Korintmiako Kenieu 4 - Angami Naga CL (Re-edited) Bible (BSI)

Rünyo Liko nu Kinyi Dze

¹ Ukepenuopfü hie ngumezhie di lietho hau chünu di hie pethoshüte, süla hie dzükoutaya mo.

² Siro hie keviese ketuo kemenga mhathoko pete khawate; hie kethedo di dosuo chü morei Ukepenuopfü dieu pu kecürüwaya mo; sikecüumonyü hie ketho-u chü meyiemeluo di Ukepenuopfü mhodzü hie thuo hie khapie kehoupuo bu rei u nou puotouu nu tuolieketuo chü tuoya.

³ Derei hie dieliekeviu keviewa üro, süu katakezhüko kinu keviekewa zo.

⁴ Süu pele mvüketako la we kijü hanu rhuou bu uko nou chü pezeiwaketa la zo, süko bu dieliekeviu nunu kevor kezieu, zayie chü zokecüu Khristae Ukepenuopfü rhiu ükecü ngulie kelho chüwaya.

⁵ Kekreilamonyü hie thuo hie zhapu chü monyü Khrista Jisue Niepuu zo ücü zhapu chü mu Jisu za la hie nie diemia mhiete.

⁶ Ukepenuopfü thuo pukecü, “Kezie bu kezei nu zieliecie,” ikeshü, süu Ukepenuopfü zayie kechüu mu mhasiu hie nou va pezielie di Jisu Khrista zie geinu thashüwate.

⁷ Derei kinyi süu hie geinu monyü Ukepenuopfü geinu par zokecü mia bu silieketuo la mhama kere süu rünyo üse kechü hie kelhou nu tuo zo.

⁸ Mhacha pete nu hie kemezhielie, derei hie penyüwa mo; hie nou kehoukeruo chütaya, derei hie zie kejü chüta mo;

⁹ mia hie pese phi, derei hie bu hie rübeita mo; hie vüpie zhüwaya, derei hie pekawa mo;

¹⁰ Kehoukipuorei hie mo hau geinu Jisu seu toupfü sei tuoya, di mia bu hie mo geinu Jisu rhi tuoketa ngulieketuo la.

¹¹ Kekreilamonyü hie rhei keba ki rei, Jisu zau la hie kesiatsa tuo seiya, mia bu hie chü hie phou geinu Jisu rhei ketuo silieketuo la.

¹² Süla hie kelhou nu kesiae mhachütuo zo, derei nie gei zowe kerheiu mhachü tuote.

¹³ Derei we kethodieu medzi di kepele dzetsa u ruopfü kerhetacü la, “A pelete, süla a puya” icü mhiei, we pele, mu süla we pu reiya,

¹⁴ sidi Niepuu Jisu chü perheikelieu thuo Jisu sa di u chü perheilietuo, mu nie sa di hie ze vo puo mhodzünu thaketuo hie si bata zo.

¹⁵ Uzo, mha pete nieko la chüketuo zo, derei themia kekra bu ngukemezhie ngulie di süu chü pekrapie mia bu zayie kechü Ukepenuopfü tshe kechü salieketuo la zo.

Kepele nu Lhou Baketa

¹⁶ Süla hie dzükoutaya mo. Siro hie chü hie mo-u thachü miemietazhü zorei teisonhie hie ruopfü miau chü kesazhü zo.

¹⁷ Kekreilamonyü zopuoki la hie kemezhie zorei, süue kechachie baketuo zayieu la hie bu dojüpfükelie zo,

¹⁸ hie mha nguyakezhako monyü nguya kemoko meho tuoketa la; kengu vieko zowe dopuoki la rübei, derei ngu kemo vieko we kechachie baya.