Korintmiako Kenieu 5 - Angami Naga CL (Re-edited) Bible (BSI)

¹ Kijü hau nu lhoukezha pfhekiu bie pesuowata zorei, thedzie üse chü kemo kechachie baketuo ki puo Ukepenuopfü thuo teigei nu chüpie baketa hie si bate.

² Siro teigei nu lhouketuo ki süu pie hie whelieketuo mengu kelho di hie tsiedo pfheki hau nu meheimelo tuoya,

³ siro tsiedo hie pfheki hau lhewata zorei, hie methuotalie lho.

⁴ Hie pfheki hau nu lhou keba ki, hie pie kemesiko toupfü meheimelo baya; süu hie hau rhuowa nyü monyü, hie ngulieketuou chüpfü nyücü la zo, sidi siaüjütalie kevi mo hau kerhei bu mezulieketuo la.

⁵ Siro hie la süu chüshüketuou sü Ukepenuopfü zo; mu puo lhite puo kemhie di Ruopfüu pie hie tsüwate.

⁶ Süla hie nou thepfu sei tuoya; hie chüüphou hau nu keba chie Niepuu ze kepecie tuokecü si ba zo ürei,

⁷ hie ngu di monyü pele di lhou tuoya zocü la.

⁸ Derei, hie nou thepfu tuokecü, hie mo hau nu ba nyü monyü vo Niepuu kinu puo ze ba nyükuota zo.

⁹ Hie thuo hie mo ki hau nu morei luu nu ba rei, hie puo nei chü nyü tuoya.

¹⁰ Kekreilamonyü u pete rei Khristae mia ketsoketuo bau mhodzü tha phre zotuo, sidi we chüüphou nu keba ki kevi rei kesuo rei chükewako zhakhra ngu phrelie zotuo.

Kezevi Lakelie Lietho

¹¹ Süla hie Niepuu khrüprei morokesuo si di süu se mia hü tuoya; derei Ukepenuopfü hie si tsei ba, mu a kemerü nie rei nie nou nu hie si baketuo pele.

¹² Hau nie mhodzünu hie thuo hie tsheshüzhü mo, sikecüumonyü, nie bu hie la kemholie tuolietuoü, sidi nie bu thenoutsa nu monyü chazoutsa nu kemiako tuoyakezhako die kelalieketuo la zo.

¹³ Siro hie kenyamia mhieta zorei, süu Ukepenuopfü la zo, morei hie mecie tuo rei, süu nie la zo.

¹⁴ Kekreilamonyü Khrista kekhrieu thuo hie hüse tuote; mia puoe pete la siawaketa hie pelete; süla mia pete rei siata zo.

¹⁵ Mu puo mia pete la siakewa la kehoupuorei rhei tuokezhako u thuo u la monyü u la siashü di rheisieketau la lhoukecüu zo.

¹⁶ Süla hie tsie yawinu themia noule geinu miapuorei rhu pekrei mote; hie thiedzü themia noule se Khrista dze le, derei tsie we hie si mote.

¹⁷ Süla themia kehoupuorei Khrista nu bata ro, puo themia kesa chüte: mha keweko jüte; harie mha pete kesa phrete!

¹⁸ Derei hie chüpie hie bu Khrista la puo ze kezevi laketa mu kezekevi lietho kha hie ketsü Ukepenuopfü kinu mha pete vor zo;

¹⁹ mu süusü Ukepenuopfü Khrista geinu kijüu bu puo ze kezevi lalie, sidi mia kejokemouko se mia pejo sa mote, mu kezevi lakelie lietho-u pie hie pelewate.

²⁰ Süla hie Khrista soukechümia, Ukepenuopfü hie geinu mha puyacü la; siro hie Khrista sou nu nie bu Ukepenuopfü ze kezevi lalienu puya.

²¹ U lanu kephouma si motokecüu chüpie kephouma chüwa, sidi u bu puo geinu Ukepenuopfü kemiatho-u nu u ya nyilie.