Keriekitho 43 - Angami Naga CL (Re-edited) Bible (BSI)

Benjamin Ze Ijipt nu Ketsu

¹ Kijü nu pekrieu re seta.

² Süsie uko Ijipt kijü nunu telha pfü kevorko cü thelieta tse, uko puoe uko ki, “La vo di úko la kecüca huoyo khrü saliecie,” sita.

³ Derei Juda sie puo ki, “Themiaue puo thochü di hieko ki pukecü, ‘Nieko siezeu bu nieko ze vor kemosie, nieko bu a zie ngulie lhote,’ isilie.

⁴ No hieko siezeu ketsepie hieko ze tsutuo üro hieko tsu di n la kecüca khrülietuo;

⁵ derei no puo ketseshü kemosie, hieko tsulie lho zo; themiau hieko ki, ‘Nieko siezeu nieko ze tuo kemosie, nieko a zie ngu salie lho,’ ita zeru.”

⁶ Sitse Israel sie, “Kiüdi nieko a gei haikecü chüshü mu! themiau ki nieko siezemia puo ba saluo üdi pukeshü ha?”

⁷ Ukoe sie, “Themiau hieko mu hieko seyieko dzeko ketso menuo sete, sidi sie, ‘Nieko puo rhei baluo me? Nieko siezemia kekrei baluo me?’ itelie. Hieko pukeshüko sü puo hieko ketsokeshüko kelakeshü zo, hieko rei puo hieko ki, ‘Nieko siezeu ze tsurliecie’ itaketuo si tuocü puo memu?”

⁸ Sidi Judae sie puo puo Israel ki, “Unuoyo ketsepie a ze vo zocie, sitse hieko sielie di tuolietuo, sitse úko siata mo di rheilietuo, no mu hieko tsiu hieko nuonuoko rei.

⁹ A thuo puo la thepieu pfülietuo; sidi lau pie a tsü gei shülie. Mhanuü a puo ze la vor n ki shü mo mu puo kha n mhodzünu shü mota ro, a bu kejo-u pfü sei tuotalie.

¹⁰ Hieko bu gepfü hai bata mocüwe, hieko va kenieu rei la vorlietatieciü.”

¹¹ Sitse uko puo Israel uko ki, “Süu chü zotuo üliro, hau chüliecie; nieko likhuoko nu nhasi u kijü nu vie kevitho huo chü pfülie, mu süko pie themiau tsüketuo la se tuolie, kenhekecü daru huoyo, mu mepfhidzü huoyo, ketsa, leitsa, pistakio nhasipfü mu almond.

¹² Siro raka hadzü de kenie selie, mu nieko raka la lapie nie nhouko nu shükeshüko se lalie; süu mha ngu mokewa puo zo nhiemu.

¹³ Nieko siezeu rei zelie, sielie di themiau ki la tsucie;

¹⁴ Kuokejokejü Kepenuopfü bu themiau mhodzünu ngukemezhie kha nieko tsükelieu chücie, sitse puo nieko dzürie kekreiu mu Benjamin ketse lashülietuo. A la zowe a bu a nuonuoko krükra tuotuo üliro, a thekrü chütuo zotiemu.”

¹⁵ Sidi themiako mha kha mia tsüketuo selie mu uko raka seketuo de kenie, siro Benjamin sa zelie, sidi uko Ijipt nu tsu Josef mhodzü thalie.

¹⁶ Siro Josef-e Benjamin uko ze ketuo ngu tse, puo kinu mha kemeho-u ki, “Themiako ze kinu vorlie; mu khunuo dukhrilie di mha keselie; themiako bu thie a ze mhacüketuo la.”

¹⁷ Sitse themiau Josef pukeshü mhie chülie; sidi themiako ze Josef kinu vorlie.

¹⁸ Sitse themiako michieta, uko ze Josef kinu vorketa la, süla uko sie, “Hau sü kerieu va raka kha lapie úko nhou nu keshü la úko ze vor hanu shüte; puo puotei hau nu úko petsou di úko gei phirtuo üzhie, úko tepie puo diemia chülie mu úko gadako rei sa pielietuo üzhie.”

¹⁹ Sidi uko Josef kinu kemeho-u ki vor di kicieki nu puo rüchü di sie,

²⁰ “He-i a niepuu, hieko kerieu va kecüca khrütuo üdi tsur;

²¹ sitse hieko rüleichü nu vorlie di hieko nhouko phrei sie ru hieko peteko nhoutie nu raka u vieu tuo di ngu lalielie, hieko raka pete. Süla hieko süko se la tuowe.

²² Siro raka kekrei rei kecüca khrüketuo la hieko dzie nu se tsur ba. Supuonie raka khapie hieko nhouko nu shü shi hieko si mo zolie.”

²³ Sitse puoe uko die kela di sie, “Mhapuorei mo, mu michieta hie, nieko Ukepenuopfü mu nieko puou Kepenuopfü thuo kinyi kha nieko nhouko nu shümu sü, a nieko raka nguliete.” Süsie puoe Simeon ze uko ki vorshü.

²⁴ Siro mha kemeho-u themiako ze Josef kinu vorlie, di dzü kha uko tsüshü, sitse uko uko phi khrüwa; siro puo rügu pie uko gadako tsükewa sie,

²⁵ siro Josef vor ro uko mha pie puo tsütuoü se ketuoko khashüketuo la keselie, uko sünunu mhacütuoü keba sikelie la.

²⁶ Josef puo kinu vorlie tse, uko mha pie puo tsütuoü se ketuoko pie vor, di kijü nerhutsu puo kelu.

²⁷ Siro puo uko dze ketso di sie, “Nieko puou vi ba nhie, nieko puo dze pukeshü ketsau? Puo tsie rei rhei ba zo mo?”

²⁸ Uko sie, “N kituou, hieko puou shürho ba mu rhei ba zo.” Sidi uko nuketsu puo kelu.

²⁹ Siro puo tosie puo siezeu Benjamin, puo zuo nuou ngulie, di sie, “Hau nieko sieze nhicutho-u nieko a ki puo dze pu kebau me? A nuo, Ukepenuopfü bu n ngumezhieshücie.”

³⁰ Sidi Josef rükri tuota, puo noue puo siezeu mengu phiketa la, mu puo kra partatuoü thaketa la. Sidi puoe puo kibou puo nu le di sünunu kra bata.

³¹ Süsie puoe puo zie tshuwa di la par; sidi puo thuo puo kethelie di sie, “Kecüca keseshülie.”

³² Siro puo la krei, uko la krei, mu Ijiptmiako uko ze mhacüketuoko la krei idi mha keseshü; kekreilamonyü Ijiptmia Ibrimia ze mhacüya mo, süue Ijiptmia la mha kerütsetho puo zocü la.

³³ Sidi uko puo mhodzünu balie, nuorieu, puo phichüzhau medzi mu nhicutho-u nhicuzhau medzi idi; mu themiako huoniehuo meho di u ngo bata.

³⁴ Siro Josef mizhüu geinu uko khouko chüpie zashü, derei Benjamin khouka we kekreiko mia puo khouka de pengou. Siro uko mhacümhakrielie, di puo ze u neilie.