Kolosiko 3 - Angami Naga CL (Re-edited) Bible (BSI)

Khrista nu Kelhou Kesa

¹ Süla nie Khrista ze di rhei sielieta üro, nie nou pie pesogei Ukepenuopfü zatsa baketa Khrista keba nu vieko pfhü zoliecie.

² Nie nou pie kijü nu ketuo vieko le monyü pesogei vieko le zoliecie,

³ kekreilamonyü nieko siawa di nie kerheiro-u pie Khrista ze Ukepenuopfü kinu keviepie tuote.

⁴ Khrista, puo nie kerheiu zo, mia mhingu chü kevor nhie, nie rei puo ze mia mhingu chü zayie chütuo.

⁵ Süla nieko kijü nu chüüphou menguko pierüü, mesa kemo, kerüyo, mha kesuo kemengu mu kemehou (süusü terhuorhi rüsuokecü puo zo) hako pesiawaliecie.

⁶ Mha hakoha la mia die zeyakemoko gei Ukepenuopfü noupfhüu vorya.

⁷ Nieko rei thiedzü va puo we mha süko medzi vor zo, nie kelhou süu se lhou ketuo ki.

⁸ Derei tsie we nieko mha hako pete khawalie, thenou kemeyie, noupfhünouyie, kelhiekecü, mia thamelekecü mu nie tie nunu mia pesekecü die khawalie.

⁹ Nieko huoniehuo gei tijü hie, nieko themia keweu rhuowa mu süu mhathoko khawatacü la,

¹⁰ sidi nieko themia kesau chü dzieliete, sidi themia süu chü kesa lapie mhasi nu puo chükeshüu rhi mhielieya.

¹¹ Siro chü kesakelie süu la nie üse Judamia mu Grikmia ü, zhükeremia mu zhürekemomia ü, u zho kesuomia ü, mhasi kemomia ü, miadie kechümia ü tsiu miadie chü kemomia ü salie lhote, derei Khristae mha peteu zo, mu mha pete nu tuoya.

¹² Süla nieko Ukepenuopfü kedakelieko chü di mesa mu puo khrieko chüketa la noushünouzhie, tseiüvikecü, thenou kerünuo, menekecü mu shügeshühiekecü chü dzieliecie.

¹³ Nieko huoniehuo gei thenou shükhre ketsülie, mu huomianie huomia gei panyata üro, kejo vapie ketsücie; Niepuue nie kejo vakeshü tuoi, nieko rei huoniehuo kejo valie morosuo bei zo.

¹⁴ Mha pete ki rei kekhrie chü dzieliecie, süu mha pete pha kesapie kezepuo chü balieya.

¹⁵ Tsiu Khrista khakeshü nouneu bu nie nou dilie, nie bu mo puo chü balieketuo la nie kiepie sünu shükelie zo. Siro Ukepenuopfü thezie ba zolie.

¹⁶ Khrista dieu bu nie nou ketshu chülie; mhasi pete se nie huoniehuo tarho mu petha ba zolie. Ketshe tsali, kerüsuo tsali tsiu ruopfü tsaliko chü mu nie nou nu Ukepenuopfü tshe di chieli tuo zolie.

¹⁷ Sizomonyü nie die nu rei, nie mhathoko nu rei, nie mhakehoupuo chü rei Niepuu Jisu za nu chü di Ukepenuopfü u Puou thezie tuo zolie.

Khristamia Kikru la Thezhoko

¹⁸ Mianupfünuoko, nie nupfunuo khrükhro tuolie, Niepuu nu ketuomia sikecü mese.

¹⁹ Mianupfunuoko, nieko rei nie nupfünuoko khrielie mu uko pese hie.

²⁰ Nhicuko, mhakehoupuo nu rei nie krünuo die zelie, kekreilamonyü Niepuu nu ketuomia haikecü chü zhü zo.

²¹ Miapuonuoko, nie nuonuo nou vakerüda hie, moro ukoe u dzükezie jütatuomu.

²² Miakituoko, nie mhakehoupuo nu rei kijü nu nie niepumia die zeliecie, uko mhinguki nu uko nei chüketuo rübei le hie, derei Niepuu khrükeprei nunu thenou thetho se lietho chücie.

²³ Nie mhathomhachü kehoupuo nu rei, themia la monyü Niepuu la chü ba zo ücü le di thenou pete se chücie,

²⁴ nieko rei si batuo, nie Niepuu kinu nie zhakhra tuoi nie puo kayieu ngulietuo; nie Niepuu Khrista lie chü tuo zo.

²⁵ Kekreilamonyü kekrükecü chüyakezhamia kekrükecü zhakhra chüpie tsütuo, mu miapuorei ngumezhie pekreilie lho.