Korintmiako Kerieu 3 - Angami Naga CL (Re-edited) Bible (BSI)

Ukepenuopfü Liethomia

¹ Harie a siezedzürieko, a nie üse ruopfü themiamia mhiei mha pulie suote, derei nieko üse Khrista kitsa nuoranuomia tuoi chüüphou themiako mhie di mha pu morosuote.

² A nudzü se nieko vachü vor, kecüca kemetei se mo, nie kecüca kemetei cülie suokecü la. Nieko tsie rei dojüse ba mo,

³ nieko chüüphou kitsa ba zocü la. Nieko huoniehuo ngu nie ro tsiu huoniehuo ze kegei ba zocü, nieko chüüphou kitsa, mu themia zhorüli se lhou baya mo üme?

⁴ Nieko miapuonie sie, “A Paul kitsa,” mu kekreiu sie “A Apolo kitsa,” idi puketa ha nieko kijü nu mia zo mo üme?

⁵ Ka, Apolo supuo ga? Paul supuo ga? Mia kituomia zo, di nie bu unie geinu pelekelie zo, süusü Niepuu thuo pelekeshü mhatho-u kechü zo.

⁶ A leishü, Apolo dzü pie vashü, derei Ukepenuopfü thuo memiekelie chüshü.

⁷ Süla leikeshüu rei mu dzü pie vakeshüu rei mhapuo mo, derei memiekelie chükeshüe Ukepenuopfü zo.

⁸ Leikeshüu mu dzü pie vakeshüu unie mhatho puo zo, mu kehoupuorei mhachükeshüu geinu zhakhra chüpie tsütuo.

⁹ Kekreilamonyü we Ukepenuopfü kituomia, kedziese di mhachüya; nieko we Ukepenuopfü lieu, Ukepenuopfü kiu zo.

¹⁰ Ukepenuopfü ngukemezhie kha a ketsüe ki chü kesimia mhiei, di a puo mvü dzeshü, mu kekreimia huo süu geinu ki chüya. Derei kehoupuorei kimhiei di puo kiu chüya shi menuoliecie.

¹¹ Kekreilamonyü puo mvü dzepie zhüwaketau zo kemosie miapuorei puo mvü dze pekrei lalie kenjü; puo mvüdzeu sü Jisu Khrista zo.

¹² Kehoupuorei puo mvüdze süu geinu suna, rakachü, ketsie puoma kereko, sei, zoga mu rügu pie puo ki chüya ro,

¹³ ki kechümia kehoupuo mhatho rei thashütuo, Teisozha sünhie süu hielashütuo, süu mi nunu thashüketuo la, mu mi süu thuo kehoupuo mhatho rei kedipuo mhie shicü kevikesuo thashütuo.

¹⁴ Kitho kehoupuorei mvüdze süu geinu krukelieko, puo zhakhra ngulietuo.

¹⁵ Mhakinu mhatho-u thewata ro, ki kechüu ka phituo; derei ki kechüu zowe kelalietuo, sirei mi nu kevo mhie zotuo.

¹⁶ Nieko Ukepenuopfü rüsuoki zo, mu Ukepenuopfü Ruopfüu nie nou bakecü si mo zo me?

¹⁷ Kehoupuorei Ukepenuopfü rüsuokiu pekawa ro, Ukepenuopfü rei süu pekawatuo. Kekreilamonyü Ukepenuopfü rüsuokiu mesa, mu niekoe puo rüsuokiu zo.

¹⁸ Nie thuo nie sewa hiecie. Mhanuü kijü hanu nie thuo nie ü mhasiüya ro, nie mhakesimia chülieketuo la kenyamia chüliecie.

¹⁹ Kijü hau mhasi lesie ro Ukepenuopfü mhodzünu kenyamia zocü la. Süusü thupie kezhü, “Puoe mhakesiko kedodakesie ki uko telieya,”

²⁰ süsie rei, “Niepuue mhakesiko noule kemethuo zo ükecü silieya,” si.

²¹ Süla kehoupuo bu rei themia krüta se kemelha hiecie. Kekreilamonyü mha pete rei nie vie zo,

²² Paul rei, Apolo rei, Kefa rei, kijüu rei, kerhei rei, kesia rei, tsiedo rei thiesie rei pete nie vie zo,

²³ siro nie Khrista vie, mu Khristae Ukepenuopfü vie zo.