Keriekitho 5 - Angami Naga CL (Re-edited) Bible (BSI)

Adam Nuosenuoyieko

¹ Hauha Adam nuosenuoyieko dze thupie ketuoko, Ukepenuopfüe themia chükeshü nhie, puo thuo puo rhi mhie di uko chüshü.

² Puo thepfumia mu thenumia chüshü, mu unie chükelie nhie japie unie tsüshü di unie üse “Themia” idi kielie.

³ Adam-e cie krie puo di ser ki puo nuo thepfumia puo rhi ki ze puo mhiekecü puo ngulie di puo za thopie Seth chülie.

⁴ Hasie nu Adam-e cie krie thetha sa lhoulie mu puo nuo kekrei thepfu mu thenu rei lhou salie.

⁵ Adam-e cie krie thepfü di ser lhoulie di siata.

⁶ Siro Seth puo kelhouzha krie puo di pengou ki puo nuou Enosh ngulie.

⁷ Mu Enosh lhoukelie sie puoe cie krie thetha di thenie lhou salie. Süsie puo nuo kekrei thepfu mu thenu rei lhou salie.

⁸ Seth teicie krie thepfü di kerekenie lhoulie di siata.

⁹ Enosh-e puo kelhouzha cie hiethepfüketa ki puo Kenan puou chülie.

¹⁰ Siro Enosh-e Kenan penuokelie sie nu cie krie thetha di kerepengou lhou salie. Mu puo nuo kekrei thepfu mu thenu rei ngu salie.

¹¹ Enosh-e cie krie thepfü di pengou lhoulie di siata.

¹² Kenan-e puo kelhouzha cie hiethenie ki puoe Mahalalel ngulie.

¹³ Siro Kenan-e Mahalalel penuokelie sie nu cie krie thetha di hiedia lhou salie. Mu puo nuonuo kekrei thepfu mu thenu rei ngu salie.

¹⁴ Kenan cie krie thepfü di ker lhoulie di siata.

¹⁵ Mahalalel-e puo kelhouzha cie hiesorouepengou ki puo nuou Jared ngulie.

¹⁶ Jared-e Mahalalel penuokelie sie nu cie krie thetha di ser lhou salie. Mu puo nuo kekrei thepfu mu thenu rei ngu salie.

¹⁷ Mahalalel-e cie krie thetha di hiethepfüepengou lhoulie di siata.

¹⁸ Jared-e puo kelhouzha cie krie puo di hiesorouekenie ki puo nuou Inok ngulie.

¹⁹ Jared-e Inok penuokelie sie nu cie krie thetha lhou salie. Mu puo nuo kekrei thepfu mu thenu rei ngu salie.

²⁰ Puo kelhouzha cie krie thepfü di hiesorouekenie ki siata.

²¹ Inok-e puo kelhouzha cie hiesorouepengou ki puo nuou Methusela lhoulie.

²² Siro Inok-e Methusela lhoukelie sie teicie krie se Ukepenuopfü ze tuo, mu puo nuo thepfu mu thenu kekrei rei ngu salie.

²³ Inok kelhouzha pete kesa cie krie se di hiesorouepengou.

²⁴ Inok-e Ukepenuopfü ze tuo, di süsie puo ngu sa mota, kekreilamonyü Ukepenuopfüe puo zelieketa la.

²⁵ Methuselae puo kelhouzha cie krie puo di hiethethaethenie ki puo nuou Lamek lhoulie.

²⁶ Lamek lhoukelie sie rei Methuselae cie krie thenie di hiethethaekenie lhou salie. Mu puo nuo kekrei thepfu mu thenu rei ngu salie.

²⁷ Methusela kelhouzha pete kesa cie krie thepfü di hiesorouethepfü, sidi puo siata.

²⁸ Lamek-e puo kelhouzha cie krie puo di hiethethaekenie ki puo nuo thepfu puo ngulie.

²⁹ Sitse puoe sie, “Jihova thuo rüsekewa kijü hau geinu, nuo hau bu u mhatho kere nunu kerülei se vor u tsütuo,” idi puo za thopie Noah chülie.

³⁰ Lamek-e Noah penuokelie sie nu teicie krie pengou di hiethepfüepengou lhou salie. Mu puo nuo kekrei thepfu mu thenu rei ngu salie.

³¹ Lamek kelhouzha pete cie krie thenie di hietheniethenie, sidi puo siata.

³² Noah-e puo kelhouzha cie krie pengouketa sie nu puo nuo se, Shem, Ham mu Jafet ngulie.