Korintmiako Kerieu 5 - Angami Naga CL (Re-edited) Bible (BSI)

Pieüpiera la Kehou Perhukewa

¹ Siro nieko donu pieüpiera kechü dze pu tuote, mu pelekemomia donu rei chüya kemo nieko dze site; mia puoe puo puo kimiapfü ze lhou bata üsi.

² Nieko kokhubou ba ze! Nieko süu la thekrü chü mo, nieko kro-u nunu haicümia whuokewa mese mo üme?

³ A tsie themo-u nu nie ze ba mo zo ürei, a nou we nieko ze ba zo; mu a nieko ze keba mhie di,

⁴ u Niepuu Jisu Khrista za nu sikecü chüyakezhamia pejoshüwate. Nieko vo kehoukengukelie ki u Niepuu Jisu Khrista kekuou ze di a nou we, nieko ze keba ki,

⁵ nieko bu themia hau khapie Satan dzie nu shü di puo chüüphou pekawanuya, sidi u Niepuu zha nhie puo ruopfü kelalieketuo la.

⁶ Nieko kemelha kebau mha kevi mo. Khrei keduo yopuo la niekhrüda date bu poulieyakezha nieko si mo me?

⁷ Nieko khrei keweu chüwaliecie, sitse nie niekhrüda kesa tou chülietuo, nie khreiüshükemoko zocü la. Kekreilamonyü úko la ciekevonyi kuonuo chü di Khrista pie ruosuo chüwate.

⁸ Süla khrei keweu, kelhiekecü tsiu mha kesuo khreiu se monyü, khreiüshükemo thenou kemezhüu mu ketho niekhrüda se di thenyiu nyi khe.

⁹ A thupie nie ki keshü nieko bu pieüpiera kechüko ze kekrotho hienushü,

¹⁰ kijü hanu pieüpiera kechümia, morei kemehoumia mu kerügumia, morei terhuorhi kerüsuomia ze kerüchü hienu zoshü mo, süu situo üro, niekoe kijü hau therhieta morosuotatuo.

¹¹ Derei a tsie nie donu kehoupuorei siezedzüriemia üdi pieüpiera chü, morei mha mehou, morei terhuorhi rüsuo, mia kechükede, meze morei rügutayakezhako ze krotho hienu thushüya. Themia sikecümia ze mhacü rei hie.

¹² A chazou ketuomia nyiekecü pie kedipuo chü ta? Nie thuo nie kro-u nu kebako nyiekecü zhü mo me?

¹³ Ukepenuopfü thuo chazou ketuoko nyie pepituo. “Nie donu kesuo chüyakezha themiau chüwalie.”