesü chüwa molieketuo la nie terüchüliecie.

¹⁰ Mhanuü, puo kepele kethachü puoe no mhasi nyita üdi vo terhuorhi rüsuokiu nunu mhacü keba ngu ro; süu chü kethepfupie puo bu mha pie terhuorhiko rüsuokewa cako rei cüta lho üme?

¹¹ Süla n mhasiu la puo kepele kethachüu, Khristae puo la siakeshü n siezeu bu katatuo.

¹² Sidi no u kepele kethachü nie siezeko chü pesuo di nie phoumakeshü geinu Khrista gei rei phoumatatuo.

¹³ Süla kecüca puo la a siezeu bu tetsutatuo üro, a siezeu bu tetsuta molieketuo la, a mhakipuorei themuo rei cülie lhote.