Korintmiako Kenieu 12 - Angami Naga CL (Re-edited) Bible (BSI)

Paul Ziemhoko mu Se Puo Pesikeshü

¹ Kemelhakecü mhapuorei kepra jü zo ürei a kemelha morosuote, derei a Niepuu ziemhoko mu pesikeshüko putuo zotuo.

² Teicie keredia voketa ki a Khrista kitsatieketuomia puo ze tei lha seu nu khokecü si, themo sa mo mo shi, a si mo, Ukepenuopfü thuo kesi zo.

³ Mu a mia dze kesi, puo mo sa mo mo di kho shi a si mo; Ukepenuopfü thuo kesi zo,

⁴ süu ze Kerüüchü nu vota, mu süki mia ki pu suokecü pfhe si mu mia puo bu rei pu la suokecü si.

⁵ A süu sou nu kemelhatuo, derei a thuo a thachütsa zo kemosie, a thuo a la we kemelhalie lho.

⁶ Derei a kemelha nyü sie zorei, a kenyamia tuoi zo lho, kekreilamonyü a ketho-u pu zotuo. Derei a mia puo bu rei a ngu di mu a die si di a le kerükrieta molieketuo la a ketheliete,

⁷ tsiu mha thapie a kiekeshüko nu rei menuolie morokesuo la. Süla a bu kemholieta molieketuo la, a chü a mo gei zohu puo khashüwate, sidi a bu kemholie molieketuo la süu bu Satan dielieu chü di a vüshüshü tuoya.

⁸ A mha hau la va se Niepuu bu süu chüwanu cha,

⁹ derei puoe a ki, “A n ngukemezhie sü n la tsei zo, kekreilamonyü kethachü nunu a kekuo si tseilieya,” si. Süla Khrista kekuou bu a gei balieketuo la, a thachüko nu rei kemelhaketuo a neikuote.

¹⁰ Süla a Khrista zau la, a thachü nu rei, mia a kengakecüko nu rei, kemezhiekelieko nu rei, mia a pechücüko nu rei, mu ketsopfhü dzükelieko nu rei a neikuote; kekreilamonyü a thachü keba ki a kuo bayacü la.

Paul Korint nu Kehou Rüli Kemedo

¹¹ A mhalekemomia chüte! Nieko a kemvü chüpie sishüte. A nieko ki nu thetshepfü rei zhü zo, kekreilamonyü a mhathopuo mo zo ürei, nieko mia kro puo üse apostel kevitho üyakezhako ki a thachü mo zo.

¹² A shügeshühiekelie, zasiko, u ngoko, mu mha kezha nie donu chükeshükoe a Apostel ketho ücü zasi zo.

¹³ Nieko kehou kekreiko ki mha kikecüpuo nu thachükuota ga? A nieko nou va penyü kemo-u me? Hau la a kejo vashücie!

¹⁴ A va seu nieko ki vorketuo dojüliete. Derei a nie nou vapenyülie lho, a nieko vie monyü nie lie nyü ba; mianuonuo bu mha pie u krünuo tsü monyü miakrünuo mha khapie u nuonuo tsüyacü la.

¹⁵ A nei siei di mha pevoshütuo mu nie la a thuo a khashütuo. A nie khriekuokecü la, nie a khrie petsata rei viü ba me?

¹⁶ A nie nou va penyü mokecü nie rei le batuo. Sirei (huomia sie) a ü kedovi di nie selie üya.

¹⁷ A ketsepie nieko ki keshü huomia geinu a nie gei a do viliete me?

¹⁸ A Tita bu vonu pushü, mu u zemia kekrei puo sa puo ze ketseshü, Tita nie gei puo do vilie mo zo, puo silie üba me? Hienie ruopfü kemhie di mhachü mo üme? Hienie phizho puo nu zho tuo mo üme?

¹⁹ Hie mha hako kepu la nie hieü nie mhodzünu hie thuo hie zhapu chüta üba me? Hie Ukepenuopfü mhodzünu Khrista la mha puya. Kezeko, hie mhakehoupuo kechü nu rei nieko chü peviketuo la chüyakezha zo.

²⁰ A nie ki vorkecü ki nieko a ngupie nie medo mo mu a rei nieko ngupie a medo moketa prei ba; sita ro kegeikecü, mia ngu u rokecü, noupfhünouyie, kezekesuo, mia thakecü, mia kebekecü, komethuokecü, mu mha kebvükecü hako sierketa prei ba.

²¹ A nie ki la kevor ki, nieko themia kekra kephouma tsiu kejokemou chü di mesa kemo, pieüpiera mu kethenga chüketuo nunu rüdilie kemo la, Ukepenuopfü a bu nie mhodzünu menga di a nousuo phikecü prei ba.