Korintmiako Kenieu 2 - Angami Naga CL (Re-edited) Bible (BSI)

¹ Süla a nieko ki vor nieko thepesuo la moketuo leliete.

² Kekreilamonyü a nieko thepesuowata üro supuo bu a nou thupeluo ta? Ae u thepesuokewako thuo zo mo üro!

³ Süla a hai di thushü, sitse a vorkecü ki a uko la a neilieyakezhako bu a thepesuowa molieketuo la; kekreilamonyü a nieko gei a kethepfu ba, mu a keneiu bu nieko pete keneiu rei chülieketuo la.

⁴ A nou kemezhie se, a nousuo mu kra zo di leshü thupie nieko ki shü ho; süu nieko the pesuoketuo la mo, derei nieko bu a nieko khrie phiyakecü silieketuo la zo.

Kejo Vapie Tsükecü

⁵ Derei miapuonie mia huo thepesuowa ümharo, süu a thepesuokecü zomonyü nieko pete thepesuo zo, süu vatshevaziekecü die mo.

⁶ Nieko miakrau siazha pie puo tsüwaketa ci zorei vite.

⁷ Simonyü themia süu bu puo nou suothor vo puo chamezie tsei zota molieketuo la; puo kejo vapie puo tsüwalie mu puo chü kethepfushülie.

⁸ Süla a nie bu puo khrie kethokecü thashünu nie hüya.

⁹ A mha ca puo la thukeshü: nie dojüshüketuo mu nieko mha pete nu dieze chüya mo mo shikecü si toulietuo üdi.

¹⁰ Nieko themia kehoupuorei kejo vashüwata ro, a rei sümia kejo vashüwata zo; siro a mhakehoupuorei vashüwata ro, a mia kejo vakeshü süu nie dzevi la Khrista mhodzünu vashüwaya.

¹¹ Mha hau Satan bu u ki vikuota moketuo la chüya; kekreilamonyü we puo doko si bacü la.

Troa nu Paul Puo Nou Kemezhieketa

¹² Khrista dze dieliekeviu pie pethashütuo üdi a vor Troa tsolie, Niepuu thuo kikha khrüshüta zocü ngulie;

¹³ derei a nou rüülie mota, kekreilamonyü sünu a u zeu Tita ngulie moketa la. Süla uko bu keviu chü balienushüwa di Makedonia nu vote.

¹⁴ Derei Ukepenuopfü peziewe, Khrista geinu puo u mhodzü rie di hie bu kuokelie rüsieu nu tuo vozhüyacü la, sidi hie geinu puo sikelie re kethenguu se kehourapuorei kezashülieya.

¹⁵ Kekreilamonyü kelalieketako dzetsa rei mu katakezhüko dzetsa rei hie bu khapie Ukepenuopfü tsükeshü Khrista re kethengu chüta zo;

¹⁶ süko huo la zowe kesia nunu kesia nu kevo re puo, kekreiko la zowe kerhei nunu kerhei nu kevo re zo. Siüro supuonie mhatho süu chülie sü ga?

¹⁷ Hie zowe kekreimia kekra tuoi Ukepenuopfü dieu pie thelhi kechü mhie tuo mo zo; derei Ukepenuopfü thuo hie ketsekeshümia chü, Khrista nu mu Ukepenuopfü mhodzünu tha di ketherachie mo di süu puya.