Korintmiako Kenieu 6 - Angami Naga CL (Re-edited) Bible (BSI)

¹ Siro hie puo ze mhachü tuoyakezha tuoi, nie bu rei Ukepenuopfü kinu kepar ngukemezhieu se kemethuo chüwa hienu pu beiya.

² Kekreilamonyü puoe sie, “A puotei touki n die rünyüliete, mu kelakelie teisozha nhie a n khruohishüwate,” si. Harie, puotei kevi sü tsieki ha zo; harie, kelakelie teiso sü tsieki ha zo!

³ Lietho-u nu miapuorei bu hie pejo nyüya mo, süla hie mia puo chakha rei chüwaya mo,

⁴ derei hie mhakehoupuo nu rei Ukepenuopfü kituomia ücü thashüya: sidi shügeshühie sekecü, kemezhiekecüko nu, zie sekecüko nu, kekakemheko nu,

⁵ hie tsie hie vücüko nu, kedie kechüko nu, hie kebvükeboukeshüko nu, mhachü rükhrerüyicüko nu, ze mocüko nu mu khecüko nu;

⁶ kemesa kelhou nu, mhacamhala kesi, shügeshühiekecü, tseiüvikecü, Kemesa Ruopfü nu rei, kekhrie ketho nu,

⁷ ketho-u pukecü nu, mu Ukepenuopfü kekuo nu; hie zatsa rei hie vitsa rei kemiatho rünyie sekecü rei,

⁸ therhukepfü tsiu zhasekepfü nu, mia hie tshe mu hie thakecüko nu, mia hie üse ketijümiako üya, sirei hie ketho-u puya.

⁹ Mia hie si mo üya, sirei mia hie si pevi phi; hie siatatuo ükezhü mhie, sirei harie, hie rhei tuo zo; mia hie pechüpenyü phi, derei dukhrilie mo.

¹⁰ Mia hie nou chü pesuo phi, derei hie nei sei tuoya; hieü kejümiaü, derei hie mia kekra chü penyishü; hieü mhapuorei bakemomiaü; derei mha pete hie vie zo.

¹¹ Harie, Korintmiako, hie nieko ki mha pu hie ketheta mo; hie nou khrü kemeyapie nieko tsü.

¹² Hie mia kekhrie nu hie ketheta mo, derei nieko we silie mote.

¹³ Derei tsie u nuonuo ki mha pukecü tuoi mha puya, nie nou khrü kemeyashücie.

Nie Rhei Tuoyakezha Ukepenuopfü Kiu Zo

¹⁴ Pelekemomiako ze kethede di nie vocie kerhe hie. Kemiatho mu kerüzhü unie donu keze mhachülie kevi kedipuo ba ga? Morei kezie mu kezei unie kekrotholie kevi kedipuo ba ga?

¹⁵ Kimhie di Khristae terhuokesuou ze kedierhelie vituo ga? Morei kepelemia puoe pelekemomia puo ze kedipuo kekrurhelie vituo ga?

¹⁶ Sizomonyü Ukepenuopfü rüsuokiue terhuorhiko ze kedipuo kepupie zhü ga? Kekreilamonyü we rhei tuoyakezha Ukepenuopfü rüsuokiu zo; süla Ukepenuopfü thuo pukecü, “A uko donu lhou di uko ze tuotuo, mu a uko Kepenuopfü chütuo, siro ukoe a themia chütuo.

¹⁷ Süla süko therhie parlie, sidi, uko kinu nie chükholiecie, Niepuue siya, sidi mesa kemo puorei nyü hie; silie liro a nieko zelietuo,

¹⁸ mu a nieko puo chütuo, siro nieko bu a nuonuo thepfuko mu thenuko chülietuo, Kuokejokejü Niepuue siya.”