Kolosiko 2 - Angami Naga CL (Re-edited) Bible (BSI)

¹ Siro a kiderei nieko la, mu Laodikia nu kebako la tsiu a zie ngu chie kemo peteko la a meyhumezhie di mhachü tuoya shikecü nie bu si nyü.

² A uko nou bu thepfu mu kekhrie nu keze puo chü nyüya, sitse uko puocapuola si toukelie kinyiko mu Ukepenuopfüe keviepie ketuo mhasi ngulietuo, süu Khrista zo,

³ puo gei mhasi mu kesikele kinyi pete keviepfü ketuou zo.

⁴ A hau pukecü miapuorei bu mha luuhau pupie nie sewa molieketuo la zo.

⁵ Kekreilamonyü a chü a mo thuo nieko ze ba mo shierei ruopfü nunu nieko ze ba zo, tsiu nieko Khrista nu metemezhü keba mu kepele nu metei keba ngu a nei ba zo.

Khrista Geinu Ketshukelhuo Ngukelie

⁶ Nieko Khrista Jisu liepie nie Niepuu chükelie mhiei, puo ze puo chü lhou tuoliecie,

⁷ nie mie kre puo nou lelie di puo geinu rüchü sierlie, siro nie pethashüketa tuoi kepele nu metei sielie, mu Ukepenuopfü thezie sei zolie.

⁸ Mia puo bu rei themia mhasi, themia do, puotsanuo zho mu kijü nu diketuo ruopfüko se nie tepie u die chüwa molieketuo la nie kirei tuolie, sükosü Khrista kinu vor mo.

⁹ Kekreilamonyü puo gei Ukepenuopfü mo rhiu tseipfü di lhoushü,

¹⁰ nie puo geinu ketshukelhuo kelhou ngulie, puoe kekuo kese mu mha kekhayakezha pete tsüu zo.

¹¹ Puo geinu nieko rei ruopfü kitsa zhükere puo se nie zhürelie, Khrista nunu nie zhürekelie geinu chüüphou kelhouu lhewate,

¹² nieko dzülukepfü nu puo ze khruwate, mu kesiako donunu Ukepenuopfü puo chü perhei lakelie kekuou nieko rei pelekelie la puo sa rheiliete.

¹³ Siro nieko thiedzü kejokemou la mu chüüphou zhürekemo la siatuo, derei Ukepenuopfü u kejokemou pete vashükewa ki, puo nie chü perheipie Khrista saliete,

¹⁴ sidi thezho nu u kepejo thupie kezhü pete vawate, tsiu süko pete pie krus geinu zhie pejüwate.

¹⁵ Puo kezhako mu kekuoko te phrelie di uko mho kuolie di mechü mhodzünu uko pie thakie chüshü.

¹⁶ Süla miapuorei bu kecükekrie, morei thenyiko, morei khrülhou nyi, morei sabat puo la nie pejowa hie.

¹⁷ Hako mha vortuo üketuo khrü puo zo, derei ketho-u sü Khrista zo.

¹⁸ Nieko miapuorei u thuo u pechüpenyü, teigeidieliemia rüsuo, ziemhoko medzi, puoca kejü nu themia noule se u thuo u le pevi,

¹⁹ puo tsüu, themo peteu bu puo geinu kerhei ngulie di u kereko mu u nyhieroko kekhepfü di Ukepenuopfü kinu kevor memieu nunu memie sielieyakezha ze kekhe tuo moketa kehoupuo bu rei nieko shüta pie mouta hie.

Kepetha Ketijüko la u Kireilienukecü

²⁰ Niekoe Khrista ze di kijü nu diketuo ruopfüko kitsatie siate, siliro kiüdi nieko kijüu vie kemhie di lhou ba zo ga? Nieko kiüdi nie khapie thezho-u khrükhro shü di:

²¹ “Hau bie hie, cü hie, nyü hie,” iya ga?

²² Hako pete rei kaüjütaketuo zho kro puo zo; sükoe themia thuo chükelie mu pie pethayakezha zho kro puo zo.

²³ Hako nanyü nu vikecü rhiva, u zho kemene rhiva, tsiu u chü u mo pechükecü zhoko mhasi geinu kechü merieva, derei süko u chüüphou menguko kekhalie kenjü.