Keriekitho 41 - Angami Naga CL (Re-edited) Bible (BSI)

Josef Faro Mhoca Pukeshü

¹ Siro ciete kenie sie, Faro puo mho geinu Nail rü khieki tha di pema.

² Ru harie, Nail rüu nu mithu thenie par, ngu u nei siei mu luo siro uko tekhrieko donu nhaliecü tuo.

³ Süsie rei mithu kekrei thenie uko sie nu Nail rüu nunu par, ngu vi mo mu wetoi, sidi Nail rüu khie kekreitsa tha.

⁴ Sitse ngu vi kemo mu wetoicüko sü ngu u nei siei tsiu luocü thu thenieko cülieta. Süsie Faro cota.

⁵ Süsie puo ze la tsu ru puo mho va kenieu pema; siru harie telhakre thenie puosi puo tshu mu vicü bo puo geinu par.

⁶ Süsie telhakre thenie, puo kelhou suotoi mu niathutsa teikhrie bu he pesotoikecü kro puo la par.

⁷ Sitse telhakre kesuo thenieko sü puosi kevi mu vicü kre thenieko mezulie. Süsie Faro cota. Mu süue puo mho.

⁸ Süsie khise vorlie tse puo nou kemezhie bata; süla puo themia ketsepie Ijipt nu meduoyakezha pete mu sünu mhakesi pete kieshü; sidi Faro puo mho pie uko ki pushü, derei miapuorei süu ca vatshapie Faro kieshülie mota.

⁹ Sitse Faro hiekepie kezhaue Faro ki, “A thie a kejoko rükraliete.

¹⁰ Va puo Faroe puo kituonie gei puo nei mota di niekhrüda kerie kezhau hienie khapie kedie kepfheko kezhau kinu shüwa.

¹¹ Mu hienie mho kepema puo zhü pema phre. Puo mu a u mho pemacü ca nyi phre.

¹² Sükisü Ibrimia khriesamia puo hienie ze ba, kedie kepfheko kezhau kituo puo; mu hienie puo ki pushü tse, puo hienie mhoca kelashü hienie tsü, hienie mia puopuo u mho kepemau medzi di vatshashü phre.

¹³ Mu puo puoca vatshakeshü tuoi di chüta; a we a kha lapie a mhatho nu lashü, derei niekhrüda kerieu we gouwate.”

¹⁴ Sitse Faroe mia ketsepie Josef kieshü, ru uko rükri kedieki nunu puo ze vorlie, süsie puo puo tiemie thiewa, mu puo pfhenei kedilie di Faro mhodzünu vor.

¹⁵ Sitse Faroe Josef ki, “A a mho puo pema mu miapuorei süu ca pupie a kielie mote; mu a mia n dze kepu sicü, no mia mho silie ro puoca kelalieya üsi.”

¹⁶ Sitse Josef sie Faro ki, “Süusü a gei tuo molie, Kepenuopfü thuo puotou puo kelapie Faro tsü zotuo.”

¹⁷ Süsie Faro Josef ki pu di, “Harie, a mho geinu ae Nail rü khieki tha;

¹⁸ sitse mithu keluo mu ngu vicü thenie par; mu uko tekhrie donu nhaliecü tuo.

¹⁹ Süsie mithu kekrei thenie uko sie la par, lhou pesuo, zisuo mu wetoi zo; a Ijipt kijü pete nu zisuopie sükemhie ngu kemo kro puote.

²⁰ Sitse mithu kewe kezisuoko sü mithu kerie keluo thenieko cülieta,

²¹ derei süko cülieta zorei, miapuorei uko süko cülieta ücü silie kenjü; uko ngupie kerieki mhie di suo phi zocü la. Süsie a cosierta.

²² Süsie a ze la tsu ru, a mho geinu telhabo puo geinu telhakre thenie par, puosi puo tshu mu vi;

²³ sitse niathutsa teikhrie bu hekewa kitoicü kre thenie sotoi mu wetoi di kerieko sie par;

²⁴ sitse telhakre kesuoko kevi thenieko mezulie. A süu pie meduoyakezhako ki pushü, derei miapuorei süu vatshapie a kieshülie mote.”

²⁵ Sitse Josef Faro ki, “Faro mhoko puo zo; Ukepenuopfü thuo chü vortuoü kebau pie Faro pesishüte.

²⁶ Mithu kevi theniekoe teicie theniekote, mu telhakre kevi thenieko cie theniete, n mho-u puo zo.

²⁷ Siro mithu kewe mu kezisuo thenieko uko sie keparkoe teicie theniekote, mu niathutsa teikhrie bu hekewa telhakre kemethuo thenieko rei cie thenie zo, süko cie thenie pekrie bataketuoko.

²⁸ Süusü a Faro ki pukeshü mhie di, Ukepenuopfü thuo mhachütuoü kebau pie Faro pesishüte.

²⁹ Ijipt kijü pete nu cie thenie mhanyi sekecü ngutuo.

³⁰ Derei süko sie cie thenie pekrie siertuo, sidi Ijipt mhanyi phi sierkecüko rükra motatuo; pekrieue kijü cülietatuo.

³¹ Sidi kijü sünu pekrie kevor la mhanyi phi kevor-u si motatuo, süue re phiketuo la.

³² Süla Faro bu puo mho kepema sie pemakecü süu Kepenuopfü thuo chüshü mu Kepenuopfü thuo süu chü mhaishütuo.

³³ Süla tsie Faro bu themia kemenuo mu mhakesi puo kedalie, sidi puo bu Ijipt kijü nu mha kemeho-u chülie.

³⁴ Tsie Faro bu mha kemeho chüketuo la themia kedashülie. Sidi Ijipt nu mhakenyi cie thenieko nu mha ngukelieko za pengou chü di za puo khapie balie.

³⁵ Sidi süko bu teicie kevi süko nu kecüca kevorko kengupie Faro khro shülie, di süko bu nadiko nu telha se balie.

³⁶ Kecüca süko bu Ijipt nu teicie thenie pekrie vorketuo la kengupie batuo, pekrieu la kijü bu kata molieketuo la.”

Josef Ijipt Kijü nu Kuosierkelie

³⁷ Mharhü hau Faro mu puo kituoko pete u neilie.

³⁸ Süla Faroe puo kituoko ki, “Úko themia haicü puo ngulie vi me? Ukepenuopfü ruopfüu u nou ketuomia.”

³⁹ Sitse Faroe Josef ki, “Ukepenuopfü thuo mha pete pie n pekieshü eru, miapuorei n de, mhale menuo mu mhasikecü ba mowe.

⁴⁰ N bu a kiu mhokezha chütuo, mu a themiako pete no ahza khakeshüko se u kelhou kekhatuo; kedibau gei rübei a n ki zhakuocü zotuo.”

⁴¹ Sidi Faroe Josef ki, “Mehocie, a n chüpie Ijipt kijü pete mho shüwate.”

⁴² Sidi Faroe puo dzie nunu puo dziekha zasiu bielie, di pie Josef dzie nu shüwa, di linen pfhe kemese pfhenei pie puo ketsoshü, siro suna cü puo pie puo vo nu shü.

⁴³ Süsie puo bu puo kierbagei kenieu gei balie, siro mia puo mhodzünu melie di sie, “Khoutoulie” si tuota. Sümhie di puoe puo chüpie Ijipt pete mho shüwa.

⁴⁴ Süsie rei Faroe Josef ki, “Ae Faro, mu mia puo bu rei n sanyü mo di Ijipt kijü pete nu puo dzie morei puo phi chashülie lho zo.”

⁴⁵ Siro Faroe Josef za pie Zafenat-pania chüwa; mu On nu zievo-u Potifera nuopfü Asenat pie puo ki penyishü.

⁴⁶ Siro Josef Ijipt nu kediu Faro lie chükelie ki cie serta. Ru Josef Faro mhodzü nunu prata, di Ijipt kijü nu rühou voshü.

⁴⁷ Siro mhakenyi cie thenieko nu kijüu gei mha rüchü philie.

⁴⁸ Sidi puo Ijipt kijü nunu cie thenieko nu mha ketshukelhuo bakecü ki kecücako kengulie, sidi kecücako kengupie nadiko nu shülie. Puo nadi pete khiera lieko nunu kecüca ngukelie khe se vor nadiko nu shülie.

⁴⁹ Siro Josef-e telha kengupie dzükezha nu huoca tuoilie, mu puo süko mejü sa mota, süko phrü hulie kenjüketa la.

⁵⁰ Siro pekriekecü teicie vor kemonu Josef-e puo nuo thepfumia kenie nyilie. On zievo-u nuopfü Asenat geinu penuopie puo tsüshü.

⁵¹ Sitse Josef-e puo nuo nuorieu za pie Manasseh chülie; puo sie, “Ukepenuopfüe a bu a mezhieko mu a puo kinuko rükra moketa chükeshü la.”

⁵² Siro puo nuo kenieu pie Efraim chülie, “Ukepenuopfüe a kemezhiekecü kijü hau nunu a chü pekruoshüketa la.”

⁵³ Siro Ijipt kijü nu mhakenyi cie thenieko tseita;

⁵⁴ di pekriekecü teicie thenieko vor sedelie, Josef pukeshü tuoi di. Kijü pete nu pekrieta, derei Ijipt kijü nu we kecüca balie.

⁵⁵ Siro Ijipt kijü pete nu mhajüta tse, themiako Faro ki kecüca cha, Faro Ijiptmia pete ki, “Josef ki volie, puo nieko ki mhakehoupuo pu shierei süu chüliecie.”

⁵⁶ Siro kijü pete nu pekrieu bata, sitse Josef telha kiko khrüshü; di Ijiptko ki mha zeshü; Ijipt kijü nu pekrieu re seketa la.

⁵⁷ Sizomonyü kijü pete nu telha khrütuo üdi Ijipt kijü nu Josef ki vor, kijü pete nu pekrieu re seketa la.