Biblia Todo Logo
Bìoball air-loidhne

- Sanasan -

Korintmiako Kerieu 7 - Angami Naga CL (Re-edited) Bible (BSI)


Kishükiya Dze

1 Siro tsie niekoe leshü thupie ketsokeshü dze kelashüzhie: “Thepfumia bu thenumia nyü mo zorei puotou.”

2 Derei pierüü chüketa keprei la, thepfumia bu puo kimia nyi phrelie, mu thenumia bu rei puo nupfunuo nyi phrelie.

3 Mianupfunuo bu puo kimia gei chü kezhüu chü tseishülie, mu sütuoi mianupfünuo bu rei puo nupfu gei sükemhie chülie.

4 Kekreilamonyü mianupfünuo kechümia puo thuo monyü puo nupfu puo mo gei niepu chüte; mu sütuoi mianupfunuo kechümia rei puo thuo monyü puo kimiae puo mo gei niepu chüte.

5 Kediezhü di puotei huoyo kecha chüketuo la zo kemosie ketherhieta hie. Nie nie kethelie mo di Satan dophi nu leta rei silie kelho la.

6 A kepuu hau chü beicie ikecü la mo, derei siro viwe icü kepu zo.

7 Themia pete bu a mhiekelie we a medo. Derei mia puopuokecü Ukepenuopfü kinu ngukelie, mia puo mhaphruo puo mu kekreiu mhaphruo kekrei puo ba phre.

8 Siro kiya kemomia mu thenu samimia bu we a mhie keba puotou zocü a puya.

9 Derei uko u kethekerelie lhotuo liro uko bu kiyalie. Kekreilamonyü u kethekerelie lho di meyhumezhie kebau ki rei kiyakelieu we vikuo.

10 Derei kiyaketako la zowe a thuo zomonyü Niepuu thuo hau pushü zo, mianupfünuo bu puo nupfu khawa suo;

11 (derei puoe puo nupfu khawata ro, puo bu puo rübei batalie moro puo nupfu ze kemezhü chü lalie) mu mianupfunuo rei puo kimia vawa suo.

12 Kekreiko ki ro, hau Niepuu kinu mo, derei a die zo, mhanuü kepelemia puoe puo kimia pelekemomiapfü, mu süpfüe puo ze lhou ba zoketuo puo medota ro, puo bu süpfü khawa hie.

13 Tsiu kepelemiapfü puoe puo nupfu pelekemomia rei puo nupfu puo ze lhou ba zoketuo puo medota ro, puo bu puo nupfu khawa hie.

14 Kekreilamonyü pele kemo nupfuue puo kimiapfü la mesaliete, mu pelekemopfü rei puo nupfu la mesalieta zo. Si kemo we unie nuonuoko mesa motatuoweü, tsie we uko rei mesate.

15 Unie pelekemo-u thuo puo khawa nyüta ro, sü chülie vi zo; mu haikecüko nu u zeu morei u zepfü phakecü tuo mo. Ukepenuopfüe kezekevi nu nie kiekelie zo.

16 Siro mianupfünuoko, nie si ba, nie-e nie nupfunuo kelalie rei si mo. Mianupfunuoko, nie pete si ba, nie-e nie nupfünuo kelalie rei si mo.


Ukepenuopfü U Kiekelie Mhie di Lhoulie

17 Themia kehoupuo bu rei Niepuue khapie u ketsüu se di Ukepenuopfüe puo kiekelie ki mhiei lhou zoliecie. Kehou pete la a zho-u sü hau zo.

18 Mia huo u zhürepfü tuo di kielie me? Sümia bu zhürekemomia chü la hie. Huomia süteiki u zhürekemo nu tuo di kielie me? Sümia bu u zhüreketuo le hie.

19 Zhükere rei mhapuo mo, mu zhürekemo rei mhapuo mo; derei Ukepenuopfü diekhakeshüko zekelie-e mha peteu zo.

20 Kehoupuo bu rei puo kiekelie ki kedipuo mhie tuo di kielie shiü puo bu sünu tuo zolie.

21 N kiekelie ki no miadie chütuo me? Süu la n nou kemezhie hie. N phreishülie vita zorei, tsie n thau se mhachülie kevi de chülie.

22 Kekreilamonyü kehoupuorei thiedzü miadie chütuo di puo kiepie Niepuu kitsa shükelieu, themia süu Niepuu kitsa puo kekha kejümiata zo, sütuoi kehoupuorei miadie chü mo tuo di puo kiekelieu, puo Khrista die chüta zo.

23 Puoma chü di nie khrüliete; nieko themia die chü lata hiecie.

24 A zenuoko, nie kehoupuorei kedipuo chü tuo di nie kielie shiü süu nu Ukepenuopfü ze tuo zolie.


Kiya Kemomia mu Samipfüko Dze

25 Siro phousemia dze la ro, a Niepuu kinu khakeshü die puo rei ngulie mo, derei a rei Niepuu kinu ngukemezhie ngukeliemia puocü la a keleu thushüya mu pelelie kesü die zo.

26 Siro nieko tsie kemezhie kebatsa lesie ro, mia puoe kimhie ba shiü puo bu sünu bata rei vi zotuo.

27 No n kimia bate me? Siüro kevaketuo le hie. No kiya moluo me? Kiyaketuo le hie.

28 Derei no kiyalie zorei, süu la phoumata mo, mu rüü phousepfü nyhüta zorei süu la phoumata mo. Derei kiyakeliemia kelhou hau nu kemezhie zotuo, süla a nie bu süu therhielie ro a nei zotuo.

29 A siezedzürieko, a die ro hauha, puotei rhiekeshüu ba kra mote; süla tsie yawinu u nupfünuo kenyimia bu ba kemomia mhie batalie,

30 tsiu krayakezhako bu rei kraya kemoko mhie batalie, mu u neiyakezhako bu rei u neiya kemo mhie batalie, mha khrüyakezhako bu rei u vie kejümia mhie batalie.

31 Kijü hau la mereiyakezhako bu rei merei moketako mhie batalie. Kekreilamonyü kijü nu tsiedo rüliko jütatuo üzhücü la.

32 A nieko bu nie nou rüü bakecü a nei. Kiya kemomia puoe Niepuu kitsa mhatho-u le puo nounyü baya, puoe kimhie ro Niepuu nei chülietuo shicü leya.

33 Derei kiyaketamia puoe kijü nu rüliko le kenounyü bataya, puoe kimhie ro puo kimia nei chülietie shicü leya;

34 sidi puo lutsahatsa letaya. Siro kiya kemopfü mu phousepfü puoe Niepuu mhatho-u la puo nounyüya, sidi puoe puo mo-u tsiu puo ruopfü kitsa rei mesatuolieketuo la; derei kiyaketapfüe kijü nu rüliko le kenounyüya, puo kimhie ro puo nupfu nei chülietie shicü leya.

35 A die hau pukecü nieko kemevi la kepu zo, a nieko kekha tsawaketuo la pu mo, derei nieko bu lhou puotou chü mu nie kenyha mo zo di nie kha tseipie Niepuu tsülieketuo la zo.

36 Mia puoe puo zepfü gei kemengu la puo thuo puo zho puo rüli puotou motaü le ro, mu puo mengu rethorta, si morosuota, siliro puo bu thenupfü lielie, süu kephouma mo. Unie bu keritalie.

37 Derei mia puoe puo pepikelie nu metei thalie, puo menguko kekhalie, di süpfü bu puo zepfü chü ba zotuo üdi pepilieta üro, puo vi zo.

38 Siro mia puoe rüüpfü lielie rei vi zo, derei kiya moro mhachü vikuotuo.

39 Mianupfünuokoe puo nupfu rhei keba chie puo phase bate. Derei puo nupfu siata ro, süsie puo thuo puo medo-u ki nyi lalie vite, derei Niepuu nunu zo morosuo.

40 Derei a keleu ro, puo nyhü mo ba ro thejapfükuotuo. Mu a Ukepenuopfü Ruopfüu a nou bakecü leya.

The Bible Society of India

© 2023, Used by permission. All rights reserved. More

Bible Society of India
Lean sinn:



Sanasan