Keriekitho 9 - Angami Naga CL (Re-edited) Bible (BSI)

Ukepenuopfüe Noah Ze Dietseidiekhokelie

¹ Siro Ukepenuopfüe japie Noah mu puo nuonuoko tsü di uko üse, “Kruolie mu kralie di kijüu ketshu chülie.

² Khunuo pete, teira pete, siro kijü gou tuoyakezha pete mu khuoko rei pete n prei mu michie di lhoutuo. Hako pete rei pie n dzie nu shüwate ho.

³ A gajo kheko se n ketsü tuoi, lhou ketuo kemele khe bu n ca chütuo. A mha pete pie n tsüwate.

⁴ Derei no puo kerheiro sa di themuo puorei cülie lho, süusü, puo zieu.

⁵ Themia kehoupuorei mia kerheiro pevowa ro siazha pie u tsütuo, mu khunuo kehoupuorei themia kerheiro liewa ro kesia se pejo zotuo.

⁶ “Ukepenuopfüe puo thuo puo rhi nunu themia chükeshü la, kehoupuorei mia dukhriwa ro mia bu puo dukhri latuo.

⁷ No kruolie mu kralie, n bu kekrau chü di kijüu ketshu chü lhoutuo.”

⁸ Ukepenuopfüe Noah mu puo nuonuoko ki pu sa di,

⁹ “Harie, a tsie nieko mu nieko nuosenuoyieko ze dietseidiekho puo pie bazhie ho,

¹⁰ tsiu u kerheiro kenyi khe perako, kiriko mu kijü nu nhachü pete nieko ze di rouu nunu parkelieko.

¹¹ A nieko ze a dietseidiekho-u chüliete, mhakipuorei dzü bu di la sier u chü chükepfü khe peka lalie lho, mu mhakipuorei dzü bu di la sier kijü peka salie lhote.”

¹² Mu Ukepenuopfüe sie, “A mu nieko siro kerheiro kenyi khe ze dietseidiekhokelie hau vorketuo phou pete la zasi puo chütuo.

¹³ A a pfhesei pie kimhou gei shüzhie, süu se a mu kijüu donu kediekhokelie zasiu chütuo.

¹⁴ Kehoukipuorei ae kimhou shüpie teiu zeshü mu pfhesei jaketa ngu ro,

¹⁵ ae dzü bu di sier u chü chükepfü khe pete pekawa lhoü a mu nieko tsiu kerheiro kenyi khe donu kediekhokelieu rükralietuo.

¹⁶ Pfheseiu kimhou nu ja par tse, a süu meho di a mu kijüu gei lhouketuo u chü chükepfü pete ze dietseidiekhokelieu rükralietuo.”

¹⁷ Ukepenuopfüe Noah ki, “Hauha a mu kijüu nu u chü chükepfü pete donu dietseidiekhokelie zasiu zo.”

Noah mu Puo Nuonuoko

¹⁸ Noah nuonuo rou nunu parkelieko liro Shem, Ham mu Jafet. Ham ro Kanan puou.

¹⁹ Hako sekoe Noah nuonuo; mu hako geinu kijü nu themia pete lhou vor.

²⁰ Noah-e lieciemia puo, puoe khubelie cie kerietho-u.

²¹ Noah khubezu huo krielie di mezeta, mu puo pfhenei se mo di pfheki nu zhü.

²² Ham, Kanan-nuo puou, puo puo methuokezhü ngu tse, pra puo dzürienie ki pushü.

²³ Sitse Shem mu Jafet unie pfhe puo chüpie unie bouka gei shülie di tuo pesie pfheki nu le di unie puou kemethuo whewa, puo kemethuo ngu moketuo la unie zie kereilie.

²⁴ Noah mecie lalie di puo nuo nhicutho-u puo gei kedipuo chüshü shikecü silie tse,

²⁵ Puoe sie, “Kanan bu rüsekepfüu chücie; puoe puo dzürienie kituoko kituo chütuo.”

²⁶ Puoe pu sa di, “Ukepenuopfü Jihova bu japie Shem ketsüu chücie; mu Kanan bu puo kituo chücie:

²⁷ Ukepenuopfü bu Jafet chü pekrashücie, puose puoyie bu Shem themiako ze lhou tuokelie chücie! Mu Kanan bu Jafet kituo chücie.”

²⁸ Dzüdiu sie Noah-e cie krie se di hiepengou lhou salie,

²⁹ di puo kelhouzha cie krie thepfü di hiepengou ki siata.