Kolosiko 4 - Angami Naga CL (Re-edited) Bible (BSI)

¹ Niepumiako, nie kituokishümia gei dietho mu ketou nunu mhachülie, kekreilamonyü nieko rei teigei nie Niepu puo bakecü la.

Tarhokeshü

² Kecha nu nie khashülie, mu sünu nie terüchü di kethezie pie Ukepenuopfü tsülie.

³ Hie la cha balie, sidi Ukepenuopfü bu kikha khrüshü hie tsü di hie bu Khrista dze kesouu puo dieu pethashülieketuo la, süu la a tsie kedie chü ba.

⁴ Sitse a pu kezhüu pu kemecietsuoishülietuo.

⁵ Pelekemoko ze tuokecü ki nie thuo mecie se tuolie, thewe ki u rhiechülie.

⁶ Nie pfhe nie die bu u neisieilie, mu metsie kelhe mhie zolie, sitse nie mia die kelakecü nu pu kezhüu silietuo.

Kelukeshü Thelau

⁷ Tukika thuo a dzeko pie nieko ki pu phreshütuo; puo u sieze u khrieu zo, Niepuu nunu hie ze chalie chüya mu kedietho liethomia.

⁸ Nieko bu hienie dze silie di nie nou rei chü kethepfulieketuo la, a hau la pekuo di puo ketsepie nieko ki shü ho.

⁹ Puo Onesima ze vorzhie ho, kedietho-u mu u siezeu, u khrieu zo, mu nieko ramia puo zo. Unie hie dze pete se nieko ki pushütuo.

¹⁰ A ze kedie chü keba Aristarka rei nieko kelushü ho, mu Mark, Barnaba üpfü nuou rei sa nieko kelushü ho, nieko hadzü puo dze siliete, puo vor ro puo zeliecie.

¹¹ Tsiu Justa üyakezha Jisu rei nieko kelushü ho. Zhükere kro nunu kepar hako rübei tsie a ze Ukepenuopfü kedi la lietho chüyakezha zo; mu uko a nou thupeluo phi vor tso zo.

¹² Nieko ramia puo mu Khrista Jisu kituou Epafra rei nieko kelushü ho. Puo nieko bu Ukepenuopfü medo-u si tou di metei thalieketuo la puo rhiechü nieko la cha baya zo.

¹³ Puo nieko la tsiu Laodikia mu Hierapolis nu kebako la puo rhiechü mu puo nounyü baya zo ükecü a puo zhapu chüya.

¹⁴ Hie kekhrie darukesiu Luk mu Dema rei nieko kelushü ho.

¹⁵ Laodikia nu keba u kezeko mu Nimfapfü tsiu puo kinu kehouyakezhako ki rei a uko kelushü ücü pushücie.

¹⁶ Nieko leshü hau phrükelie sie Laodikiko kehou bu rei phrüshüketuo le beicie. Siro Laodikia nu u kezeko leshü puo ketsepie nieko ki shüketuou rei phrüshücie.

¹⁷ Siro Arkipa ki hau pushücie: “Niepuu lietho la mhatho pie n peleshüwaketau chü tseiliecie.”

¹⁸ A, Paul, a thuo a dzie üse nieko kelukeshü die hau thushü ho. A phapfü ketuo thegiroko rükra baliecie. Ngukemezhieu bu nieko ze bakelieu chücie.