Korintmiako Kenieu 3 - Angami Naga CL (Re-edited) Bible (BSI)

Dietseidiekho Kesau Lietho

¹ Hie thuo hie zhapu chü sede la bate me? Huomia chüyakezha tuoi mia bu hie la zhapuleshü thupie nie ki shü morei nieko bu hie zhapu leshü thu morei vi die?

² Nieko ha hie melou nu thupie tuoketa, themia pete bu silieketuo mu phrülieketuo hie leshükota zo;

³ mu niekoe hie bu thukeshü Khrista leshü puota zo, süusü kethudzü se thu monyü rhei tuoyakezha Ukepenuopfü Ruopfüu se thuliete, tsiekrako geinu monyü themiako melou chü geinu thulieta zo.

⁴ Siro Khrista la Ukepenuopfü kitsa hie kethepfu nyite.

⁵ Hie hie thuo par di chülie sü ükecü pulieketuo ba puorei tuo mo; hie chülie kesüu sü Ukepenuopfü kinu zo,

⁶ puoe hie bu dietseidiekhokelie kesau liethomia chülie kevi kekuo kha hie tsüshüte, süu leshükhu nunu monyü ruopfü nunu zo; kekreilamonyü leshükhue mha chü pesiawaya, derei Ruopfü we kerhei khashüya.

⁷ Derei ketsienie geinu thukelie kesia lietho-u thuo rei puo zayie nyi di Mosa zie kezie süu la Israel nuonuoko bu puo zie meholie suota üro, tsie we zayie süu sa lhote,

⁸ Ruopfü lietho zayieu we sü ki rei kide zhakuotuo shi!

⁹ Siro pejowayakezha lietho süu zorei zayie süde chü üro, u chü kemiatholiekezha lietho-u we kedipfü rei zayie chükuotie shi!

¹⁰ Ketho, tsie ziekuokecü zayie kechüu baketa la thiedzü kezie zayie kechüu jüte;

¹¹ siro jütazhükecüu thuo rei zayie nyi üliro, ba seiketuo zayieu we kide zhakuotuo shi!

¹² Siro hie kemerü hau baketa la hie thepfu phi di mhachüya,

¹³ thiedzü Israelko bu, puo ratsa jütaketuo mu ngu motaketuo kezieu meho terü zo tha puo thela tso molieketuo la Mosa bu mha pie puo zie yakelie tuoi monyü, hie we sükemhie chüya mo.

¹⁴ Sirei süko nou chü perewate. Ketho, thie ketso rei uko dietseidiekho keweu leshüko phrü kesie metsei puo keya pie uko yapfü tuoya zo, mu Khrista geinu rübei süu lhewalie kevi zo.

¹⁵ Ketho zo, thie ha ketso rei uko Mosa dieko phrü kesie metsei puo keya süu pie uko nou yalietaya;

¹⁶ derei themia kehoupuorei la Niepuu ki vorkelie khe, puo geinu puo keyau lhewaya.

¹⁷ Siro Niepuu sü Ruopfü zo, mu Niepuu Ruopfüu kebara, shüphrakelie bataya.

¹⁸ Mu uko pete rei, u zie keya süu sa mo di, khrüva nunu mha nguyakezha tuoi, Niepuu zayieu meho di, Niepuu Ruopfü süu nunu u chü kedipie zayie puo nunu zayie kekreiu nu shü di puo rhi mhie miemie parlieya.