Korintmiako Kenieu 7 - Angami Naga CL (Re-edited) Bible (BSI)

¹ Süla a khrieko, phrapie kezhü hako pete u la zo, uko mhakehoupuorei themo-u morei ruopfüu rei chü perhuwayakezha kheko nunu u chü kemesalie, siro Ukepenuopfü khrüprei nu lhou di mesa tseilie khe.

Paul Puo Neikecü

² Nie nou khrüpie hie tsücie; hie mia puo gei rei kekrüshü mo, hie miapuorei chü pesuo mo, hie miapuorei sewa mo.

³ A nie pejoketuo la die hau pu mo; a tsie mhodzü nie ki pukeshü tuoi, hie nie ze siata zorei rhei ba zorei nie hie nou ki tuo zo.

⁴ A tsiekenuo nieko la thepfu tuoya; a nieko la kemholie tuoya; süla a nou mene phi tuoya; sidi hie mezhie peteko nu rei hie nei phalie kelho chü tuoya.

⁵ Siro hie Makedonia nu vorkelie sie, hie chüümo zowe rüleilie mo, tsiu mha pete nu kemezhie, chazoutsa keperhie mu thenoutsa michie tuo tso.

⁶ Derei Ukepenuopfü, thedzükouketako chü kethepfushüyakezhau thuo Tita bu vorkelie geinu hie nouluolie.

⁷ Mu puo kevor rübei la monyü, nie puo nou thupeluokeshü dze sishü di hie nou chü peluoshüta zo, siro puoe hie ki nie a mengu keba, nie nousuo keba, nie a la nie rhiechü keba dze rei sishü di a tsie we a nei kechü sa bate.

⁸ Siro a leshü thukeshüu nieko nou chü pesuowata zo ürei, a süu la rünou mo ba mo (leshü süu puotei huoyo la nie nou chü pesuowakecü si di a nou mezhie ba).

⁹ Tsie we a nei bate, süu nie nou chü pesuokewa la mo, derei nie nou chü pesuokeshü süu la nieko nou kediliecü la; nieko Ukepenuopfü nu nie nousuokelie la, mu hie la nieko mhapuo nu rei kata mo.

¹⁰ Kekreilamonyü Ukepenuopfü thuo nousuo süu se nie nou chü kedipie kelakelie chau nu vashüta zo mu süu la rünou kemo puorei jü; derei kijü kitsa nousuoue kesia se vorshüya.

¹¹ Kekreilamonyü nousuo hau ze Ukepenuopfü nie gei kidepuo chüshüte shicü, nie bu kidepuorei mhale pesoulie shi, kiderei nie nou rüpelie shi, kiderei nie kedeshü shi, kiderei nie mia mengulie shi; kiderei nie rhiechülie shi, kiderei nie bu kemezhielie shicü leshücie! Nie mha hako pete nu rei nie thuo nie ü jota mo ücü thashüta zo.

¹² Siro a leshü thupie nie ki keshüu, nie mia puoe mha huo chü kekrükewau morei mia puoe mia bu puo gei mha huo chü kekrüshükewau la mo, derei a nie bu Ukepenuopfü mhodzünu nie hie la nie rhiechü phiyakecü si kemecie nyücü la zo.

¹³ Hau la hie nou rüleiliete. Siro hie nou luokelie rübei monyü, nieko Tita bu puo neikelie la hie kidepuorei hie nei shi, kekreilamonyü nieko pete la puo bu puo nou rüleitshüiliete.

¹⁴ A nieko la puo ki kemelha tuoya, mu süu la mengata mo; derei hie mha pete nu dietho-u pie nie ki pu seiya zo, mu hie Tita gei kemelhakeshüu rei puotoulie zo.

¹⁵ Siro puo nie peteko die zekelie mu michie pe zo di puo zekelie rükrakelie ki nieko ngu puo nei kechükuoliete.

¹⁶ Siro a mhakehoupuo nu rei nieko pelelie vitakecü la a nei phi bate.