Korintmiako Kenieu 8 - Angami Naga CL (Re-edited) Bible (BSI)

Khristamia Mha Khakeshü

¹ A siezedzürieko, hie nie bu Ukepenuopfü ngukemezhieu se Makedonia nu kehouko gei chükeshü si nyüya;

² uko kemezhiepie rükhrerüyiwata zo, derei uko nei phalie kelho chü di tsopfhü phi zorei mephruomevuo di mha khashü zo.

³ Kekreilamonyü a ngukecüu, u thuo u nei di uko chülie kevi chie chü mu sü kezie rei chü zo,

⁴ tsiu mha khashülie kevi puotei kevi ngukelie tuoi kemesako kekhruohi lietho hau chü di hie hü beita zo.

⁵ Sidi hau nu hie kemerü kezie chüshüte; mu therieu nu u thuo u khapie Niepuu tsülie, tsiu Ukepenuopfü medo mhie u khapie hie rei tsü,

⁶ süla hie Tita hüpie mhatho hau chü sedelieketa tuoi puo bu nieko donu ngukemezhie mhatho hau chü tseishünuya.

⁷ Nie tsie mhakehoupuo nu rei nyi phi bate, kepele nu, nie diepu nu, nie mhacamhala kesi nu, mia khruohi nyü sieikecü nu, mu nie hie khriekecü nu, süla hie nie bu kemephruokemevuo lietho hau nu rei chü pevi seshü nyüya.

⁸ A hau thezho khakeshü mhie di nie ki pu mo, derei kekreimia dze pupie nie kie di, nie bu nie nou nie thochü di mia khrielieketuo la zo.

⁹ Niekoe u Niepuu Jisu Khrista mia ngumezhie phikecü sikecü la, puo mhanyi phi ürei, nie la puo mhakejümia chü, sidi puo mhajükeshü la nie chü penyishü.

¹⁰ Mu mha hau la a nie tarhoshüya: nieko nzhüsie mhapuo chütuo üdi sedelieketa rübei monyü süu chü nyü rei sa di chü zo,

¹¹ süla tsie süu chü tseiwalie, silie liro nie süu chü nyü keba tuoi chülie vi kebau nunu süu chü tseilietuo.

¹² Kekreilamonyü nie chü nyüya ro, nie mha kebau geinu mha khakeshüu lielietuo, nie ba kemo-u geinu chalie lho.

¹³ Siro mia kekreimia bu rüülie mu nie bu kemezhietuo üdi a die hau pu mo, derei süusü ketoukecü bu nie donu baketuo le di zo,

¹⁴ tsie nie kinyiu uko kejü vaphishülie liro, khunhie uko kinyi pie nieko kejü vaphilietuo, sidi nie ketou balietuo.

¹⁵ Süu thupie kezhü, “Kekra kengukelieu rei rükrülie mo, mu keduo yopuo ngukelieu rei tsa zota mo,” si zo.

Tita mu Puo Zeko

¹⁶ Ukepenuopfü Tita nou chüpie hie mhiei puo bu rei nieko ngu puo nou nyükelie la Ukepenuopfü peziewe.

¹⁷ Puo hie kepuu zekelie rübei zomonyü puo thuo puo nounyü di nieko ki voketuo pepilie.

¹⁸ Siro dieliekeviu kezakecü nu kehou peteko nu rei puo tshe phiyakezha u siezeu sa di hie unie ketseshüzhie ho.

¹⁹ Sü rübei zomonyü Niepuu zayieu la kekhrie lietho hau nu puo bu rei hie ze rüveketuo la mu hie puo khruohishü keba silieketuo la kehouko bu puo kedalie di puo ketseshü ho.

²⁰ Siro hie mephruomevuoi di mha khashüyakezha lietho hau kechü nu mia puo bu rei hie pejota molieketuo la menuo di mhachüya,

²¹ kekreilamonyü hie Niepuu mhodzünu rübei monyü themia mhodzünu rei mha puotouu chüketuo leyacü la.

²² Süla hie u siezeu pie unie sa di ketseshüya, hie va kekra puo kevikesuo mehowate mu puo mha kekra nu puo nounyü tuoya, tsie we puo nounyü sakuote, puo nieko pele phiyacü la.

²³ Tita sü a dzieseu zo mu nieko lie kechü nu hienie keze di mhachütuoya; siro u kezenie liro kehouko thuo ketsekeshü dielienieta zo, süu Khrista bu zayie chülieketuo la.

²⁴ Süla nieko mia khrieyacü dieu pie unie khrieshülie tsiu hienie la kemiako tuoyakezha cau kehouko pete mhodzünu thashücie.