Keriekitho 45 - Angami Naga CL (Re-edited) Bible (BSI)

Josef Puo Siezedzürieko Bu Puo Sikelie

¹ Sitse Josef puo khieki kethako mhodzünu puo kethe salie kenjüta, süla puo pfhephra peto sie di, “Themia kehoupuorei a kinu tuotaliecie,” si. Süla Josef-e puo siezedzürieko bu puo sikelie ki miapuorei puo ze tha mota.

² Sidi puoe krakhouita, süla Ijiptmiako süu si, mu Faro kinuko pete süu si.

³ Sitse Josef sie puo siezedzürieko ki, “A Josef zowe, a puo rhei baluo le?” Derei puo dzürieko puo pfhekholie kenjüta, uko puo khieki ketha ha u nou kehoukeruo chütacü la.

⁴ Sitse Josef puo dzürieko ki, “A penuo vorliecie.” Sitse uko puo penuo vorlie. Sitse puo uko ki, “A nieko siezeu Josef zolie, nieko puo zepie Ijipt nu shükewau.

⁵ Mu tsie nieko nousuota hie, morei nie thuo nie ngupie nie nou meyie rei hie, nieko a zepie hanu shükewa la. Kepenuopfü thuo nieko mhodzü a ketseshüwate, kerheiro kelalieketuo la.

⁶ Kijü nu teicie kenie pekrie vorte; mu tsie rei cie pengou ba saluo, süko nu liecie morei liekere rei balie lho.

⁷ Süla Ukepenuopfüe a bu kijüu gei nieko la peshapie keba kro puo pekrupie balieketuo la themia kekra perheishütuo üdi nieko mhodzü a ketseshüwate.

⁸ Süla nieko a ketsepie hanu shü monyü, Ukepenuopfü thuota zo; sidi puo a bu Faro krü puo chüshüte, siro puo kinu niepu chü mu Ijipt kijü pete mho kekhakezhau chü bate.

⁹ Nieko rükri a puo ki kholie, di puo ki pushücie, ‘N nuou Josef haikecü puyawe, Ukepenuopfü a chüpie Ijipt kijü pete mho niepuu chüwate; a kinu tsurtalie, ge ba hie.

¹⁰ N bu Goshen kijü nu lhoutatuo, n bu a penuo tuotatuo, no mu n nuonuoko, tsiu n nuonuo nuonuoko rei, n kuoko, n thukroko, mu n vie ketuo pete.

¹¹ Siro sünu no se morokesuoko a kha n tsütuo, tsie rei cie pengou pekrie satuoluocü la; no mu n kinuko, tsiu n vie ketuoko bu tsopfhütalie lho, sishülie.’

¹² Mu tsie nieko mhi mu a siezeu Benjamin mhi-e a thuo die pu ketha ngushüte.

¹³ Siro nieko a puou ki a Ijipt nu therhupfü phi baketa mu nieko kengu pete pushü morosuo bei zo. Rükrilie di a puo ze hanu tsurliecie.”

¹⁴ Sidi puoe puo siezeu Benjamin vo ciepielie di krata; mu Benjamin rei puo geinu krata.

¹⁵ Süsie puoe puo dzürieko pete meboshü di uko geinu krata; süsie nu puo dzürieko puo rüchü.

¹⁶ Siro, “Josef dzürieko vorwe,” icü die Faro ki nu si kevo ki, Faro mu puo kituoko u nei phita.

¹⁷ Sitse Faroe Josef ki, “N dzürieko ki pushücie, ‘Hau chülie; nieko khunuoko pie dalie di tuo Kanan kijü nu la volie;

¹⁸ sidi nieko puo mu nie kinuko zelie, di a ki vorlie, siro a Ijipt nu kijü kevitho-u kha nieko tsütuo, mu nieko bu kijü kevitho-u siko cütuo.’

¹⁹ Uko ki hau rei pu sashülie, ‘Hau chülie, nie nuonuo kecüko mu nie nupfünuoko la, Ijipt nu bageiko selie, mu nieko puo zelie di vorlie.

²⁰ Siro nie nyako la mhapuorei nie nounyü hie. Ijipt nu kijü kevitho-u sü nieko vie zoketuo la’ sishülie.”

²¹ Sitse Israel nuonuoko sükemhie chülie; siro Faro die khakeshü tuoi Josef-e bageiko khapie uko tsüshü, mu uko rüve la se morokesuo kecüca rei kha uko tsüshü.

²² Siro puoe pfhenei thulilieketuo pie uko tsü phreshü; derei puo raka shekel krie se, mu pfhenei thuli pengou pie Benjamin tsü.

²³ Siro puo puo la mha hako ketseshü; Ijipt nu mhanya keviko pie u pie dakepfü gada ker, siro puo puo bu rüvecha nu seketuo la, telha, niekhrüda mu se morokesuo cako mu puo pie dakepfü gadakrü ker.

²⁴ Sidi puo dzürieko bu tuota, mu uko tuotakezhü ki, puo uko üse, “Cha nu kegei tuo suo ho.”

²⁵ Sidi uko Ijipt nunu tuota, mu Kanan kijü nu uko puo Jakob ki la vorlie.

²⁶ Sitse uko puo ki, “Josef tsie rei rhei ba zo, mu puo Ijipt kijü pete mho kekhayakezhau chü sa bate.” Sitse puo puo ngothorta, puo uko pelelie kenjüta.

²⁷ Derei uko Josef uko ki pukeshü die pete pie puo ki pukeshü ki, mu Josef-e puo pfüketuo la bagei ketsekeshüko ngukelie ki, uko puo Jakob puo nou rhei la vorlie.

²⁸ Sidi Israel-e sie, “Tseite, a nuo Josef tsie rei rhei keba sü; a siaketa mhodzü vo puo ngutuo.”