Korintmiako Kerieu 2 - Angami Naga CL (Re-edited) Bible (BSI)

Khrista Goukewa Dielie

¹ Kezeko, a nieko ki kevor ki, a Ukepenuopfü die kesou silie kere morei lelie kere mhasi die nu nieko ki pu vor mo zo.

² Kekreilamonyü a nieko donunu Jisu Khrista mu puo pie krus geinu goukewa dieu sie mha kekrei puorei si nyü tuo mo.

³ Süla a nieko ki kevor ki thachü mu michiepie pe zo di vor zo.

⁴ Siro a diepu nu tsiu mia pethakecü rei themia do themia mhasi nunu nie ki pu mo, derei Ruopfüu mu kekuou nunu tha pekiekeshü zo.

⁵ Süusü nie kepele bu themia mhasi geinu monyü Ukepenuopfü kekuou gei balieketuo la.

Ukepenuopfü Mhasi

⁶ Siüderei hie phichüketako ki we mhasi die puya, süusü kemethuo chütaketuo tsiedo kelhou teiki mhasiu mo, morei tsiedo kelhou teiki kezhako rei mo.

⁷ Derei hie Ukepenuopfü mhasi kesouu mu keviepie ketuou se puya, süu se u bu zayie chüketuo la Ukepenuopfü nnhiennhie nu kelhouko mhodzü rhüpie tuota zo.

⁸ Mu tsiedo kezhako puorei süu silie mote; kekreilamonyü uko süu si liro zapuzayie kechü Niepuu pie krus geinu goukewapfü mo zo.

⁹ Derei süusü thupie kezhü, “Umhi pie ngulie kemo, mu u nyie pie rünyülie kemo, morei themia melou nu silie kemo, Ukepenuopfü sikecüko puo khrieyakezhako la kesepie tuote.”

¹⁰ Ukepenuopfüe Ruopfüu nunu mha hako thapie hie kie phreshüte, kekreilamonyü Ruopfüue mha peteko, Ukepenuopfü dze kesouko zorei pfhülieyakezha la.

¹¹ Themia zorei puo nou keba ruopfüu zo kemosie themia donu supuonie themia rüli silieya ga? Süsü tuoi Ukepenuopfü Ruopfüu zo kemosie miapuorei Ukepenuopfü rüli silieya mo zo.

¹² Hie kijü hau ruopfüu ngulie monyü Ukepenuopfü kinu kevor Ruopfüu nguliete, süla hie Ukepenuopfüe methuo pie u tsüwaketako silie vite.

¹³ Süla hie themia mhasi nunu pethapfükelie dieko monyü Ruopfüe pethakeshü dieko se di ruopfüu nyiketako ki ruopfü dze pu mia pethaya.

¹⁴ Kehoupuorei ruopfü themia kemomia Ukepenuopfü Ruopfüu mhaphruoko ngulie kenjü, kekreilamonyü puo mhodzüki die süko üse kenya die üya, mu uko die süko ca silie kenjü, kekreilamonyü Ruopfüu nunu si kekreilie morokesuo la.

¹⁵ Sirei ruopfüu puo nou kebamia mha peteko le kekreilieya, mu miapuorei u rüli si di u pejokelie jü zo.

¹⁶ “Kekreilamonyü supuonie Niepuu nou si di puo pethalie vi ga?” Derei úko we Khrista nouu se tuote.