Korintmiako Kerieu 6 - Angami Naga CL (Re-edited) Bible (BSI)

Dienya Se Pelekemomia Mhodzünu Kevo

¹ Nieko huomianie huomia gei panyakecü puo ba di süu se kemesako ki vo mo di miatho kemoko ki vo di kenyakecü michie mo me?

² Kemesako bu kijüu nyie pepituo ücü nieko si mo me? Siro nieko bu kijüu nyie thuo rei pepituo üro, nieko mha kecükerüko pepilie lhote me?

³ Tsiedo kelhou ki rüliko monyü u bu teigeidielieko nyie thuo rei pepituo ükecü, nieko si mo me?

⁴ Mhanuü nieko donu mhakecükerü huo sierta ro, kehouu nu u thakejümia kedapie u bu dienya kecütuo me?

⁵ Nieko bu mengalieketuo la a hau pushüya. Ka, nieko donu puo mhasi nyi di kepelemia donu dienya pepilieketuo puorei ba mote me?

⁶ Sidi kepelemia puo thuo kepelemia kekrei puo petsou di dienyaki nu vota, mu süu pelekemomia puo mhodzünu sa le?

⁷ Ketho zo, nieko huoniehuo ze kenyakecü zorei nie thuo nie pekawata zo. Kiüdi kejo-u nie thuo pfülieya mo ga? Kiüdi nie kedokewau pfülieta mo ga?

⁸ Derei nieko thuo mia pese tsiu mia sekedo, mu süu kepelemia gei chüya.

⁹ Niekoe mha kesuo kechümia Ukepenuopfü kedi welie lho ükecü si mo me? Mia bu nie sewa hie! Pierüü kechümia, terhuorhi kerüsuomia, pieümia, thepfumia thuo thepfumia ze thenga kechümia, chüüphou pie u theguo chü nyüyakezhamia,

¹⁰ kerügumia, mha kemehoumia, kemezemia, miathayakezhamia, mia kechükedelieyakezhamia hako puorei Ukepenuopfü kedi welie lho.

¹¹ Nieko huomia rei thiedzü sikecümia zo. Derei tsie we nieko khrüwate, nieko chü kemesaliete, sidi Niepuu Jisu Khrista za nunu mu Ukepenuopfü Ruopfüu nunu nieko chü kemiatholiete.

Nie Mo Se Ukepenuopfü Tsheürhulie

¹² “A zowe mhakehoupuo chütuo ürei a kekha jü,” derei mha peteko nu kemevi ba phre zo mo. “A we mhakehoupuo chütuo ürei a kekha jü” derei mhapuorei bu a kekhata lho.

¹³ “Kecüca sü uvadi la zo mu uvadi rei kecüca la zo,” mu Ukepenuopfüe kenienie rei pekawatuo. Themo-u pierüü la mo, derei Niepuu la zo, mu Niepuu rei themo-u la zo.

¹⁴ Ukepenuopfü Niepuu chü perheiliete, mu puo kekuo süu pie u chü perhei lalietuo.

¹⁵ Nieko moe Khrista gei zakro puo zo ükecü nie si mo me? Siliro a Khrista gei za kro puo chüketako se vo thethenumia vie chütuo me? Suotuo zo!

¹⁶ Nieko thethenumia ze puo chüta ro unie keze mo puo chüta zo ücü si mo me? Kekreilamonyü pupie kezhü, “Unie keze chü puo chütatuo,” siya.

¹⁷ Derei mia puo Niepuu ze puo chükelie-e ruopfütsa puo ze puo chüta zo.

¹⁸ Ta pierüü therhieliecie. Kephouma kekreiko umo nunu mo di chazou nu chü pekuoya; derei pierüü kechümia puo thuo puo mo bie pesuowa di phoumataya.

¹⁹ Siro nieko moe Ukepenuopfü kinu ngukelie mu nie nou keba Kemesa Ruopfü rüsuoki ükecü nie si mo me? Mu nieko ha nie thuo nie vie mota zo.

²⁰ Kekreilamonyü mhama se nieko khrüliete; süla nie mo se di Ukepenuopfü tsheürhuliecie.