Kolosiko 1 - Angami Naga CL (Re-edited) Bible (BSI)

Kelukeshü

¹ Ukepenuopfü medo la Jisu Khrista apostel chükelie Paul mu u siezeu Timothi kinu:

² Khapie Kolosi nu kemesako mu Khrista nu dietho di keze siezedzürie chü kebako ki keshü: Ukepenuopfü u Puou kinu kevor ngukemezhie mu nouneu bu nieko ze baliecie.

Paul Kolosiko la Ukepenuopfü Theziekeshü

³ Hie nieko la kecha kechüko nu kethezie pie Ukepenuopfü, u Niepuu Jisu Khrista-nuo Puou tsü seiya,

⁴ nie Khrista Jisu gei nie kepele keba mu kemesako pete khrieyakezha hie sikelie la,

⁵ kekreilamonyü nieko la kemerü puo teigei baketa la. Ketho die, dieliekeviu nie ki kevor therie nu nieko kemerü süu dze sishü,

⁶ süu nie ki vorte. Süu puo si vülie mu memie se kijü pete nu vote, sütuoi nieko donu rei süu dze silie therie nunu puo si vü sedelie mu Ukepenuopfü ngukemezhie si touliete.

⁷ Nie hau u khrieu Epafra, keze lietho chükezhau kinu siliete. Puoe Khrista lietho nu kediethomia puo, nie sou nu mhachüya,

⁸ mu puo Ruopfü nunu nie kekhrie thapie hie kieshüte.

⁹ Sidi mhaca hau la, hie süu sikelie yawinu, nie la cha petewaya mo, nieko bu ruopfü mu mhacamhala sikelie mhasi neiüko se di Ukepenuopfü medo si toupie nie ketshu chülieketuo la,

¹⁰ sitse nie Niepuu nei chü di lhoulie, puo nei puo medoko chü tseiütsolietuo, tsiu nie bu mhatho kevi neiüko nu nie si rüchülie mu Ukepenuopfü mhasi dzetsa vi kehielietuo.

¹¹ Puo zapuzayie kekuou bu nie chü pekuolie di mhakehoupuo nu rei shügeshühie thaliecie, nie nei siei di,

¹² kethezie pie u Puou tsüliecie, nie chüpie nie bu kezie nu ketuo kemesamiako ze kayie kerhete.

¹³ Puoe kezeiu kekuo nunu u shüphralie di u pekrupie puo Nuo puo khrieu kedi nu shüliete,

¹⁴ puo geinu u rhakelie mu u kephoumako vakelie nguliete.

Khrista Kerükrie

¹⁵ Puoe umhi pie ngulie kelho Ukepenuopfü rhiu zo, mhachükelieko pete donu nuorietho-u;

¹⁶ kekreilamonyü puo geinu mu puo la teigei rei kijü rei, mha kenguko mu ngu kemoko, kedi kechüko, niepuko, kediko tsiu kekuoko pete chükeshü la.

¹⁷ Puoe mha pete mhodzü rei tuo zo, mu puo geinu mha pete teshü kesase ba.

¹⁸ Puoe themo-u tsüu zo, süusü kehou zo; puoe therieu, kesia nunu penuolie kerieu, puo bu mha peteko nu kerietho-u chüketuo la.

¹⁹ Kekreilamonyü puo geinu Ukepenuopfü rhi chüpfü tseikecüu baketuo puo neite,

²⁰ mu krus geinu kru kepar puo zieu pie vitho chüwa di teigei rei kijü rei mha ketuo pete bu puo ze kezevilieketuo chüshü.

²¹ Siro nieko thiedzü mha kesuoko le, mha kesuo chü tuoyakezha la chazoumia chütuo,

²² derei puo se la chüüphou nunu kezeviliete, sidi nie chü kemesapie cielie kelho mu pejolie kelho chüpie puo mhodzünu shülieketuo la,

²³ sidi nie kepeleu nu metei tsiu khrukhrekecü mvüdzeu gei tha zolie, mu nie dieliekeviu sikelie la nie kemerü puo baketau nunu tsiesie la molie ro, süu pie tei khro kelhou kheko ki pu votazhü zo. A, Paul rei dieliekevi hau lie chüte.

Paul Kolosiko Ngu Puo Kenei

²⁴ A tsie nieko la kemezhiekelie a nei ba zo, mu chüüphou kemezhiekeshü geinu Khrista mezhieu kitsa tso mo kebako a rei puo mo-u, süu puo kehouu la kemezhiekeshü geinu süu chü tseishüzhü zocü la.

²⁵ Mu Ukepenuopfü thuo a bu nieko la mhachünu di ketsekeshü lietho süu chüya, Ukepenuopfü dieu petha tseishütuo ücü la,

²⁶ süu thiedzü keriekiko nu mu thephou kekra kinu keviepie tuo, derei tsie we süu pie kemesamiako pesipengushüte.

²⁷ Ukepenuopfüe keviepie ketuo kinyi hau, puoca, nie nou ketuo Khrista, zapuzayie kemerüu, se Judakemoko donu pesipengushütuoü rhüliete.

²⁸ Hie puo dze pu pethaya, tsiu hie kehoupuo bu rei Khrista nunu phichülieketamia puo chülieketuo la tahitarho mu mhasi pete se kehoupuorei petha tuoya.

²⁹ Sidi puo thuo a nou chüshükezha kekuou se a rhie a hie chü di mhachü tuoya zo.