Keriekitho 49 - Angami Naga CL (Re-edited) Bible (BSI)

Jakob Die Thelako

¹ Süsie Jakob puo nuoko kielie di sie, “Nieko vor kengulie, a bu thie nie gei kedipuo chü vortie shi nie ki pushüketuo la.

² “Vor kengulie di rünyülie, Jakob nuonuoko, nieko puo Israel pfhe rünyüliecie.

³ “Reuben, no sü a nuo nuorieu, a kekuou mu a shürhei si therieu zo. Therhu kerükrietho mu kekuo kekhotho.

⁴ Dzü tuoi bajü mo, no mha kekhotho-u nu tuo sa motatuo, noe n puo zhü gei siekewa la; sidi no süu perhuwa, no a zhü gei siewate!

⁵ “Simeon mu Levi nnie sü siezedzürie zo; mha kepeka rünyieko sü nnie zhiecha zo.

⁶ Harie a bu nnie kehou nu vo hiecie; harie, a bu nnie ze kekrotho hie üthienyü, nnie nnie nouyie nunu mia dukhrikewa la, siro nnie thuo nnie medo chü di thudo phimhi nu puo nyhiero duthewa.

⁷ Rüse bu nnie nouyie gei pfülie; süue kemeriecü la! Mu nnie noupfhünouyie gei rei pfücie, süue puo zhosuocü la! A Jakob nunu nnie kezawatuo, sidi nnie bie ketsieyapie Israel nu shüwatuo.

⁸ “Juda, n siezedzürieko n tshetuo, n dzie bu n ngumvüko vo gei pfütuo; n puo nuonuoko bu n mhodzü nerhu tsutuo.

⁹ Juda sü Loshanuo puo zo ru, a nuo, khunuo chüteu nunu, taliete. Puoe Losha puo tuoi, rünuotsu zhü, prousietuo üdi, mu Loshakrü puo tuoi, supuonie michie mo di puo kesoulie ta?

¹⁰ Juda kinu kedi theu tuotalie lho, mha kekhakecü theu rei puo phinie cielie lho, mia khezhanuo puo tsü, mu die ze vor kemochie.

¹¹ Puoe kier nuo pie khubebo gei khetuo, tsiu puoe gadanuo pie khubebo kevitho-u gei khetuo, puo khubezu nunu puo pfhe menyi, tsiu puoe boulie pie khubesi zie nu menyituo;

¹² puo mhi-e khubezu ki rei teikuotuo, mu puo hue mithunudzü ki rei krakuo tuo.

¹³ “Zebulun-e dzükezha khiera lhoutuo; puoe rouko la rüleichü puo chütuo; mu puo kijü rieko Sidon tsotuo.

¹⁴ “Isakar sü Gada kekuo puo zo, tekuokroko donu zhüya;

¹⁵ puoe rüleichüu vikecü ngushü; mu süu kijü u neikecü ngu; süla puo süu pfhülietuo üdi puo bouka kerünuoshü; sidi puo kemvü chüpie mia theke chüta.

¹⁶ “Dan-e puo themiako capi chütuo, Israel nu seyie puo chü di.

¹⁷ Dan-e cha nu tinyhü puo chütuo, chatse nu nyhübvüpfü, kier phitshü medu di puo gei ketuou bu mela tsutuo.

¹⁸ “Ae n kelakelieu pfhe bawe, O Jihova.

¹⁹ “Mia pekawayakezha kro puoe Gad peka vortuo; derei puo uko phitshü geinu uko pekawatuo.

²⁰ “Asher kecüca nyi phituo, sidi kedimia la kecüca keviko khashütuo.

²¹ “Naftali sü chüzhie petakeshü puo nuonuo u nei sekecü keneipfü zo.

²² Josef-e puosi vüshüyakezha seico puo, dzüluo khieki puosi vülieyakezha seico puo; puo cokoe sozha zie vo kebau.

²³ Theükepieko khrie se di puo petsou zo; sidi puo va, tsiu puo re phi zo.

²⁴ Sizorei puo theüu metei balie, Jakob Kekuou thuo puo dzienie chü kemetei seshüte. Israel Tsiekrieu mu Kepfheu za nunu.

²⁵ N puo Kepenuopfü n khruohishüketuou, tsiu Kuokejokejüu tei pesogei thejako se jashü n tsüketuou, theja kesou lukhro rüshükezhü thejako, n merü gei mu nuobvü nu thejau rei sa.

²⁶ N puonuoko thejakoe kijüthou kekra theja ki zhakuo, kechachie bayakezha kijükhruko, süko bu Josef gei vorliecie, mu puo siezedzürieko kinu puo chükhowaketau gei vorliecie.

²⁷ “Benjamin sü mia tekecü socie puo zo, khise gei rei puo chüteu te cü, mu mhavako kezatuo.”

²⁸ Hako pete-e Israel seyie kerekenieko; mu uko puoe japie uko tsükeshü ki hakemhie di uko rüchü, kehoupuorei puo la viketuou le di japie uko tsü.

Jakob Se mu Puo Kekhru

²⁹ Süsie puoe uko ki pu di sie, “A ze a themiako ki votatuo üzhie, süla Hit-u Efron lie nu tsiepfüu nunu a puonuoko ze di a khru zocie.

³⁰ Abraham-e se mekhru chü chütuo üdi Hit-u Efron kinu khrükelie, Kanan nu Mamre kepenuoki Makpela nu lieu tsiepfüu nu.

³¹ Sünu Abraham mu puo kimia Sara khrupiezhü; sünu Isak mu puo kimia Rebeka khrupiezhü mu sünu a Leah khrupiezhü.

³² Hitmia kinu lie süu mu sünu kezhü tsiepfüu khrüpiezhü.”

³³ Siro Jakob-e puo nuonuoko ki mha pushükewa sie, puo phipie puo zhü gei pfülie di puo keha khashüwa, sidi puoe puo themiako ki vota.