Keriekitho 6 - Angami Naga CL (Re-edited) Bible (BSI)

Themia Kerüzhü

¹ Siro kijüu gei themia kruo selieta, siro süko nuopfüko lhou par tse,

² Kepenuopfü nuokoe themia nuopfüko zivikecü ngulieta, sidi ukoe süko donu u neikecü kedapie lielieta.

³ Sitse Jihovae sie, “A Ruopfü bu themia ze sei tuolie lhote. Uko sü siatalie kevi chüüphou zo. Uko teisozhako bu cie krie puo di mepfütatuo.”

⁴ Süteiki, mu süsie rei, kijü nu Nefilimia kro puo tuo. Siro Kepenuopfü nuonuoko themia nuopfüko ki vor tse süko nuo penuopie uko tsüshü. Ukoe thiedzü kekuomia mu terhümiavimia chü vor.

⁵ Jihovae kijüu gei themiako rüzhüthorketa mu uko kelekemedoko rei suo seiketa ngushü.

⁶ Sitse Jihovae puo thuo themia chüpie kijü hau gei keshü lepie rünou mo mu puo nouchüta.

⁷ Süla Jihovae sie, “A thuo chükeshü themia hako kijü zieu geinu pekawatuo, themia, nhachü mu khunuo gou ketuo mu teikhrie gei teirako rei, ae uko chüshü di rünou mote.”

⁸ Derei Noah-e Jihova mhiki puo khriepfülie.

Noah Rou Chükelie

⁹ Hako Noah seyieko. Noah themia kemiatho puo, puo teiki phouu nu pejolie kelhomia puo, siro Noah-e Ukepenuopfü ze tuo.

¹⁰ Noah nuo thepfumia se nyi, Shem, Ham mu Jafet.

¹¹ Kijüu zowe Ukepenuopfü mhodzünu rhuta, sidi kijüu gei zhosuo thuo tshu vota.

¹² Ukepenuopfüe kijüu mehoshü, ru harie, süu suota, kekreilamonyü sünu kelhou pete u thuo u cha nu suoürhu phre tuoketa la.

¹³ Süla Ukepenuopfüe Noah ki, “Ae themiako pekawaketuo pepiliete, a uko sa di kijü pekawa zotuo, kekreilamonyü uko zhosuo mhathoko bu kijüu tshute.

¹⁴ N thuo gofer sei se rou puo chülie; süu nu kibouko khathelie, mu no puonu rei mu puomho rei tehoutsa se nyhülie.

¹⁵ Süu bu thu krie se chalie, thu hiepengou meyalie, thu ser rükrielie.

¹⁶ Rouu mho keya puo chülie mu rou mho tsiu sozha nie donu thu puo peciepie balie. Rouu bu puolha se lie mu puotsei nu kikha puo chülie.

¹⁷ Kekreilamonyü a kijü nu lhouketuo pete pekawaketuo la dzüdi khashütuo, kijüu gei mha pete siatatuo.

¹⁸ Derei a n ze a dietseidiekho puo pebatuo. N kimia, n nuoko mu uko kimiako ze rouu nu lelie.

¹⁹ Siro khunuo lhou ketuo khe puokrü puochü sa ze rouu nu lelie, uko bu n ze di rheilieketuo la.

²⁰ Teira kekreikreikecü khe, khunuo kekreikreicü pete kijü gei gou ketuo kekreikreicü pete nu kenienie se n ki vorlie, uko bu rheilieketuo la.

²¹ No uko la tsiu n thuo n la kecüca neiüko selie mu kengulie.”

²² Noah-e Ukepenuopfü puo ki pukeshü tuoi pete chülie.