Korintmiako Kerieu 4 - Angami Naga CL (Re-edited) Bible (BSI)

Apostelko Mhatho

¹ Süla nieko hie üse Khrista kituomia ü mu Ukepenuopfü dze kesouko liethomia ükecü leliecie.

² Sizomonyü liethomiae mia bu puo pelelie kesümia morosuo.

³ Siro nieko morei mechükehoue a lepie kiü baya shikecüu we a la mha kecü puo zo. A thuo zorei a capi chüya mo.

⁴ A mhapuorei lepie a nou a pejokecü jü, derei süla üdi a mezhütaü ba mo. A ketsoyakezhau sü Niepuu thuotuo.

⁵ Süla puotei kemonu, Niepuu vor kemonu mhapuorei pecapepita hie, süze puo kezei nunu mha kepekhreko mu themia nou nu keviese ketuo nouleko hielapie kezieu nu shütuo. Süzenu kehoupuorei Ukepenuopfü kinu puoe ngulie kezhü zhapu keviu ngulietuo.

⁶ Siro a kezeko, nieko zhazhü le di mha hako pete pie a mu Apolo hienie gei rei shüshü, sidi nieko bu hienie geinu die, “Thupie kezhü zie mo,” ikecüu ca silie di nie donu mia puo bu rei kekreiu ki vikuokecü leta molieketuo la.

⁷ No kreikecü supuoe ngu ga? No mha ngulie kemo kedipuo ba ga? No süu ngulie üro kidi methuo ngulie kemo puo mhiei kemelhaya ga?

⁸ Nie nie ketshukelhuo chü bate! Nie mhanyiliete! Hie sa mo di nie kedi chüte! Ketho, nieko kedimia chülietacü we a rei a nei zotuo, silie ro hie rei nie ze kedimia chütatie!

⁹ Kekreilamonyü a nou kele ki Ukepenuopfüe thela nu hie chüpie apostelmia chükecü, kijüu mhodzünu, teigeidieliemia mu themia mhodzünu kesia siazha pie tsükewamia mhie di hie pie zasizapra chüshüta zo.

¹⁰ Khrista la hie kenyamia chüte, derei nieko we Khrista geinu mhakesimia chüliete: Hie we thachüte, derei nie we kekuomia chüte. Nieko we therhupfüte, derei hie we miathapfüte.

¹¹ Siro hieko vor tsie ketso terhü mu merü di tuo zo, pfheneikrako se siro mia bu hie vüwa mu thuselieketuo chü rei jü,

¹² tsiu hie thuo hie dzie pie mhachü di kemezhie ba zo. Mia hie kerhiekecü ki hie japie mia tsüya, mia hie pechü rei hie shügeshühie;

¹³ mia hie pu pesuo rei hie die kevi puya. Hie tsie ketso rei kijü hau nu nyopfhü kemhiei mha pete ki rei kerhutho puo chü ba.

¹⁴ A mha hako thupie nie ki keshü nieko kengashüketuo la mo, derei nieko ü a nuo a khrieko kemhie di nieko tarhoshü kenyü la zo.

¹⁵ Khrista kitsa nie kemeho mia nyie ker ba shierei nie puonuo kemhie we kekra ba mo. Ketho zo, Khrista Jisu geinu dieliekeviu la a nieko puou chüte.

¹⁶ Süla a nieko bu a dorielielienu di nieko hüshüzhie.

¹⁷ Hau la a Timothi ketsepie nieko ki shü, puoe Niepuu geinu a nuo a khrieu mu pelelie kesüuta zo, puo kehou kehourapuorei a se petha tuoyakezha Khrista Jisu geinu a medzi tuoyakezha dzeko pu di nieko bu rükra lalietuo.

¹⁸ Siro nieko huomia a üse nieko ki vor lho nhiecü le di khubou tuote.

¹⁹ Derei Niepuu medo ro, a pezi nieko ki vortuo, mu süze die pu khubou tuoyakezhako zomonyü uko kekuo kedipuo shicü a thuo silietuo.

²⁰ Kekreilamonyü Ukepenuopfü kedi we dieu mo, derei kekuo nunu zo.

²¹ Nieko kiu nie nei ta? A bu seiro se nie ki vortieya mo kekhrie nu menekecü ruopfüu tuo ga?