Korintmiako Kenieu 9 - Angami Naga CL (Re-edited) Bible (BSI)

Jerusalem nu Khristamiako Kekhruohi

¹ Siro kemesamiako khruohikecütsa we a bu thu laketuo ba ba mo,

² nie süu chü nyü keba a siya, süla a Makedoniako mhodzünu nie la kemholie tuoya, tsiu Akayamia nzhüsie nu dojüse baketa pu; mu nie nounyü süu uko pete khre hülieta zo.

³ Derei a u zeko ketseshükecü hie nie la kemelhakecü dieko bu hau nu diethuo chüta moketuo la, sitse a hadzü nie ki kepu tuoi, nieko bu dojüse balietuo;

⁴ si moliro Makedonia nunu mia huo a ze vor di nieko dojüse ba kemo ngulie ro, nieko monyü hie nieko peleketuo hau nu thenga chütuo.

⁵ Süla u keze hako bu a mhodzü nie ki vonushü ho, mu nie mha khashütuo üdi phrashüwaketako pedzüperie dojüse balie tse vituo, sitse a vorkecü ki süu nie kemvü chükecü puo monyü nie thuo chü nyücü la ükecü ngulietuo.

⁶ Puocau sü hau zo: Kehoupuorei tsia va petsakecüu re tsatuo, mu kehoupuorei tsia va pekrakeshüu re kratuo.

⁷ Süla kehoupuorei u ketheta morei mia bu u kemvü chü di monyü u nou nu pepikelie tuoi di mha khashüliecie, Ukepenuopfüe u nei siei di mha khashüyakezhako ngu puo neiyacü la.

⁸ Sitse Ukepenuopfüe nie se morokesuo de kezie rei pie nie tsütuo, sidi nie bu mhakehoupuo nu rei nie la morokesuoko mu nie kelhuo chü di mhatho kevi khe chülietuo.

⁹ Süusü thupie kezhü: “Puo mha kezapie lukihaki shüya, puo mha pie kejümia tsüya; puo ketseikevi kechachie baya,” si.

¹⁰ Siro cieketuo la tsia mu kecüca la niekhrüda khashüyakezhau nie bu cielieketuo la tsia khashü mu chü pekrashütuo sidi nie kemiatho lieyieu bu kralietuo.

¹¹ Puo mhakehoupuo nu rei nie chü penyipie nie bu mephruomevuolie kevi chüshütuo, sidi hie geinu nie khakeshü ngu di mia bu Ukepenuopfü tshelietuo.

¹² Kekreilamonyü nieko chükeshü lietho hau kepelemiako tsopfhü vaphikeshü zomonyü, mia bu Ukepenuopfü tshe philieketuo puo rei sa zo.

¹³ Nieko Khrista dieliekeviu dieze chü di chükeshü la, tsiu nieko mephruomevuo di mha pie uko mu kekreimia rei tsükeshü la mia nie lietho hau chükeshü ngu di Ukepenuopfü tshelietuo,

¹⁴ sidi uko nie mengu mu nie la chalietuo, kekreilamonyü nie gei Ukepenuopfü ngukemezhie vi rükrü zokecü puo tuoketa la.

¹⁵ Ukepenuopfü mha methuo pie ketsü pu phalie kelho-u la puo tshe!