Korintmiako Kenieu 1 - Angami Naga CL (Re-edited) Bible (BSI)

Kelukeshü

¹ Paul, Ukepenuopfü medo nu Khrista Jisu apostel chükelie, mu u siezeu Timothi kinu, thupie Korint nu Ukepenuopfü kehouu Akaya nu ketuo kemesako pete ki keshü.

² Ukepenuopfü u Puou mu Niepuu Jisu Khrista bu ngukemezhie tsiu noune pie nieko tsükelieu chücie.

Paul Ukepenuopfü Theziekeshü

³ Ukepenuopfü u Niepuu Jisu Khrista-nuo Puou, mia ngukemezhie Puou mu puo kinu thenoukeluo pete voryakezha Ukepenuopfü tsheliecie,

⁴ puo u mezhie pete nu u nou thupeluoshüya, sidi u bu Kepenuopfü kinu kevor u nou thukepeluo üse mezhie kehoupuo nu rei kebamia nou thupeluolieketuo la.

⁵ We Khrista la kemezhiekelieu krakecü tuoi, Khrista geinu we rei thukepeluo u kelhuo nyite.

⁶ Siro hie kemezhiekelieko ro, nie bu nie nouluolie mu nie kelalieketuo la; hie thenou keluo ngulie ro, süu nie bu rei nie nouluolieketuo la zo, mu süu nieko hie mezhieko metha di shügeshühiekelie nu ngulieya.

⁷ Nie gei hie kemerüu shükeniewalie lho; nie hie kemezhiekecüko nu keza pfükelie tuoi, hie nou luokelieu nu rei nie hie ze kezalieketuo hie si tou ba zocü la.

⁸ Siro a siezedzürieko, hie Asia nu kemezhiekewa nie bu si mo ba nyü mo; kekreilamonyü süu va hie pie mesipie hie krada zopie hielie kenjüta, mu hie rheikelie rei le pevi mota zo.

⁹ Ketho zo, hie nou zowe siata meciekecü leta zo, sidi hie thuo hie peleta monyü Ukepenuopfü, kesiamia chü perheilieyakezhau, rübei peleta.

¹⁰ Hie siatalie kevi kemichie sikecü nunu Puo hie kelashüwata zo, mu hie kelashüya; mu hasie rei puo hie kela lashüketuo hie kemerü puo gei bate,

¹¹ nieko nie kechako nu hie khruohikezha tuoi, sütuoi themia kekra lanu ngukemezhie süu kha hie ketsü nu hie la themia kekra bu Ukepenuopfü tshetuo.

Paul Puo Rüve Kedikewa

¹² Ketho zo, hie kemelhakecü hauha zo, mu hie nou rei süu dzetsa zhapu chüya. Süu hie kijü hau nu kethera chie mo, mu hie nou hie tho chü di lhoushü zo, ba hurei lhoupie nieko tsükecütsa, mu süu kijü nu mhasi se di mbe, derei Ukepenuopfü kinu kepar ngukemezhie geinu zo.

¹³ Kekreilamonyü hie thupie nieko ki keshüko nu nie bu phrü di puoca silie keviko sie puo cha kekrei ba mo; mu süu si zo tha thela tsolieketuo a merüya,

¹⁴ nie tsie we hie si zalieta zeru, süu u Niepuu Jisu zhanhie nie hie pie nie mholie chütuo, hie rei nie pie hie mholie chütuo.

¹⁵ A mha hau si toukecü la, a nieko ki vor riekecü rhü, sidi nieko bu nie nei rükrü zolieketuo la;

¹⁶ a Makedonia nu kevo ki nie ki vor mu lakecü ki rei nie ki vorketuo lesie, sidi nie bu a ketsepie Judia nu voketuo le.

¹⁷ A haikecü la nie a üse nouchünounyü üba me? A mha rhükesie ki themia chüüphou rhi nunu, “U, u” ishü mu “Mo, mo” mhai latayaü ba me?

¹⁸ Ukepenuopfüe dietho touyacü tuoi, a nie ki pukeshü dieko “U üshü di Moü” lata mo zo.

¹⁹ Kekreilamonyü, Silvana, Timothi hieko Ukepenuopfü Nuou Jisu Khrista dzepie nie pethashüketau, “Uü mu Moü” kezhau mo zo. Puo gei zowe “Uü” kecüu rübei zo.

²⁰ Kekreilamonyü puo geinu Ukepenuopfü phrakeshüko, “U” üdi chükeshüu zokecü la. Hau la we puo geinu Ukepenuopfü zayieu kitsa “Amen” pulieya.

²¹ Siro Ukepenuopfü thuo hie bu Khrista nu nie ze puo chülie mu hie kenhelieta zo,

²² süu puo hie gei zasi rei vüliete, mu puo lhite Ruopfüu pie hie nou shüwate.

²³ Derei a Ukepenuopfü bu a kitsa di zhapu chünuya: A nieko ngumezhieketa la tsieu va Korint nu la vor mote.

²⁴ Süu nie kepele kitsa hie nie mho niepu chüya üdi mo zo; sikecüumonyü nie kepeleu nu metei ketha la nie kenei chü pekrashüketuo la nie ze kedziese di mhachüyakezha zo.