Korintmiako Kerieu 1 - Angami Naga CL (Re-edited) Bible (BSI)

¹ Paul, Ukepenuopfü medo nu, Khrista Jisu apostel chütuoü kielieketau, mu u siezeu Sosthene unie-e,

² Thupie Korint nu Ukepenuopfü kehouu, Khrista Jisu lanu chü kemesalieketa mu kemesako üdi kielieketako, tsiu kehourapuorei hie mu uko Niepuu üdi, u Niepuu Jisu Khrista za kielieketa peteko ki keshü:

³ Ukepenuopfü u Puo mu Niepuu Jisu Khrista ngukemezhie mu noune bu nieko ze baliecie.

⁴ A nieko la kethezie pie a Kepenuopfü tsü seiya, kekreilamonyü Ukepenuopfü ngukemezhie süu Khrista Jisu geinu pie nie tsü,

⁵ puo geinu mha peteko nu, nie dieko nu mu mhasi pete nu rei nyilieketa la.

⁶ Süusü Khrista zhapuu nieko donu ba chüsechüketa tuoi,

⁷ nie u Niepu Jisu Khrista bu mia mhingu chüshüketuo pfhe keba ki ze mhaphruo kehoupuo nu rei rükreketa chülie lho.

⁸ Puoe nie bu u Niepu Jisu Khrista zha nhie jota moketuo la puo thuo nie rüguose vo thela tsoshü zotuo.

⁹ Ukepenuopfü sü dietho zo; puo nie bu u Niepu Jisu Khrista, puo Nuou ze kekrotho balieketuo la nie kielie.

Kehouu Nu u Rüla Kekreiketa

¹⁰ Siro a siezedzürieko, a u Niepu Jisu Khrista za nu nie bu kenourhe di nie donu kepfükhowa molienu, tsiu nieko bu keze nou puo chü mu nie medo kerhe di keze puo chülienu chaya.

¹¹ Kekreilamonyü a siezedzürieko, nieko donu keprüli baketa Kloe kinumiako kinu silie.

¹² A sikelie die süusü, nieko mia puopuocü sie, “A Paul kitsa,” morei “A Apolo kitsa,” morei, “A Kefa kitsa,” morei “A Khrista kitsa,” isi bata üsi.

¹³ Khrista chü phrowalie vi me? Paul nieko la krus geinu siashü me? Morei nie Paul za nu dzülupfülie me?

¹⁴ A Krispa mu Gaya unie zo kemosie nieko miapuorei dzülu khashü kemo la, Ukepenuopfü thezieya,

¹⁵ süla nieko miapuorei a za nu dzülupfülie ücü pulie kenjü.

¹⁶ (A Stefana mu puo kikru dzülu kha sashü ho; derei süsie a kekreimia puorei dzülu khashücü lelie mo.)

¹⁷ Khrista a ketsepie a bu mia dzülu khashünu mo derei dieliekeviu punushü, mu Khrista krus geinu siakeshü kekuou bie pejüwa moketuo la themia mhasi rei se pu mo.

Khristae Kepenuopfü Kekuou mu Mhasiu

¹⁸ Kekreilamonyü krus dieu kataketuoko mhodzünu we kenya die zo, derei kelalieketa úko la we süu Ukepenuopfü kekuou zo.

¹⁹ Süusü thupie kezhü, “A mhakesimiako mhasi pekawatuo, mu mhasimhale kenyithoko mhale chüpie kemethuo chüwatuo.”

²⁰ Mhakesimia kirapuo ba ga? Leshükesithoko kirapuo ba ga? Tsie phouu nu keprüli kesiko kirapuo ba ga? Ukepenuopfü kijüu mhasi pie kenya chü zowata mo üme?

²¹ Süla Ukepenuopfü mhasi we kijüu u thuo u mhasi se Ukepenuopfü silie mo, kenya die üketa puo pupie mia kie di pelekeliemia kelalietuo ükecü Ukepenuopfü medota.

²² Judako zasi ngu nyü mu Grikmiako mhasi pfhü,

²³ derei hie zowe, Khrista pie krus geinu goukewau se pethaya, süu Judako nei kemo die puo mu Judakemoko la kenya die puo zo,

²⁴ derei kielieketa Judako mu Grikmiako la zowe Khristae Ukepenuopfü kekuo mu Ukepenuopfü mhasiu zo.

²⁵ Kekreilamonyü Ukepenuopfü kenyae themia mhasiu ki mhasikuo, mu Ukepenuopfü thachümezie rei themia ki mecakuo zo.

²⁶ Siro a siezedzürieko, nieko thuo rei nie kiekelie dze rükrashücie: themia kitsa nu leshü ro nieko mia kekra mhakesimia mo, mia kekra kemecamia mo, mia kekra kevimia rei mo.

²⁷ Derei Ukepenuopfüe mhakesiko kengashüketuo la kijü nu mhasi kemoko kedaliete; mu Ukepenuopfüe kemecako kengashüketuo la kijü nu kethachüko kedaliete.

²⁸ Siro Ukepenuopfü kijü nu mha le pezhayakezhako bie pejüwaketuo la Kepenuopfüe mhapuorei kemo mhie di mia u le pecü mu u thiyakezhako kedaliete,

²⁹ sidi miapuorei bu Ukepenuopfü mhodzünu kemelha molieketuo la.

³⁰ Puoe Khrista Jisu geinu nie kerheiro bo-u zo, u la Ukepenuopfü kinu mhasi, siro miathokecü mu chü kemesakelie tsiu u rhakelieu chüte,

³¹ mu siketuo la, süu thupie zhü, “Kehoupuorei kemholiekezhau bu Niepuu geinu kemholieliecie,” si.