Keriekitho 7 - Angami Naga CL (Re-edited) Bible (BSI)

Dzüdi

¹ Jihovae Noah ki, “No mu n kikru pete rouu nu leliecie, ae thephou hau nu n rübei a mhodzüki miatho bakecü ngulieketa la.

² Khunuo kemesako puokrü thenie mu puochü thenie icü, siro khunuo mesa kemoko puokrü puochü puopuo icü ze salie.

³ Siro pera rei puokrüpuodzü thenienie ze salie, kijüu pete nu pera mu khunuo kekreikreicüko bu puoyie nyilieketuo la hau chülie.

⁴ Kekreilamonyü zha thenie sie ae teisozha hiedia mu teizeizha hiedia tei perüpie a thuo chükeshü kijüu gei lhouketuo pete peka lotsowaketuo la.”

⁵ Sitse Noah-e Jihova puo ki pukeshü pete chülie.

⁶ Siro Noah-e cie krie sorouketa ki dzüdiu kijü nu vor.

⁷ Süla Noah-e puo kimia, puo nuonuoko mu uko nupfünuoko ze dzüdiu nunu talieketuo la rouu nu leta.

⁸ Khunuoko mu perako rei, mesa rei mesa morei, kenienie icü, puokrü puochü.

⁹ Ukepenuopfü pukeshü mhiei, Noah ze rouu nu lelie.

¹⁰ Zha thenieko sie kijüu gei dzüdi vorta.

¹¹ Noah cie krie sorouketa ki, khrü kenieu khrü zha kerethenie nhie dzüluo kesou kezhako pete rüluo parta mu teigei dzü kharuko khrüshüta.

¹² Sidi teisozha hiedia mu teizeizha hiedia kijü nu teirü bata.

¹³ Sünhie Noah mu puo kimia unie, unie nuo thepfu Shem, Ham mu Jafet tsiu uko nupfünuo seko ze di rouu nu leta.

¹⁴ Uko ze di nhachüko, perinuo neiüko pete rei mu kijü gou ketuo khe, tsiu pera mu puochü chükepfü khunuo puoyie neiünei kekreikreicü pete rouu nu leta.

¹⁵ Kijüu nu u keha kenyi khe, puokrü puochü kenienie Noah ze di rouu nu leta,

¹⁶ Ukepenuopfüe pukeshü tuoi di; süsie Jihovae puo thuo kikhau khawata.

¹⁷ Zha hiedia dzüdi sei zo tha dzü kra miemieta mu rouu toupfüsieta di puo bu kijü mho se rüdza tuota.

¹⁸ Kijü nu dzüu rükrie miemieta mu rouu dzüko mho rüdza tuota.

¹⁹ Siro kijü nu dzüu kra phi sier di kijüthou kerükrieko rei vupfülieta.

²⁰ Dzüko rükrie miemie vo kijüthouko mho thu kerepengou sieta.

²¹ Kijü nu lhouketuo pete siata, pera, kiri, nhachü, kijü nu gou ketuo pete mu themia pete.

²² Kijüu gei u keha kerheiro kenyi khesiata.

²³ Puoe puo thuo kijüu gei lhouketuo pete pekawa. Themia, khunuo, kijü nu gou ketuoko mu pera icü pete. Noah mu puo ze rou nu ketuoko rübei lhiekelie zo.

²⁴ Siro zha krie puo di hiepengou dzüdi bata.