Korintmiako Kerieu 12 - Angami Naga CL (Re-edited) Bible (BSI)

Kemesa Ruopfü Mhaphruoko

¹ Siro a siezedzürieko, a nie bu ruopfü mhaphruoko dze si mo ba nyü mo.

² Nieko thiedzü pele kemo ki mhapuo bu nie hüse terhuorhi die pulie kemo kro puo rüsuo vorkecü si batuo.

³ Süla a nieko bu hau si nyüya, kehoupuorei Ukepenuopfü Ruopfü nunu mha puyakecü ki, “Jisu bu rüsekepfüu chü” icü puya mo, mu süsü tuoi Kemesa Ruopfü nunu zo kemosie miapuorei “Jisu sü Niepuu zo” ikecü puya mo zokecü nie bu si nyüya.

⁴ Siro mhaphruoko zowe kekreicü nyi, derei Ruopfüu we puo zo;

⁵ tsiu lietho rei kekreicü nyi, derei Niepuu we puo zo;

⁶ mu mhatho rei doneiü nyi, derei süko nu mha peteko chüyakezhau we Ukepenuopfü zo.

⁷ Derei kehoupuo bu rei se mevi relieketuo la Ruopfüue kekuo pie tsü phreshüwate.

⁸ Sidi Ruopfü süu geinu mhasi se huomia tsü, mu Ruopfü süu geinu mha kesikele die se huomia tsü.

⁹ Siro Ruopfü süu geinu kepele se huomia tsü mu Ruopfü süu geinu chü keshürhokelie kekuo se huomia tsü,

¹⁰ tsiu Ruopfü süu geinu ungomhatho chülieketuo kekuo se huomia tsü, siro siedzedie kepu mhaphruo se huomia tsü, tsiu ruopfüko si kekreilie kevi se huomia tsü, siro pfhe kekrei pulie kevi se huomia tsü mu pfhe kekrei ca pulie kevi se huomia tsü.

¹¹ Derei Ruopfü puo zokecü süu thuo puo kele mhiei di keza kekreipie mia tsü reshü di süko peteko nu mhachüya.

Themo Puo gei Zatho Kekreikreikecü

¹² Siro umo puo zo derei puo zatho kekreikreicü kekra ba, mu umo gei puo zatho kekreikreicü kekra ba rei pete kesa mo puo zokecü tuoi Khrista dze rei sü mhie zo.

¹³ Sütuoi u pete Judamia rei Grikmia rei, miadiemia rei kemomia rei, keze mo puo chüketuo la Ruopfü puo nunu dzülupfü phreliete, mu u pete bu krieketuo Ruopfü puo khashüwate.

¹⁴ Themoe za puo monyü zatho kekreicü kekra se chü.

¹⁵ Mhanuü uphi-e sie, “A thedzie kemo la, themo gei za puo mo,” isi rei themo-u gei zatho puo chü mota lho.

¹⁶ Mu unyietoe sie, “A themhi kemo la, a themo-u gei za puorei mo” isi shierei themo-u gei zatho puo chü mota lho.

¹⁷ Mhanuü themo pete u mhitatuo üro kimhie di mhapfhe silie ta? Siro themo pete bu kerünyü chüta üro kimhie di mhare silie ta?

¹⁸ Derei sita mo di Ukepenuopfü puo thuo puo medo chü zatho kekreikreicü kheko pie themo chüshüte.

¹⁹ Mhanuü pete bu zatho puo zota ro kedipuo üse themoü ta?

²⁰ Süla zatho kekra ba rei themoe puo zo.

²¹ Umhi-e sie udzie ki, “A n se morei vi” morei utsüe sie uphi ki “A n se morei vi” idi pulie kenjü.

²² Sikecüumonyü umo gei zatho thachükecü kemhieko se morosuoya,

²³ siro we mhathokemo mhie di leyakezha umo gei zathoko thuo rei rhu di rüguose tuoya, tsiu umo gei zatho kethevieko ketso kezivise tuoya,

²⁴ mu zatho keziviko we sümhie morei vi. Derei Ukepenuopfü thuo umo-u chüpie kereshü di zatho therhu ketsako bu therhupfükuoya,

²⁵ sidi umo-u bu kepfükhokecüu monyü, zatho pete bu huoniehuo la le tuolieketuo la.

²⁶ Sidi zatho puoe kemezhielie ro, zatho kekrei pete rei süu ze kemezhieya; zatho puoe therhupfü ro, zatho kekreiko pete rei süu ze u neilieya.

²⁷ Süla niekoe Khrista mo-u zo, mu mia puopuo ha süu gei za puopuo phre zo.

²⁸ Sidi Ukepenuopfüe huomia bu kehou nu apostel chü rie; kenieu huomia bu siedzekesiko chü, seu huomia bu kepethamia chü, süsie ungomhatho kechü, tsiu chü keshürhokecü mhaphruo, mia khruohikecü, morei krüta kechü, morei pfheneiü kepu khashü.

²⁹ Pete apostel phre me? Pete siedzekesimia phre me? Pete kepethamia phre me? Pete ungomhatho chükezhamia phre me?

³⁰ Pete chü keshürhokelie mhaphruo nyi me? Pete pfhe kekrei se die pu me? Pete pfhe kekrei ca kela phre me?

³¹ Sirei mhaphruo zhakuocüko mengu sieiliecie. Mu a peteko donu rei kevitho-u thapie nieko kieshütuo.