Keriekitho 50 - Angami Naga CL (Re-edited) Bible (BSI)

¹ Sitse Josef-e tsu puo puo zie merepfülie, di puo krükra mu puo mebo ibata.

² Süsie Josef-e puo kituo darukesiko bu daru pie puo puo mo kenhewanu di diekhashü. Süla daru kesikoe mha pie Israel kenhewa;

³ ukoe zha hiedia lie di süu chü, süu la puotei süde se morosuocü la. Siro Ijiptmiako zha hiethenie puo krü.

⁴ Siro puo krükecü zhako vota tse, Josef-e Faro kinuko ki mha pu di sie, “A nie mhi ki nie khriepfülieta üro, Faro ki hai di pucie:

⁵ A puoe a bu rüse puo rüse, puoe, ‘A siatatuo üzhie, a Kanan kijü nunu a mekhru puo thiepie zhü ho, mu no sünunu a khrucie si,’ süla tsie a bu kho a puo khruwacie, süsie a la vortatuo.”

⁶ Sitse Faro sie, “Kholie di n puo khruwalie, puo n bu rüsepie kezhü mhiei di.”

⁷ Süla Josef puo puo khrutuo üdi khota; mu Faro kituoko pete puo ze kho, puo kinu phichüko, mu Ijipt kijü nu phichüko pete.

⁸ Siro Josef kinuko pete mu puo siezedzürieko, tsiu puo puo kinuko rei kho, uko nuonuo kecünuoko, uko kuo kroko mu u thukroko rübei khapie Goshen kijü nu keba zota.

⁹ Siro kierbageiko mu kier themiako rei puo ze kho; süu themia krodi kro kezha se puo chü di.

¹⁰ Siro uko Jordan khie keba Atad sieu nu vorlie tse, uko sünunu thekrü kezha se puo chüshü; mu puo zha thenie puo puo la thekrü chü.

¹¹ Sitse kijü sünu lhou keba Kanankoe Atad sieu nu thekrü kechüu ngu tse, ukoe sie, “Hauha Ijiptmia la thenousuo sekecü thekrü kezha se puota zo.” Süla thechü süu za pie Abel-mizraim kieta, süu Jordan khie lutsa ba.

¹² Sidi puo nuonuokoe puo diekhakeshü mhiei chülie.

¹³ Puo nuonuokoe puo toupie Kanan kijü nu vo di, Abraham-e Hitmia Efron kinu khrüpiekezhü Mamre khieki Makpela lie nu tsiepfüu nunu puo khruwa.

¹⁴ Sidi Josef-e puo puo khrukewa sie, puo siezedzürieko mu puo puo khruketuo la puo ze kekhoko pete ze Ijipt nu la vorta.

Josef Puo Dzürieko Kejo Vakeshü

¹⁵ Josef dzüriekoe uko puo siaketa sie, “Josef uko gei puo nei motuo zo ro, sidi uko puo gei mha kesuo chükeshüko pete chüpie uko gei shü lata ro ki ta?”

¹⁶ Süla uko Josef ki vo di, “N puoe siaketa mhodzü die hau khashü,

¹⁷ ‘Hau pie Josef ki pushülie: A n ki chaya, n dzürieko kejo mu uko n gei kekrü di n pechükewau vashüwacie.’ Süla hieko tsie n ki chaya, n puou Kepenuopfü kituoko kejokemou vashücümu.” Siro uko puo ki die pushü tse Josef-e krata.

¹⁸ Siro puo dzürieko rei krata mu uko vor tetsu puo mhodzünu zhüta, sidi sie, “Harie, hieko sü n diemiata zo.”

¹⁹ Derei Josef uko ki, “Michie hiecie, a Ukepenuopfü tha nu ba zo memu?

²⁰ Nieko a gei mha kesuo chüketuo rhü; derei Kepenuopfü we süu se mha kevi chülie zo, thie chü keba kemhie di, sidi themia kekra bu rheilieketuo chüliete.

²¹ Süla michie hiecie, a thuo nieko mu nie nuonuoko meholietuo.” Sidi puo uko ki die kevi pie pu di uko nou chü kethepfushü.

Josef Se Dze

²² Sidi Josef-e Ijipt nu lhou tuota, puo mu puo puo kinuko; siro Josef-e cie krie puo di ker lhoulie.

²³ Siro Josef-e Efraim nuonuo phou se ketso nguwa; Manasseh nuou Makir nuonuo rei penuopie Josef phi ki shülie.

²⁴ Siro Josef puo siezedzürieko ki, “A siatatuo üzhie, derei Ukepenuopfüe nieko ki vor zotuo, sidi kijü hau nunu nieko ze la vo puoe pie Abraham, Isak mu Jakob tsütuo üdi rüsepie kezhü kijüu nu lashü zotuo.”

²⁵ Sidi Josef-e Israel nuonuoko ki, “Ukepenuopfü nie ki vor zotuo, mu nieko bu hanunu a ruko pfü khotuo.” Sidi uko bu süu chüketuo rüsewa.

²⁶ Sidi Josef cie krie puo di ker lhoulie di siata, sitse uko mha pie puo mo kenhelie, sidi Ijipt nu mekoula puo nu shüwa.