Keriekitho 48 - Angami Naga CL (Re-edited) Bible (BSI)

Jakob Japie Josef Nuonie Ketsü

¹ Siro mha hako sie, mia Josef ki, “Harie n puo suo bate,” ishü; süla Josef-e puo nuonie Manasseh mu Efraim zelie di vo.

² Siro mia Jakob ki, “N nuou Josef n ki vorzhie,” sitse puo thuo puo rhiechü sie puo zhü gei balie.

³ Sidi Jakob sie Josef ki, “Kuokejokejü Kepenuopfüe Kanan kijü nu Luz nu a pengushü di japie a tsü.

⁴ Sidi a ki, ‘A n chü pekruoshütuo tsiu n chü pekrashütuo, mu a n chüpie themia krodi puo chüshütuo, siro a kechachie la kijü hau khapie n nuosenuoyieko tsüshütuo.’

⁵ Mu tsie n nuonie, a Ijipt nu ketsur mhodzü penuoshü n ketsünie bu a vie chütatuo; Efraim tsiu Manasseh rei Reuben mu Simeon unie kemhie, a vie chütuo.

⁶ Siro unie sie nu penuokelie nuonuoko ro n vie chütuo, siro thekatsatie la unie zapie unie siezedzürieko za sa thutuo.

⁷ Kekreilamonyü a Padan nunu kevor ki, Kanan kijü nu, cha nunu Rachel siate, Efrat nu voketuo dopuo baluocü nu; sidi a bu Efrat nu kevo cha nu puo khruwate ru” (süu Bethlehem ücüu).

⁸ Siro Israel Josef nuonie ngu tse, “Harie, suomia ga?”

⁹ Sitse Josef-e puo ki, “Unie-e Ukepenuopfü hanunu khapie a ketsü a nuonielie.” Sitse puo sie, “N pezie rei unie ze a ki vorcie, sidi a bu jashü unie tsücie.”

¹⁰ Israel tsaketa la puo mhinie rei merüta di mha ngu kemecielieya mota, süla Josef unie ze puo ki phishü; sitse puo unie meboshü di unie ciepielie.

¹¹ Süsie Israel Josef ki, “A n zie rei nguketuo le tuo mota zo; ru harie, Ukepenuopfü a bu n nuonuo rei sa nguwate” ita.

¹² Süsie Josef-e puo puo khoudzanie donunu unie ze parlie, di puo thuo tsu kijü zerepfü zhüta.

¹³ Süsie Josef-e unie kenienie teshülie, puo dzie puo zatsa pie Efraim merhashü di Israel vitsa va, mu puo vitsa üse Manasseh merhashü di Israel zatsa va, sidi unie ze penuo phishü.

¹⁴ Derei Israel puo dzie puo zatsa yhapie Efraim tsü gei shülie, süu nhicuu mu puo dzie puo vitsa pie Manasseh tsü gei shülie puo dzie kevarü di; Manasseh-e nuorieu zoü rei.

¹⁵ Sidi puo japie Josef tsü di, “A puonuo Abraham tsiu Isak puo mhodzünu tuo kevor Ukepenuopfü, a kerhei chie a kepfheu chü vor thie tsokeshü Kepenuopfü,

¹⁶ mu kemezhielie kevi pete nunu a shüphrakeshü dielieu, japie u nuonie tsücie; sidi unie geinu a zau keyiese tuolie, tsiu a puonuoko Abraham siro Isak za rei sa; mu unie bu kruosie kijü nu krodi puo chüliecie.”

¹⁷ Siro Josef-e puo puoe puo dzie puo zatsa pie Efraim tsü gei shüketa ngu tse, süu puo nei mota; sidi puoe Efraim tsü geinu puo puo dzie teshüpie Manasseh tsü gei shüwa.

¹⁸ Sidi Josef puo puo ki, “Ci molie, a puo, hauha nuorieu, süla n dzie n zatsa pie puo tsü gei shücie.”

¹⁹ Derei puo puoe mvüta, di sie, “A si balie, a nuo a si ba zolie, puo rei sier seyie puo chütuo; siro puo rei zha zotuo, derei puo siezeu we puo ki zhakuotuo, mu puo nuosenuoyieko krodi seyie kro puo chütuo.”

²⁰ Süla puo sünhie japie unie tsü di sie, “N za se di Israel-e jashütuo, ‘Ukepenuopfü bu n chüpie Efraim mu Manasseh tuoishülie.’ ” Hai di puo Efraim bu Manasseh mhodzü rieta.

²¹ Süsie Israel-e Josef ki, “Harie a siatatuo üzhie, derei Ukepenuopfü n ze tuo zotuo; sidi n ze la vo n puonuoko kijü nu shütuo.

²² Siro a thie pie n siezedzürieko ketsü mho a n shiephruo rükrüshüzhie ho. A a zhiecha mu a theü se Amormiako kijü penyükelieu sa pie n tsüshü ho.”