Keriekitho 46 - Angami Naga CL (Re-edited) Bible (BSI)

Jakob Puo Kikruko Ze Ijipt nu Ketsu

¹ Sidi Israel puo vie ketuo pete selie di rüve sedeshü, sidi Beersheba nu vorkelie ki, sünunu ruosuo chüpie puo puo Isak Kepenuopfü tsü.

² Mu Ukepenuopfü süzhü puo mho geinu Israel rüchü di sie, “Jakob, Jakob,” sitse puo sie “A haki bawe.”

³ Sitse puoe “Ae Kepenuopfü, n puou Kepenuopfü zo; Ijipt nu tsu michie hiecie; a sünu n chüpie seyie kezha puo chüshütuo.

⁴ A thuo n ze Ijipt nu tsutuo, mu n ze la vorshü zotuo; siro Josef bu puo dzie pie n mhinie kegushütuo.”

⁵ Süsie Jakob-e Beersheba nunu tuoshü; Israel nuonuokoe, uko puo Jakob nuonuo kecüko, mu u nupfünuoko bu Faro ketsekeshü bageiko gei tuolie.

⁶ Süsie rei uko kirinuoko, mu uko vienya Kanan nunu ngukelie pete selie di Ijipt nu vorlie, Jakob mu puo ze ketuo puo nuosenuoyie pete.

⁷ Puo nuo thepfuko mu uko nuonuo thepfuko, puo nuo thenuko tsiu puo nuonuoko nuonuo thenumia puo ze ketuo pete mu puosepuoyie peteko ze Ijipt nu vorta.

⁸ Siro hako Israel nuosenuoyieko Jakob mu puo nuosenuoyie Ijipt nu kevorko za: Reuben Jakob nuorieu,

⁹ tsiu Reuben nuoko: Hanok, Palu, Hezron, mu Karmi.

¹⁰ Simeon nuoko: Jemuel, Jamin, Ohad, Jakin, Zohar mu Kananpfü nuo Shaul.

¹¹ Levi nuonuoko: Gershon, Kohat mu Merari.

¹² Juda nuoko: Er, Onan, Shela, Perez mu Zera (derei Er siro Onan unie Kanan nunu siata); siro Perez nuonie ro Hezron mu Hamul.

¹³ Isakar nuonuoko: Tola, Puva, Jashub mu Shimron.

¹⁴ Zebulun nuoko: Sered, Elon mu Jahlil.

¹⁵ (Hako Leah nuoko, Pedan-aram nunu penuoshü Jakob ketsüko tsiu puo nuopfü Dina rei sa; puo nuonuo thepfuko mu thenuko pete kesa mia serese).

¹⁶ Gad nuoko: Zifion, Hagi, Shuni, Ezbon, Eri, Arodi mu Areli.

¹⁷ Asher nuoko: Imna, Ishva, Ishvi, Beria mu uko üpfü Sera. Siro Beria nuonie: Heber mu Malkiel.

¹⁸ (Hako Laban-e khapie puo nuopfü Leah ketsüpfü Zilpa nuonuoko, puoe hako penuoshü Jakob tsü, mia keresorou.)

¹⁹ Jakob kimiapfü Rachel nuonie: Josef mu Benjamin.

²⁰ Siro Ijipt kijü nunu penuoshü Josef ketsünie liro Manasseh mu Efraim, On nu zievo-u Potifera nuopfü Asenat geinu penuoshü puo tsü.

²¹ Siro Benjamin nuoko: Bela, Beker, Ashbel, Gera, Naman, Ehi, Rosh, Mupim, Hupim mu Ard.

²² (Hako Rachel geinu penuoshü Jakob ketsüko pete kesa mia keredia.)

²³ Siro Dan nuou: Hashum.

²⁴ Naftali nuoko: Jahzil, Guni, Jezer mu Shilem.

²⁵ (Hako Bilha, Laban-e khapie puo nuopfü ketsüpfü nuoko mu puo hako penuoshü Jakob tsü. Pete kesa mia thenie.)

²⁶ Siro hako pete Jakob ze Ijipt nu vor, puo geinu lhou keparko. Mu Jakob nuoko nupfünuo sa kemo, uko mia hiesorouesorou;

²⁷ Tsiu Ijipt nunu penuoshü Josef ketsü mia kenie: Jakob kinumia Ijipt nu kevorko pete kesa mia hiethenie.

Jakob Ijipt nu Lhou Baketa

²⁸ Siro Israel-e Juda bu rie Josef ki tsu, puo bu puo mhodzü Goshen nu kevo chau thashü puo kielieketuo la; sidi uko Goshen kijü nu vorlie.

²⁹ Mu Josef-e puo kierbagei keselie di Goshen nu puo puo Israel ze kesetuoü vo; sidi puo thuo puo khapie puo tsü mu puo puo vo ciepielie di puotei huo puo puo bouka geinu kra bata.

³⁰ Sitse Israel sü Josef ki, “Tsie we a siata rei vite, a thuo n zie ngu di no rhei tuo zocü siliete eru.”

³¹ Sitse Josef puo dzürieko siro puo puo kinuko ki, “A vo di Faro ki putuo, tsiu puo ki, ‘A dzürieko mu a puo kinuko, Kanan nu ketuoko a ki vorte.

³² Mu uko tekuo kepfhemia zo, ukoe khurinuo keperimia zolie; tsiu uko kuo kroko, u thukroko siro u vie ketuo pete se vorte,’ idi pushütuo.”

³³ “Siro Faroe nieko kie di, ‘Nieko kedipuo kechümia ga?’ iro.

³⁴ Niekoe sie, ‘N kituokoe hie nhicu nunu tsie ketso perinuo keperimia zo, hieko mu hieko puonuoko rei’ iliecie, nieko bu Goshen kijü nu lhou balieketuo la; kuopfhemia kehoupuorei Ijiptmia mhodzünu we kerütsekecümia zocü la.”